FA’ASALA VA’A FAGOTA ‘YIE SHENG WANG’ - LE SA’O SISIGA FU’A AS

O le aso ananafi sa va’aia ai e le to’atele le sau i totonu o le va’a, ae ua toe fo’i atu i fafo mai le uafu isi va’a.  Sa fa’ailoa mai e Harbor Master Silila Patane, e fa’apea “O lena ua toe tuli atu i fafo se’i mua’i tapena fa’amaumauga o le sala e ao ina fa’ao’o i ai, ona e sau mai tai, e va’ai mamao atu lava i le agiagia mai o le Fu’a a le Malo o Amerika Samoa o loo u i lalo le itu e ao ina pito i luga. A le faia le fa’asalaga, e le mafai fo’i ona usiusita’i i taimi uma, ma ave le latou fa’amuamua e va’ai toto’a i tulafono tamau mo so’o se va’a e fia ulufale mai e taula i le uafu tele i Fagatogo.”

O le kamupani e ona lea va’a, o le Blue Angels, ma ua o’o fo’i se vala’au aloaia i lea Kamupani, pe aisea lava o latou va’a i’a e ulufale mai, a le fa’alogo gata i fa’atonuga e fa’auia atu i uaealesi poo leitio, e sese mai mea patino e ao ina mua’i iloa lelei e kapeteni ma latou Sifi Inisinia, ina ia le taofia i latou mai le ulufale mai, pe fa’asala fo’i i le taimi e to’ai taunu’u ai i le uafu.

“Ua latalata ina fa’ao’o se sala i le Kamupani Va’a lea e tautuaina nei va’a fagota, ae o le mea e tau avatu nei lava, o lo’o iloa lelei le vaivai ma le fia malolo lelei o nai ‘auva’a, ae sasi fa’apea le Kapeteni ma le au Ofisa o fa’afoea nei va’a, e le tatau ona ta’a’alo fa’apea i mea e le tatau ona sasi ai. Ia ave le fa’amuamua i tulafono tamau nei e mafai ai ona ululale ma le saogalemu,” o se isi lea fanoga ua fa’aalia mai e Patane mo le silafia a le vasega o kamupani va’a.

O le umi lea ua tuu i ai, masalo fa’ato’a mafai ona toe fa’aulu mai i totonu i le aso lea va’a, ua atoa lelei ai le 24 itula o le fa’asalaga, ma o lo’o faia lava nei fa’asalaga e tusa ma ala o tulafono sa solituina.

TAOA - SO’OFA’ATASI OFISA TURISI & LAUFANUA FA’ASAO

Ua matua toe fa’aleleia atoatoa le sootaga lelei a le TAOA (Ofisa o Tagata Matutua) ma le Ofisa o Turisi ae maise o le National Park of American Samoa ina ia avea ai le nofoaga tumau o le TAOA ma se isi nofoaga matagofie e tu ai pasi o la’uina ai turisi tafafao mai e ala i Meli tetele e ulufale mai i le teritori.

O lea so’otaga ua fa’amalosia a’ia’i ai le vasega o tina ma tama matutua, ina ia latou fa’atino a latou matafaioi lea ua totogia ai i latou e le SCEP “Senior Citizens Employment Program” o le lalaga o fala, ili, pulou, ma isi oloa taulima, fa’apea ai ma le gaosiga o le elei Samoa e fa’aaoga ai Upeti o taina mai e tama o lo’o galulue fo’i i lena itu o le polokalama.

O lo ua fa’atauina fo’i oloa uma nei o gasoia e i latou i le latou faleoloa o mea taulima o lo’o i ai i le nofoaga lava i Pago Pago. O lea faleoloa e maua ai Pate mo le kirikiti ae maise o pulou e aoga mo ta’aloga ma le faia o galuega i le la, o taga solovae matagofie ona lamanu e gaosia mai ‘ie’ie o suisuiga, o ula felanulanua’i fulumoa pe o gasia fo’i i le voulu ma ie eseese.

O lo’o fa’atautau ina ai galuega mai le ‘au ta fa’atagata, o To’oto’o fa’afaleupolu ma to’oto’o mo tama ma tina matutua ua mo’omia e savavali ai. O Tanoa ma auupega teuteufale ua matua fa’atumulia ai lea faleoloa e ao ina maimoaina e le mamalu lautele o saunia meaalofa mo tagata i fafo po’o nisi fo’i o le a masii atu mai le atunu’u e avea ma fa’amanatu lelei o le latou alaala ai iinei.

O lo ua toe fa’aolaola lelei mai le latou fa’aili ma e pepese ma ta pese fa’asamoa moni i aso ua leva, i taimi o meli ma fa’afiafiaga e mo’omia ai se fa’aili. Ua tapena i latou, ina nei vala’auina fo’i mo fa’afiafiaga i aiga. O nei mea uma,o tupe e maua mai ai, e toe fo’i i totonu o le polokalama lea o fa’afaigaluegaina ai le vasega o tagata matutua, o loo mo’omia ona fa’alava latou kuata mo le maua ai o latou saogalemu.