Ads by Google Ads by Google

LOLO: O le galuega a le Leoleo e fa’avae i le alofa ma le aganu’u


Se vaaiga i le ali’i ma tama’ita’i Leoleo i le sauniga e tatala ai le latou Vaiaso Faapitoa mo Leoleo i le taeao ananafi i le malae i Fagatogo. [ata AF]

Vaega Fui a le Ofisa o Leoleo i le taimi o le latou savali i le sauniga e tatala ai le latou Vaiaso Faapitoa mo Leoleo i le taeao ananafi i le malae i Fagatogo. [ata AF]

Ni isi o le aufaigaluega a le Matagaluega o Leoleo i le taimi o le sauniga e tatala ai le latou Vaiaso Faapitoa mo Leoleo i le taeao ananafi i le malae i Fagatogo. [ata AF]
ausage@samoanews.com

I le tatala aloaia ai o polokalame mo le Vaiaso Fa’apitoa o Leoleo i totonu o le atunu’u i le taeao ananafi, na fa’amanatu ai e le Ta’ita’i o le atunu’u, le afioga i le ali’i Kovana ia Lolo Matalasi Moliga i ali’i ma tama’ita’i Leoleo le taua o la latou galuega fa’atino i le aso ma le po, le galuega sa latou tauto ai i luma o le Atua e puipui ma tausi le saogalemu ma le sa’olotoga o tagata uma o Amerika Samoa.

 

“O le galuega fa’a Leoleo e fa’avae mea uma i le alofa ma le aganu’u, o a’upega sili ia ona taua e tatau ona maua e le ali’i ma le tama’ita’i Leoleo e fesoasoani ai i lana galuega”, o se vaega lea o le saunoaga mai le ali’i kovana ina ua tulei saunoa i le tatalaina o le Vaiaso mo Leoleo i se sauniga puupuu sa fa’agasolo i le Malaeoletalui Fagatogo i le taeao ananafi.

 

Sa auai i lenei sauniga ali’i ma tama’ita’i Leoleo mai Vaega eseese o le Matagaluega o le Puipuiga o le Saogalemu Lautele e pei o le Fuimu, atoa ai ma sui o le Vasega lona 25 a Leoleo. O le afioga i le ali’i Senatoa ia Tuaolo M. Fruean, lea fo’i sa avea ma Komesina o Leoleo i le 4 tausaga mulimuli o le nofoaiga a Togiola ma Faoa na fai ma sui o le Fono Faitulafono i le molimauina o lenei sauniga taua, atoa ai ma ni isi o sui o le Kapeneta a le ali’i kovana.

 

O le aso Sa na te’a nei na tatala aloaia ai lenei Vaiaso Faapitoa mo Leoleo i se sauniga lotu sa fa’ataunu’uina i le malumalu o le Ekalesia EFKAS i Faga’alu, lea fo’i sa molimauina e le to’atele o uo ma aiga o ali’i ma tama’ita’i Leoleo, fa’apea ai ma ta’ita’i o le atunu’u e aofia ai ma le afioga i le ali’i kovana.

 

Na taua e le Komesina o Leoleo, tofa Le’i Sonny Thompson i lana ulua’i saunoaga le taua tele o le galuega a le matagaluega o Leoleo o lo o fa’atinoina, ina ia mautinoa e malupuipuia le atunu’u atoa i soo se taimi, atoa ai ma le fa’amalosia o tulafono a le malo.

 

I le saunoaga autu mai le afioga i le ali’i kovana, na taua ai e Lolo le taua o le Vaiaso Faapitoa lenei mo Leoleo, lea ua mafai ai ona fa’ataua e le malo ma le atunu’u atoa le tautua a Leoleo i totonu o le atunu’u.

 

I le fa’atinoina ai mo le taimi muamua o lenei polokalame mo Leoleo i totonu o le atunu’u, sa taua ai e Lolo le avea o lenei fa’amoemoe o se tala fa’asolopito talu ona tula’i mai le la faigamalo ma Lemanu, ina ua mafai ona fa’ataua e le atunu’u ma le malo le tautua a Leoleo.

 

“Fa’afetai tele atu mo la outou tautua i totonu o le atunu’u i nei tausaga e tele, e le o se tautua faigofie la outou tautua, ae o se tautua e faigata lona fa’atinoina, peita’i ua mafai ona fa’a faigofie ona o le mafuta mai o le Ali’i”, o le saunoaga lea a le ali’i kovana.

 

“O lea ua matou maitauina se la’asaga mo le aga’i i luma o le tautua a le Ofisa o Leoleo i lenei tausaga, o le fatuaiga tausi lena a outou o ali’i ma tama’ita’i Leoleo, o le mautinoa o lo o malu puipuia le soifua atoa ai ma le saogalemu o tagatanu’u uma o Amerka Samoa, ina ia latou maua se ola sa’oloto atoa ai ma se olaga fiafia i lalo o la outou tautua”.

