O le ave ta’avale o le ta’avale lea o lo o tu’uaia na taia ai le Tina matua lea na maliu mai i Pago Pago i le vaiaso na te’a nei, o le taeao ananafi na faila ai e le malo moliaga tau ta’avale afi e 3 fa’asaga ia te ia, lea e aofia ai moliaga mama e 2 ma le moliaga mamafa e tasi.

O moliaga e pei ona tu’uaia ai e le malo le Tama matua ia Solomona Tuia e aofia ai le moliaga mamafa o lona fa’afoeina o se ta’avale ua mafua ai ona oo le maliu i se isi tagata, o se solitulafono D i le fa’atulagaina o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua, atoa ai ma moliaga mama e lua o le ave ta’avale ta’atamala atoa ai ma le fa’atamala lea e fa’aleleia taofi o lana ta’avale.

O le itula e 8:30 i le taeao nei lea ua fa’atulaga e toe tula’i ai Tuia i luma o le fa’amasinoga fa’aitumalo, mo le fa’atulagaina lea o se aso e faia ai le ulua’i iloiloga o lana mataupu.

E $5,000 le vaega tupe lea ua fa’atulaga e tatala ai Tuia i tua, ma ua taofia nei o ia i le toese i Tafuna e fa’atali ai le taimi e mafai ai ona totogi lea vaega tupe ma tatalaina ai o ia i tua mai le toese i Tafuna, e fa’atalitali ai taumalumaga o lana mataupu.

Afai ae mafai ona tatala o ia i tua, ua poloaina e le fa’amasinoga le fa’asa lea ona ia toe fa’afoeina se ta’avale, fa’asa ona ia toe soli se tulafono a le malo, a ia avea o ia ma tagatanu’u lelei e tausisi i tulafono uma a le malo i soo se taimi.

O le fa’alavelave e pei ona tu’uaia ai e le malo ia Tuia na alia’e mai i le taeao o le aso Lulu o le vaiaso na te’a nei i le afioaga i Pago Pago, i le taimi ao fa’agasolo ai sauniga o se maliu i le malumalu o le Ekalesia Metotisi i Pago Pago lava.

I fa’amaumauga a le fa’amasinoga o loo taua ai e fa’apea, o le ta’avale sa fa’afoe e Tuia sa sau mai le auala mai Fagasa e aga’i mai i lalo, ae o le Tina ua maliu sa i tua o ia o le pasi, ma o se tulaga fa’aletonu i taofi o le ta’avale na mafua ai loa ona tula’i mai le fa’alavelave, lea na so’a ai le Tina na a’afia ma fa’anatinati atu ai i le falema’i i Faga’alu mo togafitiga, ma i’u ai lona soifua i le aso na sosoo ai.