Ads by Google Ads by Google

Fa’ataua e le malo le sao o Tama ma Tina matutua i le atunu’u


Le taimi na tauaao atu ai meaalofa mo Tama ma Tina matutua i le latou aso fa’apitoa i le tausaga na te’a nei. [ata AF]

Feiloa’i atu le afioga i le ali’i kovana ia Lolo Matalasi Moliga i ni isi o tama matutua o le atunu’u, i le fa’amanatuina ai o le latou aso faapitoa i le tausaga na te’a nei. [ata AF]
ausage@samoanews.com

O le vaiaso atoa lenei ua faapitoa e le malo i lana Kalena o mataupu fa’atino o le tausaga, e fa’atauaina ai le tautua a Tama ma Tina matutua i totonu o le atunu’u, e pei ona i ai polokalame o loo fa’agasolo a le Ofisa a Tagata Matutua i Pago Pago (TAOA), ma le fa’amoemoe o le aso Faraile e tapunia ai le savali fa’apitoa e faia i le malae o le Su’iga’ula a le Atuvasa i Utulei.

 

O le vaiaso mo tagata matutua i lenei tausaga ua fa’aautuina i le autu lenei: “O le Fofoga o e Matutua”.

 

Na fa’aalia e le Fa’atonusili o le Ofisa o le TAOA i luma o le fonotaga a le Kapeneta i le taeao ananafi, le faletua ia Evelyn Satele e fa’apea, e tele polokalame eseese o lo o fa’agasolo mo Tama ma Tina matutua, e aofia ai aoaoga faapitoa mo i latou ina ia silafia ai e i latou le tele o tomai e ao ona latou silafia.

 

O le aso Lulu ma le aso Tofi lea ua fa’atulaga e faia ai le fa’aaliga o oloa ma galuega taulima a tagata matutua i Utulei, ma maua ai fo’i ma le avanoa e fa’aalia ai le tele o a latou taleni eseese.

 

“O le aso Faraile e faia ai le sauniga faapitoa e tapunia aloaia ai le vaiaso o tagata matutua, lea e amata i le solo tele lava ona sosoo ai loa lea ma le tauaaoina atu o meaalofa taualoa mo tama ma tina matutua ua afu la latou tautua i le atunu’u, ma taualuga ai loa i faafiafiaga ma le taumafataga”, o le saunoaga lea a le tama’ita’i fa’atonusili ia Satele.

 

I se poloaiga fa’alaua’itele sa tu’uina mai e le afioga i le ali’i kovana ia Lolo Matalasi Moliga, e le gata o loo ia fa’afetaia ai le tautua a tagata matutua i totonu o le atunu’u, ae o loo ia talosagaina ai fo’i le atunu’u atoa ina ia tutu fa’atasi e lagolago le vaiaso faapitoa o Tama ma Tina matutua i le atunu’u.

 

Saunoa le ali’i kovana e fa’apea, o faamanauiaga ua sapi ai le atunuu e mafua mai i suiga lelei sa afua mai i tama ma tina matutua, ao tautua ai i latou i totonu o le malo ma aiga i tausaga ua mavae.

 

“O lo o tumau pea le fa’anaunautaiga o le teritori o Amerika Samoa ina ia fa’ataua pea le sao o tama ma tina matutua i le atunu’u, ina ia latou lagonaina ai le taua o galuega lelei sa latou fa’atinoina mo le atunu’u”, o se vaega lea o le poloaiga a le ali’i kovana

 

Sa ia taua le tatau lea ona si’itia pea i luga le fa’atinoina o polokalame e aofia ai tama ma tina matutua i le atunu’u, unaia polokalame e fa’aleleia ai lo latou soifua maloloina, ma ia fautuaina i latou ina ia fa’aalia o latou finagalo talafeagai mo le manuia ma le aga’i i luma o le malo.

 

Na fa’afetaia e le ali’i kovana le Ofisa o le TAOA e aofia ai ma le tama’ita’i fa’atonusili fou ia Satele, ona o le tele o galuega lelei o loo latou fa’atinoina pea mo tagata matutua i le atunu’u.

 

I le fa’aiuga o lana saunoaga, sa ia talosagaina ai le kapeneta ina ia auai i le fa’amanatuina o le aso fa’ai’u o tagata matutua i Utulei, ina ia latou silafia ai le lagolagoina e le malo o le latou sao i le atunu’u.