Ua talosagaina e matai e to’atolu o le itumalo o Ta’u, Manu’a le Vaega Iloilo o le Fa’amasinoga Maualuga a Amerika Samoa, ina ia toe iloilo lana fa’aiuga lea na tu’uina mai i le aso 31 Mati 2017 e fa’aleaoga ai la latou tagi sa tu’uina atu e fa’atatau i le filifilia o le afioga i le Pupuali’i ia Nuanuaolefeagaiga Saoluaga Nua, e nofoia le isi nofoa o le Itumalo o Manu’a #1 i totonu o le Senate a le Fono Faitulafono.

O matai e to’atolu ua latou talosagaina le fa’amasinoga ina ia toe iloilo lana fa’aiuga e aofia ai le afioga a Lefiti Atiulagi Pese, tofa Maui Aloali’i ma le tofa a Tauese Va’aomala K. Sunia, lea o lo o fa’aigoaina i le latou tagi lo latou tula’i lava o i latou mo i latou lava ina ia fai ai i latou ma sui o le itumalo o Ta’u i Manu’a.

O le mataupu lenei na tofu atu i luma o le fa’amasinoga maualuga a le atunu’u, ina ua fesiligia e i latou o lo o tagi le filifilia o Nuanuaolefeagaiga na te nofoia le isi nofoa o le Itumalo o Manu’a #1, ona e i ai lo latou talitonuga e lei tusa ma faiga fa’avae o le tulafono le auala na faia ai le fa’aiuga.

O le Itumalo o Manu’a #1 o lo o aofia ai itumalo nei e tolu e pei o Faleasao, Fitiuta ma Ta’u, ae 2 o latou nofoa i totonu o le maota maualuga a le Senate i le Fono Faitulafono a Amerika Samoa, ae mo le itumalo o Manu’a #2 lea aofia ai itumalo e 2 e pei o Ofu ma Olosega/Sili, e tasi le latou nofoa i totonu o le Senate.

O le talosaga la lea ua ua toe fa’aulu e matai e to’atolu e pe ona taua i luga, o lo o fa’avae la latou talosaga e toe iloilo ai e le fa’amasinoga lana fa’aiuga sa tu’uina mai ia Mati na te’a nei, i lalo o le fa’aiuga ua mae’a ona tu’uina mai e teena ai la latou tagi fa’asaga i lenei mataupu.

O lo o taua e le itu tagi e fa’apea, e lei o o le silasila a le fa’amasinoga i mau fa’amaonia o lenei mataupu, peita’i o lea ua tu’uina mai le fa’aiuga e fa’aleaoga ai le latou tagi sa fa’aulu, ae pei ona taua i le fa’aiuga a le fa’amasinoga maualuga sa tu’uina le le lava o mau fa’amaonia e lagolago ai e le itu tagi la latou tagi sa fa’aulu fa’asaga i lenei mataupu, aemaise ai o le tulaga i le avea ai o i latou ma matai e suia le itumalo o Ta’u.

I le tulaga o le avea ai o i latou ma tagatanu’u, na taua e le fa’amasinoga i lana fa’aiuga le le mafai e i latou o lo o tagi ona fa’ailoa atu i le fa’amasinoga mau fa’amaonia e lagolagoina ai a’afiaga na a’afia ai i latou ona o le fa’aiuga e pei ona filifilia ai Nuanuaolefeagaiga na te nofoia le isi nofoa o le itumalo.

I le avea ai o i latou ma sui o le itumalo o Ta’u, na taua ai e le fa’amasinoga i lana fa’aiuga se tasi o mataupu taua e tatau ona iloiloina, ona e le mafai e Ta’u ona faia na o se fa’aiuga mo le tofi Senatoa, ae o le tofi e filifilia mai e itumalo uma e 3 o lo o i totonu o le itumalo e aofia ai Ta’u, Faleasao ma Fitiuta, peita’i na teena e le itu tagi lea vaega o le fa’aiuga a le fa’amasinoga, ona e talitonu i latou o le avea o i latou ma tagatanu’u poo matai fo’i o se nu’u, o le fai lava fo’i lea o i latou ma sui o latou aiga fa’apea ai le nu’u o loo matai mai ai.

