Ads by Google Ads by Google

Tala otooto o Fa’amasinoga


[ata: archive]
ausage@samoanews.com

ISAAKO TALOSAGA

 

Ua molia nei e le malo le ali’i o Isaako Talosaga i le moliaga mamafa o le talepe fale i le tulaga muamua ma le gaoi, e mafua mai i le fa’alavelave lea na tula’i mai i Tafuna i le masina o Mati o le tausaga nei, lea o lo o tu’uaia ai o ia i lona ulufale i totonu o se faleoloa i le leva o le po ma ave fa’agaoi ni oloa sa i ai i totonu e silia i le $100 le tau aofa’i.

 

O ni se’evae na ave fa’agaoi mai i totonu o le faleoloa, na mafai ai ona maua e Leoleo lenei mataupu ina ua foa’i e le ua molia se’evae i se tasi o ana uo, ma ta’u ai loa e lana uo lea i lona Tina se’evae sa foa’i atu e le ua molia ia te ia, ma logo ai loa le Ofisa o Leoleo.

 

E $10,000 le vaega tupe lea ua fa’atulaga e totogi ona fa’atoa mafai lea ona tatala le ua molia i tua, ma o lo o taofia pea o ia i le toese i Tafuna e fa’atali ai lana iloiloga lea ua fa’atulaga e faia i le aso Tofi o le vaiaso nei.

 

Na taua e le itu a le malo le fa’aauau pea o suesuega a Leoleo e fa’atatau i lenei mataupu, ona o lo o masalomia le a’afia o Talosaga i le isi fo’i fa’alavelave lea na tula’i mai i le masina o Fepuari o le tausaga nei lava, ina ua osofa’i e ni tagata se isi fo’i faleoloa i Tafuna ae ave fa’agaoi ni meatotino sa i totonu.

 

O lo o taumafai pea Leoleo e su’esu’e pe i ai se so’otaga o le osofaiga lea ma le fa’alavelave lea ua molia ai Talosaga.

 

MOLIA SE ALI’I I LONA FA’AO’OLIMA I LONA TO’ALUA

 

O le vaiaso na te’a nei na tula’i ai i luma o le fa’amasinoga fa’aitumalo se ali’i e tusa ma le 45 tausaga le matua, e mafua mai i tu’uaiga o lona fa’ao’o lea o ni manu’a i lona to’alua, a o matamata i ai lana fanau e to’atolu.

 

O lo o tu’uaia e le malo i le taimi lea ali’i i moliaga mama e lua o le fa’ao’olima i le tulaga tolu atoa ai ma le fa’atupu vevesi i totonu o lona aiga, ma le fa’amoemoe e ono faila ni moliaga fa’aopoopo fa’asaga ia te ia, pe afai ae mae’a su’esu’ega a Leoleo o lo o fa’agasolo i le taimi nei.

 

O le aso Faraile o le vaiaso nei lea ua fa’atulaga e le fa’amasinoga fa’aitumalo e toe fofogaina ai le mataupu a lenei ali’i, ma o lo o taofia pea o ia i le toese se’i vagana ua ia totogi le tupe e $500, ona fa’atoa tatala lea o ia i tua e fa’atalitali ai taualumaga o lana mataupu.

 

O le mataupu lenei na tofu atu i le Ofisa o Leoleo i Tafuna, ina ua vili e ni aiga tuai le Ofisa o Leoleo mo se fesoasoani, i le mae’a ai lea ona o latou fa’alogoina o le vavao mai o le aiga o le ua molia, aemaise ai leo o tamaiti o loo fa’alogoina le fetagisi solo.

 

Na taua e se tasi o molimau i Leoleo le masalomia o le fa’ao’olima o le Tamaloa i lona to’alua, peita’i e le o mafai ona iloa atu sei vagana ai leo o tagata o loo pisa mai totonu o le fale.

 

Na taunu’u Leoleo ma latou vaaia ai le Tina o loo nofo i fafo o le fale ma ona foliga fa’anoanoa, ae o le taimi lea ua tuua ai e le ua molia le fale ae sola ese, ina ua ia fa’alogo ua vili e aiga tuaoi le Ofisa o Leoleo, ae i le mae’a ai ona fa’amatala uma e le fafine i Leoleo o le fa’alavelave atoa sa tupu, e mafua mai ina ‘ona atu lona to’alua ma fasi o ia, e ita ina ua le manino le tala e fa’atatau i auala na fa’aaoga i ai tupe a le aiga.

 

Na auina atu le fafine na a’afia i le falema’i peita’i na toe te’a o ia i tua i le aso lava lea mai manu’a na a’afia ai o ia.