Vaega: 86

Alo maia, o le a toe fa’aauau atu la tatout tala mo lenei aso. Na muta mai la tatou tala, ina ua fa’atiga nei le teine o Filipina, ma ua o’o i le taimi e fanau ai. Fai mai le tala, ua fa’anatinati nei ona vala’au le ta’avale a le falema’i e ave ai Filipina, ua le mautonu le lo’omatua o Malia, o le isi lea itu na popole tele ai Luisa ma Vesi.

O le isi itu, ona o lo’o faigaluega uma Lilo ma Loleta, fa’apea tamaiti, a’o lea ua vili tiga Filipina i lona ma’i. Fai mai, na liliu ane nei Luisa ma fa’apea ane ia Vesi, e tapena mea uma, ae maise fo’i o le lo’omatua, e sili pe a o latou o ona tu’u lea o le lo’omatua i le fale o lona uso o lo’o latalata i le taulaga, ae fa’aauau la’ua ma Filipina e fa’afetaui le sau a le ta’avale a le falema’i.

Ua fa’apea lava ona fai, o le manatu fo’i o le tamaloa o Vesi, e sili pe a nofo ia e va’ai mea uma, ae tu’u Luisa ma le lo’omatua e o ma Filipina. Ua fa’apea lava ona fai, fai mai ua uli nei e Luisa le ta’avale e aga’i atu i le falema’i. Na muamua tu’u le lo’omatua o Malia i le fale o lona uso, ae te’i ua oso ane ma le isi o latou tausoga e igoa ia Mareta latou te o i le falema’i.

Fai mai, e le i umi ae o latou va’ai loa le ta’avale a le falema’i ua agai mai ma o latou fa’atu loa ma ave ai loa Filipina i le falema’i, ae mulimuli atu i tua le ta’avale a Luisa ma Mareta. E le i taunu’u lelei ane le ta’avale a Luisa ma Mareta I nofoaga e paka ai ta’avale, ae o la va’aia loa le ta’avale a Lilo ma Loleta o lo’o tu mai i luma o le falema’i.

Na ona lilo ‘ese lava o le ta’avale a Luisa, vala’au loa ma le tamaloa o Vesi ia Lilo ma Loleta, o lea ua avatu Filipina i le falema’i. Fai mai, e le i toe fa’atali le tama i lea taimi, na topetope atu nei ia Loleta ia vave ona o i le falema’i, ona o Filipina lea ua au mai i le falema’i.

Fai mai, e le i toe fa’atali Loleta, ua tu’u uma galuega ae fa’anatinati ane loa i le falema’i mo Filipina. O le taimi lea, ua fai nei le fale talatala a Malia ma lona uso la’ititi o Telesia. Ua talatalanoa nei e uiga i a la fanau, aua ua maliu fo’i le to’alua o Telesia, o lea la e fai lava le talanoaga, a’o o la mafaufau o lo’o mafaufau pea i le ma’i o Filipina. Fai mai, na i’u lava ina lau ai loa ma le losalio a lo’omatutua i lea taimi.

Ua toe fa’amanatu nei e Telesia i lona uso matua le galuega faifai pea a o la matua, o le toa’aga lea e lau le Losalio. O le taimi tonu lea, ua luluti tiga o Filipina, ae o le taimi muamua fo’i lea o Filipina, afai e ola i le alofa o le Atua, o le a fai lava le mana’oga o si ona tina.

Fai mai, a’o le o’o i le aso e fanau ai Filipina, ua uma ona tautala i ai lona tuagane o Lilo, ia loto tele, o a lava mea uma, fa’ata’atia ‘ese, ae ia tu’u tasi lona loto ina ia ola si ana tama. Ua atoa le ‘afa itula talu ona toso i totonu Filipina, ae tamo’e mai loa ma le tama’ita’i tausima’i i fafo i le mea o lo’o nonofo atu ai Lilo, Loleta, Luisa ma Mareta.

E faia pea...