Ads by Google Ads by Google

Si’itia le tautua Matagaluega o Leoleo i le atunu’u


Le susuga i le ali’i Leoleo Sinia ia Lomu Mosese i le taimi sa ia fa’ata’ita’iina ai le faaaogaina o masini fou a Leoleo e tusi ai le pepa sala (ticket). [ata AF]
ausage@samoanews.com

O suiga e pei ona molimauina e ni isi o le atunu’u i le tautua a ali’i ma tama’ita’i Leoleo i soo se vaega o le atunu’u, ua atagia mai ai le si’itia i luga o le tautua a le Matagaluga o Leoleo, e pei ona fa’amaonia mai e le Komesina, le tofa Le’i Sonny Thompson i se feiloaiga ma le Samoa News i le vaiaso nei.

 

O suiga e pei ona molimauina i le auaunaga a Leoleo e aofia ai le fa’aaogaina o Polokalame e 2 ua taua o le “RO Program” ma le “Electronic-Ticket Program”.

 

O le “RO Prgoram” poo le “Register Owner Program” e pei ona saunoa le afioga i le ali’i Komesina o Leoleo, o se tautua ua leva ona i ai i le Ofisa o Leoleo i tausaga ua mavae ae sa taofia lona fa’aaogaina, peita’i o lea ua manatu e toe fa’aauau ina ia fa’a faigofie ai galuega a Leoleo i le taimi nei.

 

“O le RO Program’ e fa’aaoga pe afai e tiute se Leoleo i le po aemaise lava i taimi e tulaga fa’aletonu ai le tau, ae molimauina se ta’avale e le o usitaia tulafono o le alatele, ona feso’ota’i lea o le Leoleo i le tagata o lo o fai ma Tali Telefoni a le Ofisa o Leoleo i le taimi lea, ina ia fa’ailoa atu fa’amatalaga uma e fa’atatau i le ta’avale lea ua masalomia lona le usitaia o tulafono o le alatele, e ala i le fa’ailoa i ai o le numera o le ta’avale”, o le saunoaga lea a Le’i, ona siaki loa lea e le Tali Telefoni o le computer ma fa’ailoa mai ai fa’amatalaga uma e fa’atatau i le ta’avale, e aofia ai le tagata e ana le ta’avale, o le aso na lesitala ai, o le ituaiga ta’avale, o le lanu o le ta’avale, ma isi uma lava fa’amaumauga e fa’atatau i le ta’avale”, o le saunoaga lea a le ali’i Komesina.

 

O le polokalame o le ‘RO Program’ e pei ona saunoa Le’i, o lo o fa’aaogaina e Ofisa o Leoleo i vaega eseese o le malo tele o Amerika fa’apea ai atunu’u tetele uma i le atunu’u, ma ua tatau fo’i ona toe fa’aaogaina e Amerika Samoa ina ia fa’a faigofie ai tulaga o galuega ae puipuia ai fo’i Leoleo mai le taimi e fa’atinoina ai a latou tiute i le po.

 

“O le taua o le polokalame lea, e puipuia ai le Leoleo o loo tiute i le po mai lona taumafai e taofi le ta’avale, aua e le o iloa poo ai o lo o i totonu o le ta’avale, ae o a fo’i mea o lo o i ai i totonu o lena ta’avale, ae o le fa’aaogaina o le polokalame lea, e faigofie ai ona maua le tagata o loo ia fa’afoeina le ta’avale ma tusi ai loa le pepa sala i le tagata tonu lena”, o le saunoaga lea a Le’i e tau fa’amanino ai le polokalame o le RO Program.

 

Ae mo le polokalame o le ‘Electronic Ticket Program’, o se tasi lea o auala ua fa’aaoga e le Ofisa o Leoleo e fa’a faigofie ai a latou galuega e pei ona galulue soosoo tau’au ai ma le Vaega o Fa’amasinoga, ina ia taofia ai tulaga fa’aletonu i le tuai lea ona tu’uina atu pepa sala (ticket) i totonu o le fa’amasinoga mo a latou fa’amaumauga ma galuega fa’atino.

 

“O le isi polokalame lea ua fa’aaogaina e ali’i ma tama’ita’i Leoleo i luga o le auala i le taimi nei e taua o le ‘e-ticket’, o le taimi e taofia ai lau ta’avale e le Leoleo ona ua e le usita’i i tulafono o le alatele, o le taimi lena e fa’aaoga ai loa e le Leoleo lana masini laptop e tusi ai le ticket mo le ave ta’avale”, o le saunoaga lea a le ali’i Komesina.

 

Saunoa atili Le’i e fa’apea, o le taimi lava e mae’a ai ona tusi e le Leoleo fa’amaumauga uma a le ave ta’avale i luga o le e-ticket, e otomeki ai fo’i ona maua e le Ofisa o Fa’amasinoga fa’amaumauga ia, ma faigofie ai loa le fa’atinoina o galuega a Vaega e lua o le malo.

 

Sa ia fa’afetaia le fesoasoani na maua mai i le Vaega o Fa’amasinoga e aofia ai ali’i Faamasino ma ni isi o le aufaigaluega, lea na mafai ona latou galulue fa’atasi ma le aufaigaluega a le Ofisa o Leoleo i le fa’atulagaina o lenei polokalame.

 

Na taua e le afioga i le ali’i Komesina e fa’apea, o suiga e pei ona molimauina i le tautua a le Matagaluega o Leoleo, o se ata vaaia lea e ta’u atu ai i le atunu’u o lo o aga’i pea i luma le tautua a le Ofisa mo le fa’amalosia o le tulafono atoa ai ma le puipuia o le saogalemu o le atunu’u atoa.