Ads by Google Ads by Google

Tala otooto o Fa’amasinoga

ausage@samoanews.com

DANNY MIKA

 

E toe tasi le avanoa lea ua tu’u e le fa’amasinoga maualuga i le ali’i o Danny Mika e usita’i ai i tuutuuga o loo tatala ai o ia i tua, ma, afai ae toe tuai atu i le isi ana iloiloga lea o loo sosoo nei, ona se’i loa lea e le fa’amasinoga le $5,000 lea na totogi e le tausoga a lona to’alua ia Duke Vele e tatala ai o ia, ae poloaina loa le toe taofia o ia i le toese i Tafuna e fa’atalitali ai se fa’aiuga o lana mataupu o loo fa’agasolo i luma o le fa’amasinoga maualuga i le taimi nei.

 

I le iloiloga a Mika i le aso Faraile na te’a nei, lea fo’i na fa’atasi atu ai ma le susuga a Vele, na fa’ailoa ai e le fa’amasinoga ia Vele le tulaga e oo i ai lana $5,000 o loo tatala ai i tua Mika, pe afai e toe i ai se isi taimi e tuai atu ai Mika i taimi o ana iloiloga.

 

Na taua e Vele i le fa’amasinoga ina ua fesiligia o ia, o le mafua’aga na ia totogiina ai le tupe e tatala ai Mika i tua, ona e fa’aipoipo le ua molia i lona tausoga, peita’i na fa’ailoa e le afioga i le fa’amasino sili ia Michael Kruse ia Vele e fa’apea, ua fa’alua ona tuai Mika i ana iloiloga i luma o le fa’amasinoga, ma o se tulaga taua fo’i lea e ao ona ia silafia, o loo ia totogiina sana vaega tupe tele e tatala ai se tagata e le o fa’amaoni i poloaiga a le fa’amasinoga.

 

“O le aano moni o le iloiloga i le taeao lenei (taeao o le aso Faraile na te’a nei), o le fa’ailoa atu lea i lau susuga le tulaga e oo i ai lau tupe pe afai ae toe tuai mai Mika i le fa’amasinoga i se isi lava taimi, o le a se’i e le fa’amasinoga lau tupe e $5,000 ae ave i le malo, o loo mumu le malo, atonu o loo latou mana’omia lau tupe i le taimi nei”, o le saunoaga lea a Kruse ia Vele na vaaia ai le tali e o ni isi sa i totonu o le potu fa’amasino e aofia ai ma loia, lea fo’i na malie i ai le susuga a Vele.

 

O le masina o Aperila lea ua toe tolopo i ai le mataupu a Mika, lea o loo tu’uaia e le malo i le moliaga mamafa o lona umia fa’asolitulafono lea o vaega o le pauta fa’asaina o le aisa.

 

MALIEO MAUI

 

O le aso 16 Mati lea ua toe tolopo i ai le ulua’i iloiloga a le ali’i o Malieo Maui i luma o le fa’amasinoga, e fuafua i ai se fa’aiuga pe fa’amaonia tu’uaiga o lona le usita’i lea o poloaiga a le fa’amasinoga maualuga sa tu’uina atu ia te ia.

 

O se tasi o tuutuuga o le nofovaavaaia e 5 tausaga a Maui na tu’uina atu e le fa’amasinoga maualuga i le 2013, o le avea lea o ia ma tagatanu’u e tausi i tulafono a le malo, aua fo’i ne’i ona toe soli se tulafono.

 

I le masina na te’a nei, na toe a’afia ai Maui i le tulafono ina ua tu’uaia o ia e le malo i le moliaga o le fa’atupu vevesi i nofoaga faitele, lea e pei ona i ai lana mataupu o loo fa’agasolo i luma o le fa’amasinoga fa’aitumalo i le taimi nei.

 

Afai ae mae’a le mataupu a Maui o loo i luma o le fa’amasinoga fa’aitumalo i le aso 10 Mati, ona toe valaau loa lea o lana mataupu i luma o le fa’amasinoga maualuga i le aso 16 Mati, ma iloilo ai loa se fa’aiuga fa’asaga i tu’uaiga o lona le usita’i lea o tuutuuga o lana nofovaavaaia.

 

O lo o taofia pea Maui i le toese i Tafuna e fa’atali ai taualumaga o lana mataupu lea o loo fa’agasolo i luma o le fa’amasinoga i le taimi nei.