E 13 Fautasi ua fa’amaonia mai e le Komiti o Tuuga Fautasi o le Sisiga Fu’a o lenei tausaga, o le a tausinio i le tuuga va’a mo lenei vaiaso.

E pei ona fa’ai’ugafonoina i le fonotaga mulimuli a le Komiti o le Tuuga Fautasi o le fu’a i le vaiaso nei, e 9 Fautasi ua lautogia mo le tuuga tele o le fu’a, ma le tuuga mulimuli mo Fautasi e 4 ua fa’amoemoe e mulimuli ane ai.

E 2 vaega ua vaevaeina i ai le tuuga tele mo Fautasi e 9 ua mae’a ona lautogia, lea e aofia ai le Fetu o le Afiafi, Matasaua, Iseulaolemoana II, Manulele Tausala I ma le Fealofani Samoa III i le tuuga muamua (1st Heat) lea ua fa’amoemoe e amata i le itula e 9:00 i le taeao nei, sosoo mai ai loa ma le vaega lua o le tuuga (2nd Heat) lea e aofia ai le Aeto, Fuao, Paepaeulupoo II ma le Taema II.

O le tuuga mo isi Fautasi e 4 e le o aofia i le tuuga tele ua fa’atulaga e faia i le itula e 9:00 i le taeao o le aso Tofi o le vaiaso nei lea, lea e aofia ai le Sa o le God is Great lea o alo e le afioaga i Pago Pago, i lalo o le ta’ita’iga a le ali’i Kapeteni ia Savaliga Afu, o ia fo’i lea e ana lenei Sa, o le Sa o le Sinapioa lea o lo o alo e fanau aoga mai le Aoga Maualuga i Fagaitua, o le Sa o le Iseulaolemoana I mai Fagatogo, ma le isi Sa o le Manulele Tausala II mai Nu’uuli.

O le mae’a ai o le tuuga mo Fautasi e le o aofia i le tuuga tele o le fu’a, ona fa’atulaga mai ai loa lea o le tuuga e sailia ai le siamupini o le fu’a o lenei tausaga i le taeao lava o le aso Tofi, lea ua fuafua e tausinio ai Sa e 3 pito i luga mai ulua’i tuuga e 2 lea ua fa’amoemoe e faia i le taeao nei.

E pei ona fa’amama e le Komiti o le Tuuga Fautasi o le Fu’a i ali’i va’a faapea ai sui o afioaga sa auai, e le tatau ona fa’atauaina le naunau i le manumalo, ae tatau ona silasila toto’a i le saogalemu o alo ma fanau o le a auai i lenei fa’amoemoe.

Saunoa le afioga i le Maoputasi ia Mauga Tasi Asuega e fa’apea, e le tatau ona toe tula’i mai fa’aletonu sa tula’i mai i tuuga o tausaga ua mavae, e le gata o le fiu o le Komiti e fa’atonutonu ali’i va’a ma a latou Sa i luga o le sami, ae o le tulaga fo’i o le le amanaia o tulafono.

Na toe fa’atepa e Mauga susuga i ali’i va’a ma sui o afioaga i le tulaga fa’aletonu sa tula’i mai i le tuuga fautasi o le fu’a i le tausaga na te’a nei, lea na i’u lava ina leai se tuuga e sailia ai le siamupini, e mafua mai i le tele o fa’aletonu sa tutupu i ulua’i tuuga sa fa’atinoina, ma manatu ai loa le Komiti ina ia taofi le fa’atinoina o le tuuga ae tausi le filemu i le va o afioaga sa tausinio a latou Sa.

“Le mamalu e o afioaga uma o lo o i ai a latou Sa i lenei tausaga mo le fa’amoemoe e Tutuila ma Manu’a, aua ne’i naunau i le i’a ae ma’imau ai le upega, silasila i le ta’uleleia ma le manuia o nai o tatou tagata, aemaise fanau o le a fa’atinoina le fa’amoemoe mo le tuuga fautasi o lenei tausaga, ia manuia le tuuga fautasi, ia manuia fo’i le sisiga fu’a a Tutuila ma Manu’a”, o le saunoaga lea a le afioga i le Maoputasi ia Mauga.

E pei ona manino i le polokalame a le Komiti o le Fu’a, e le o i ai se Sa mai Samoa mo le tuuga o lenei tausaga, se’i vagana ai lava Sa mai afioaga eseese i totonu o le atunu’u.

E pei ona silafia e le atunu’u, o le aso Gafua o le vaiaso lenei na amata aloaia ai polokalame eseese mo le fa’amanatuina o le 117 tausaga, talu ona sisi le fu’a a le Iunaite Setete i laufanua o Amerika Samoa, e ala i fa’aaliga o oloa a le aufai pisinisi, fa’aaliga a le aufai fa’atoaga atoa ai ma fa’afiafiaga eseese o loo fa’agasolo i le malae o le Su’iga’ula a le Atuvasa i Utulei.