Ads by Google Ads by Google

Fa’alauiloa galuega mo le toe fa’aleleia uafu o va’a fagota alia i Fagatogo


Se vaaiga i le uafu e taula ai va’a fagota alia ma va’a faila i le Malaloa. [ata AF]
ausage@samoanews.com

O se tasi o vaega o le ripoti mai le Matagaluega o le Puipuiga o le Vaomatua ma le Gataifale a le malo (DMWR), lea ua tu’uina atu i le fonotaga lona 169 a le Komiti o Faiga Faiva i le Pasefika i le fa’aiuga o le masina lenei o Mati, o lo o taua ai e le Fa’atonusili o le Matagaluega ia Va’amua Henry Sesepasara le tele o atina’e ua fuafua le Matagaluega e fa’atino, ina ia si’itia ai tulaga o faiga faiva i totonu o le atunu’u, aemaise lava i faiga faiva mo va’a fagota alia.

 

Talu ona mae’a mai le galulolo lea na pagatia ai Amerika Samoa i le masina o Setema 2009, sa tele ina fa’aleagaina ai ni isi o vaega o le uafu mo va’a fagota alia i Fagatogo, ma mana’omia ai loa e le DMWR se vaega tupe fesoasoani mai le Ofisa o Faiga Faiva a le feterale e fesoasoani ai i le toe fa’aleleia o lea vaega mo le fa’aauauina lea o atina’e tau faiga faiva i Amerika Samoa.

 

O lo o fa’agasolo pea i le taimi nei galuega mo le toe fa’aleleia o le uafu mo va’a fagota alia, e aofia ai le mana’omia lea o se pemita mai Inisinia a le Army Corps e fa’ataga ai le fausiaina o le galuega, ona o loo fausia le galuega i luga o se vaega loloto o le sami.

 

O ni isi o galuega fa’aleleia mo le si’itia lava lea i luga o atina’e tau i faiga faiva mo va’a alia e aofia ai le toe fa’afouina o le vaega savali lea e opeopea i luga o le sami, e fa’aaoga e taula i ai va’a alia ina ia mautinoa e fa’alautele ona ua maitauina le tele o va’a fagota alia ua lesitalaina i totonu o le atunu’u i le taimi nei.

 

I tulaga mo le toe lipeaina o va’a fagota alia, o loo fa’agasolo i le taimi nei i le itumalo o Manu’a lenei galuega tele, i lalo o le fesoasoani o le vaega tupe sa maua mai mo le toe fa’aleleia o vaega sa fa’aleagaina i fa’alavelave fa’alenatura, ina ia mautinoa e tele ni va’a fagota alia e mafai ona lesitala ma fa’aaoga mo faiga faiva.

 

Ua i ai fo’i se maliliega i le va o le Fa’atonusili ia Va’amua ma le afioga i le ali’i kovana ia Lolo Matalasi Moliga, ina ia i ai se tagata inisinia faapitoa e galue i Manu’a mo le toe fa’aleleia o vaega o va’a alia e moomia le toe fa’aleleia, e aofia ai le toe fa’atauina mai o vaega e moomia ona fa’aleleia mo va’a uma nei.

 

O le agaga atoa o lenei taumafaiga e pei ona taua i le ripoti, ina ia mafai ona toe fa’aleleia le atina’e o faiga faiva e fa’aaoga ai va’a fagota alia i totonu atoa o Amerika Samoa.