Ads by Google Ads by Google

Aisea ua tele ai fa’asea aufai fa’atoaga atunu’u polokalame School Lunch


Le fa’atonusili o le Ofisa o Fa’atoaga ia Filifa’atali Michael Fuiava ma le Faatonusili o le Ofisa e Pulea Oloa a le malo ia Dr. Oreta Mapu-Crichton [ata AF]
ausage@samoanews.com

O le fesili pe aisea ua tele ai fa’asea a le aufai fa’atoaga a le atunu’u i auala o loo fa’agasolo ai gaioiga o le polokalame a le School Lunch, o se fesili lea sa taumafai i ai afioga i Faipule fa’apea ai Fa’atonusili o Ofisa a le malo o loo galulue i le polokalame a le School Lunch e tau tali i le taeao ananafi, i le taimi o le iloiloga sa valaauina e tau fa’amanino ai lenei fa’afitauli.

 

O le autu o le iloiloga lea sa fa’atautaia e le afioga Su’a Alexander Eli Jennings o le taitaifono o le Komiti o Fa’atoaga a le maota o sui, o le taumafai lea e fa’amanino le mafua’aga ua tele ai fa’asea a le aufai fa’atoaga i le auala o loo fa’agasolo ai tauofoga mo le polokalame a le School Lunch.

 

Ina ua fesiligia e le afioga i le tama’ita’i faipule ia Vui Florence Saulo le mafua’aga ua tele ai fa’asea a le aufai fa’atoaga, na saunoa ai le Faatonusili o le Ofisa e Pulea Oloa a le malo ia Dr. Oreta Mapu-Crichton e fa’apea, o le fesili fo’i lena o loo tu’u fesili ai lona Ofisa, pe aisea ua tele ai fa’asea a le aufai fa’atoaga.

 

“Ua tele tausaga o tu’i pea la matou ofisa i fa’asea mai ni isi o le aufai fa’atoaga, ae le o taofia ai lava lo matou taumafai e fesoasoani ia te i latou”, o le saunoaga lea a Dr. Crichton.

 

Na toe fesiligia e Vui le tulaga ua i ai fa’atoaga sa taofia ina ua masalomia e le o saogalemu mo le fofoga taumafai, ae na fa’aalia e le Faatonusili o le Ofisa o Fa’atoaga ia Filifa’atali Michael Fuiava e fa’apea, o loo galulue pea lona Ofisa e fa’aleleia tulaga e pei ona fa’aletonu, ina ia mafai ai ona saogalemu le fofoga taumafa a le atunu’u.

 

Na taua e le afioga i le alii faipule ia Gafatasi Afalava e fa’apea, atonu o le isi mafua’aga ua ala ai ona tele le fa’asea mai ni isi o le aufai fa’atoaga, ona ua ese le auala lea ua faatautaia ai polokalame a le School Lunch, ae na faamanino e Dr. Crichton e faapea, o ta’iala o loo tuuina mai e le Ofisa a le feterale o loo faatupeina polokalame a le School Lunch, lea ua mafua ai ona faia tauofoga mo le aufai fa’atoaga.

 

O Asosi a le aufai fa’atoaga ua i ai i le taimi nei, o le isi lea mataupu sa saunoa Afalava atonu ua mafua ai le vevesi, ona ua fao uma e Asosi nei le avanoa sa tatau ai ona fua fa’aeleeleaga a le aufai fa’atoaga, peita’i na fa’amanino e Dr. Crichton e fa’apea, tusa lava pe tele Asosi a le aufai fa’atoaga o loo i ai, o loo maua lava le avanoa o le tagata fai fa’atoaga ta’ito’atasi e fa’aulu ai lona suafa mo le tauofoga, peita’i o le fa’afitauli o loo maitauina, ua avea le augatata o ni isi o le aufai fa’atoaga e faatumu pepa e manaomia mo tauofoga ma isi lava galuega laiti, ma auala ua latou filifili ai avea le Asosi a le aufai fa’atoaga ma o latou sui, mulimuli ane ona toe muimui lea ma fa’asea ae o le filifiliga lava sa latou faia.

 

I le tulaga o le lisi a le aufai faatoaga e agava’a mo le tauofoga, e muamua ona faamaonia e le Ofisa o Fa’atoaga ona faatoa mafai lea ona talia e le Ofisa o le Procurement, e pei ona faamaonia e Dr. Crichton, ae o suafa uma e le o i totonu o le lisi a le aufai faatoaga, e fesiligia ma suesueina.

 

Na faamanino e le Faatonusili o Aoga ia Dr. Ruth Matagi-Tofiga i luma o le komiti le faaitiitia o le tupe ua tuuina atu mo le aufai faatoaga i lalo o le polokalame a le School Lunch, mai le aofaiga e $2 miliona i le tausaga tupe na te’a nei i le $1 miliona mo le tausaga tupe lenei.

 

O le tupe atoa o loo maua e le School Lunch mai le Ofisa o Faatoaga a le malo tele (USDA) e $12.4 miliona, lea ua fa’amatu’u le $1 miliona mo le fua o fa’atoaga a le aufai fa’atoaga a le atunu’u, ae o le isi $11.4 miliona o loo alu i isi taumafa i totonu lava o le polokalame.