Sa latou fa’atusa le sootaga o i latou ma o latou aiga ma le nu’u ma le tulaga o le tagata palota e palota mo le tofi kovana poo le faipule i le maota o sui, lea e palota lava le tagata mo ia lava, ae o i latou e palota mo latou aiga faapea ai le afioaga. E le gata fo’i i lea, o le filifilia o le Senatoa, e palota ai le matai e fai ma sui o lona aiga potopoto.

E talitonu atili le itu tagi e pei ona taua i le latou tagi, o le fa’amaninoina o le tulaga e pei ona latou finauina, e talitonu i latou e si’i maualuga ai le tulaga o le matai i se tulaga maualuga nai lo le tagata palota.

I le tulaga o a’afiaga e pei ona taua e le fa’amasinoga i lana fa’aiuga, e talitonu le itu tagi o le fa’aiuga e pei ona filifilia ai le tofi Senatoa, e le gata ua a’afia ai i latou o matai ae fa’apea fo’i ona a’afia ai i latou o le pulega a ali’i ma faipule o Ta’u i lenei fa’aiuga.

Sa latou taua atili fo’i i le latou fa’aiuga le tulaga e pei ona teena ai e le fa’amasinoga le ulua’i talosaga a le itu tete’e, i le leai lea o se malosi o le Fa’amasinoga e iloiloina ai lenei mataupu, ona o se mataupu e fitoitonu i le lotoifale o le Senate a le Fono Faitulafono, ma afai o le tulaga lea e pei ona teena ai e le fa’amasinoga le talosaga a le itu tete’e, e tatau la ona vaavaai i le tulaga e pei ona latou finauina, o se tasi lea o auala e fa’atino ai galuega a le fa’amasinoga ae le fa’apea e fa’avae i luga o agava’a.

Na taua atili fo’i e le itu tagi e fa’apea, o le filifilia o nofoa mo itumalo e 5 a le Manu’atele, e le filifilia fa’atasi e itumalo e 5 tofi senatoa, ae fono lava le itumalo mo le filifilia o ana senatoa, mo se fa’ata’ita’iga o le itumalo o Ofu ma Olosega, e tatau lava ona fono i laua mo le sailia o se tasi e avea ma ona Senatoa.

E fa’apea fo’i i nofoa e 2 mo le Faletolu i Ta’u, Faleasao ma Fitiuta, e filifilia lava e i latou a latou nofoa e 2 mo le Senate, e le o faapea o loo mavaevae mai i le Fa’avae le fono  uma o itumalo e 3 mo le filifilia o ana Senatoa.

Na fa’apupula atili i le talosaga a le itu tagi e fa’apea, pe a oo ina fono le Faletolu mo le filifilia o ana senatoa e 2, e tu’u atu lava le avanoa ia i latou e saunoa ai ma fa’ailoa mai so latou sui e fa’atu mo le tofi, ma e le tutusa fo’i le tulaga e fa’atino ai filifiliga a Manu’a ma Tutuila, ona o le auala e filifilia ai tofi Senatoa a Tutuila e fa’avae mai luga o afioaga o lo o fausia mai ai Itumalo taitasi.

Mo se fa’ata’ita’iga o le itumalo o Tualatai lea o lo o aofia ai afioaga e 4 i le atunu’u, e aloaia e i latou le afioga i le Alo o Salamasina ia Satele o le latou Fa’asuaga lea, o ia lea o loo umia le tofi maualuga i totonu o le itumalo.

O le ali’i loia ia M. Talaimalo Uiagalelei o lo o tula’i mo le itu tagi, ae o Gwen Tauiliili-Langkilde o lo o tula’i mo le itu tete’e.