Tala I Vaifanua
SUIA TOFIGA SOSAIETE VFW AMERIKA SAMOA & HAWAII
O le afiafi o le aso Faraile ua te’a na faatasi ai le Asosi a Fitafita Tuai o Taua (VFW) a Amerika i le Maliu Mai Beach Resort i Fogagogo, e fa’alauiloa tofiga fou mo Amerika Samoa ma Hawaii, lea e fa’atautaia mai ai le tele o tautua e fa’aulu atu mo nei sui vetereni ua avea ma totino.
E le gata i le Asosi ae o latou faletua fo’i ma fanau lea e mafai ona avea i latou ma totino o le Sosaiete a le Auxillary, e fesoasoani fo’i i nisi pitola’au o tautua eseese.
O le tamaita’i o lo’o tutula’i nei e avea ma Sui e Fesoasoani i so’o se latou mataupu e fia malamalama ai, le afioga Igafo Maria Va’a-Brown, fa’apea ma le nofoatofi o le komiti fa’afoe a le latou Asosi a le VFW [Fitafita Tuai o Taua], sa auai uma ma tu’ufa’atasia lea aiga fiafia mo e uma na vala’aulia, aemaise i latou na malaga fa’apitoa mai Hawaii, e talia o latou tofiga e amatalia ia Iuni 2017 - 2018.
O e na malaga mai e aofia ai Lt Lane G. Martin ua avea nei ma State Commander fou i le Setete o Hawaii mo lenei tausaga o le a amatalia, ma le tina matua fo’i o Vai Fetuesi mai le afio’aga o Nuuuli ae o lo’o alaala tumau i Hawaii lea o le a avea ma State President o le Women’s Auxillary.
Ina ia solofa lelei le fa’atautaiga o latou tiute fai, ua fa’ailoa mai e fesoasoani lava le vasega o sui tuai sa tutula’i mai tofiga nei i sui fou ua soloa’i mai e fa’atautaia tiute mo le Asosi a le VFW [Vetereni o Taua]. O le tele o latou auaunaga e ao ina feso’ota’i lelei lava le tatou Asosi Fa’alotoifale a le Vetereni o Taua, ma le Asosi Fa’amalumalu a le Setete o Hawaii i mea uma.
O le ali’i Ofisa Sinia o nei feso’ota’iga ua umia lea e le susuga State Adjudant & Quarter Master Nobert Enos, lea fo’i sa malaga mai e molimauina le suiga o tofiga ma lona faletua o Jerry Nobert.
I tofiga ua mae’a tofia nei mo Amerika Samoa VFW, ua tofia ai le susuga Robert Toelupe e avea ma Local Commander ae o lona afafine Ms Toelupe, ua tula’i mai o le Women’s Auxillary President.
O le taualuga o le afiafi, sa matua sausaunoa ai sui tofia fou mai Hawaii e sami ai le fa’atasiga. Sa iloga fo’i le matagofie o lea taualuga fa’asamoa sa alofaiva i ai le susuga Lt. Lane G.Martin - VFW State Commander ma le tina o Vai Fetuesi State Auxillary President.
SIKOLASIPI FANAU A’OGA MAUALULUGA TO’A 4 MAI DOI
E to’afa le fanau a’oga ua tauaaoina i ai avanoa fa’asikolasipi a le Matagaluega o le Initeria a le fetarale ona ua iloga le aga’i i luma o latou galuega fa’atino i a latou mea’aoga poo latou togi i mataupu i potu a’oga, ae maise o so’o se polokalama e fa’atautaia mo le fanau a’oga maualuluga i Amerika Samoa.
O lea avanoa matagofie o le a fa’aaogaina e i latou i le vaitaumafanafana o le tausaga a’oga, ma e mafai ona malaga ai i latou e asiasi i iunivesite i Amerika i lalo o le polokalama a le Junior Statesmen Foundation.
O fanau uma e fia auai i lea polokalama e ao ina agava’a i togi i mataupu o tau’avea i le a’oga, fa’atasi ai ma le amio pulea lelei ma le usiusita’i, ae maise ia lava fo’i le sailiga o se vaega o le seleni e tu’ufa’atasia ai le pasese ma le tupe fa’aalu i le nofoaga fa’apea ma feoa’iga mo lea avanoa ia mautu.
Peitai, o i latou nei e to’afa o le a latou fa’agafuaina nei mea uma, aua o lea ua agava’a i lenei sikolasipi. O i latou nei:
Carl Balauro, mai le Fa’asao Marist High School, auai i le JSA Summer School i Stanford.
Ryan deSaulles, mai le Pacific Horizons High School, e auai o ia i le JSA Summer School i Stanford.
Yasminna Sanchez mai Samoana High School, e auai i le JSA Summer School i Stanford.
Karlinna Sanchez, mai le Samoana High School, e auai i le JSA Summer School i Princeton.
Ua ese mai lea vaega ua fa’aopoopo fo’i le isi vaega o fanau a’oga e maua sikolasipi e auai atu ai le 2017 JSA Summer Program, ma o i latou nei e aofia ai: Aitulagi Alofa mai Manumalo Baptist Academy e auai i le JSA Summer School i Stanford. O Tamalii Faga may Fagaitua High ua maua le avanoa sikolasipi e auai i le JSA Summer school i Stanford. Chanel Masunu Fatu mai le Fa’asao Marist High ua maua le sikolasipi a le JSA Summer School i Princeton.
Jaclyn Keil mai le Pacific Horizons ua maua fo’i le avanoa mo le JSA Summer school i Stanford. Sheralyn Leota mai Leone High School ua maua le avanoa mo le JSA Diplomat e malaga ai i Saina. Issei Perelini man Samoana High ua ia maua le avanoa a le JSA Summer School i Stanford. Jerry Sauni mai Fagaitua High ua ia mauaina le avanoa a le JSA Summer School i Standford.
Claudette Save-Lafaele mai Leone High ua mauaina le avanoa a le JSA Summer School i Georgetown. Olivia Ta’ase mai Fagaitua High ua mauaina le avanoa a le JSA Summer School i Stanford. Selina Tuato’o mai Fagaitua High ua mauaina le avanoa a le JSA Summer school i Stanford. Fa’ananea Vimoto mai Fa’asao Marist High ua mauaina le avanoa a le JSA Summer School i Stanford. James Wang mai le Pacific Horizons High ua mauaina le avanoa a le JSA Summer School i Stanford.
Ua fa’ailoa mai ua mae’a sapaia nei le pili o le a’oga, mea’ai ma le nofo ai mo a’oga i le masina e tasi, peita’i, o le pasese e o’o ai lenei tamaititi i le Iunivesite ua fa’ailoa mai, o le a nafa lea ma le tamaititi lava ia, po’o lona aiga fo’i.