 

“E pei ona atagia i le fa’avae o le malo tele o Amerika le sa’olotoga filemu ma aia tatau o tagata uma, o tulaga ia e tatau ona outou tausia lelei, aua o le fatu lena o soo se faigamalo Fa’a Temokarasi lea ua lafo atu i o outou aao o ali’i ma tama’ita’i Leoleo ua uma ona fa’atautoina tou te fa’atinoina lea matafaioi”.

 

Na toe fa’atepa e le ali’i kovana saunoaga ma fautuaga fa’amalosi na saunoa i ai ta’ita’i o le atunu’u i le sauniga lotu lea na fa’ataunu’uina i le aso Sa na te’a nei e tatala aloaia ai le Vaiaso o Leoleo, lea sa fa’atauaina ai le avea o Leoleo o ni isi e tausia le filemu i totonu o le atunu’u.

 

“E pei ona fa’amamafaina ai i la’u lauga i le aso Sa vaega o le lauga fa’a amuia a Iesu i luga o le mauga, e pei o le fa’a amuia ia i latou e fa’atupuina le filemu, e taua i latou o atali’i o le Atua, o le isi lena fatuaiga e tatau ona outou fa’atinoina, o le avea o outou ma tagata e fa’atupuina le filemu i totonu o le atunu’u”, o se vaega lea o le saunoaga a le ali’i kovana.

 

“E le gata e tatau ona outou fa’atinoina le galuega ma le alofa, a ia outou fa’atinoina fo’i le galuega i le fa’amaoni fa’apea ai ma le fa’aaloalo, aua o la outou galuega fa’avae i luga o le alofa ma le aganu’u”.

 

“Avea ai lenei vaiaso ua faapitoa mo Leoleo i totonu o le malo tele o Amerika atoa ai ona teritori ma atumotu tausi, ia fa’apena fo’i ona fa’atinoina i totonu o le atunu’u ma le malo o Amerika Samoa lea lava fo’i lagona, ina ia tutu fa’atasi le atunu’u e tu’uina atu le fa’amalo ia te outou e tusa ai o la outou tautua e le faigofie”, o le vaega fa’ai’u lea o le saunoaga a le ali’i kovana, ma ia talosagaina ai loa le atunu’u atoa ina ia o atu uma e lagolago ma sapaia polokalame fa’agasolo a Leoleo i lenei vaiaso, ma saili se avanoa e momoli ai lava e le tagata lana fa’afetai i ali’i ma tama’ita’i leoleo, e tusa ai o le latou tautua i le atunu’u.

 

Na taua e ni isi o Leoleo Sinia le agaga fa’afetai ina ua maua lenei avanoa e fa’atauaina ai la latou tautua i totonu o le atunu’u.

 

“O se fuafuaga ua leva na tatau ona fa’atinoina, aua e le faigofie la matou tiute fa’atino i totonu o le atunu’u i le ao ma le po, o le taumafai lea ina ia tausia le soifua saogalemu atoa ai ma le fa’amalosia o le tulafono”, o le saunoaga lea a se tasi o Leoleo Sinia.

 

Ae na taua e se tasi o Leoleo Sinia e fa’apea, e tele vaega e moomia le fa’aleleia i le auaunaga a Leoleo i le taimi nei, aemaise lava i le va feagai ai ma le atunu’u, ae maise lava i le toe fa’amalosia lea o le va fealoa’i o Leoleo ma le mamalu o le atunu’u i soo se taimi e fa’atinoina ai a latou tiute.

 

“O le ava fatafata lava le vaega muamua e tatau ona a’oa’oina, aemaise lava pe afai e taofi e le Leoleo le ta’avale a se isi o le atunu’u i luga o le auala, ia muamua le va fealoa’i ma le aganu’u, a vaai atu loa ua fa’alalolalo mai le tagata ona ua lagona lona sese, ona ave loa lea i ai e le Leoleo o le avanoa ma le fautuaga, ae e o le vaai atu lava o loo fa’alalolalo mai le tagatanu’u ua lagona lona sese a tu’u lava i ai le ticket, o nai vaega na e tatau ona toe a’oa’o i Leoleo tuai fa’apea ai le vasega fou o Leoleo lea o lo o fa’agaasolo i le taimi nei”, o le saunoaga lea a se tasi o Leoleo Sinia.

 

O fuafuaga fa’agasolo mo le vaiaso atoa lenei o Leoleo e aofia ai le fa’atutuina o Faleie i le Malaeoletalu i Fagatogo mo le taeao nei ma le aso Lulu, mo le fa’alauiloaina o galuega eseese o lo o fa’atinoina e le Ofisa o Leoleo i le atunu’u, sosoo ai loa ma le aso faapitoa mo Leoleo ma o latou aiga i le aso Tofi, ae fa’ai’u i le po fiafia i le po o le aso Faraile o le Fale Talimalo o le Tradewinds i Tafuna.