FA’AU’U NISI ALO AMERIKA SAMOA I FORT LEE

O le aso Tofi na te’a nei ua maua ai se isi tala fiafia ina ua mae’a fa’au’uga o nisi o alo o le atunu’u i le AIT i le nofoaga o le US Army i Fort Lee. O i latou nei e aofia ai PFC Angelina Lafaele, PVT Lili’a Tauatagaloa ma PVT Abby Seumanutafa.

Sa auai atu le susuga Liu Lafaele mo lona alo, ae fa’apea fo’i le tama’ita’i o Milaita Seumanutafa mo lona fo’i alo tama’ita’i fa’apea ai ma le tina o Lusia Fiapa’i. O lea sauniga sa faia lea i le Quartermaster Museum i Fort Lee, Virginia March 02, 2017.

AVANOA SIKOLASIPI MC DONALDS-AMERIKA SAMOA

Ua fa’alauilo e le Kamupani a le McDonalds American Samoa avanoa fa’asikolasipi ua mafai ona talosaga atu i ai le fanau a’oga mo le Kolisi Tu’ufa’atasi a Amerika Samoa, po’o nisi fo’i o lo’o fia a’o’oga i fafo i Kolisi po’o Iunivesite i le tausaga a’oga fou.

E mafai ona piki pepa fa’atumu e fa’atalosaga ai lea avanoa mai le Ofisa autu o le McDonalds i Nuuuli e afua lea i le Gafua, Mati 6, ae fa’amuta talosaga i le aso 28 Aperila i le itula e 4:00 i le afiafi. Pe afai e i ai nisi mea e fia fa’afesiligia ai e le fanau a’oga aiaiga uma o lenei sikolasipi, fa’afeso’ota’i le tama’ita’i o Silika Vai Tui i le telefoni numera 699-8699. O iina o le a fa’amatala atu ai ituaiga togi o lo’o mo’omia mo le fanau talosaga, po’o le a fo’i le umi e mafai ona e toe talosaga ai i lenei lava fa’atupega, pe afai e tumau pea le lelei o au aoga.

11 AOGA - LEAI NI TIA’I AOGA A FAIA’OGA

Mai le 29 o aoga maualuga ma aoga tulaga muamua a le malo, e na’o le 11 aoga ua lautogia nisi o latou faia’oga i le maka lelei, “Leai se Tia’i A’oga” i le masina o Fepuari 2017.

O se tima’iga fou lea ua taumafai le matagaluega o A’oga ina ia ausia ma fa’amau fa’ailogaina, ia le tia’i aoga faia’oga o le matagaluega.

E matati’a silia faia’oga o Manulele, Lupelele ma Tafuna Elementary i le toalete o latou faia’oga e le’i maka o latou suafa i se tia’i a’öga i lea masina. A toe tuu atu fo’i i le masina ua te’a, sa fa’apena fo’i na tauva a’oga nei e lua i lea i lava mea.

Ona soso’o mai ai lea o Coleman Elementary, Matafao Elementary, ae oo mai ai loa ma Leone High ma Leone Midkiff. Matagofie le oso mai a le a’oga maualuga lava lea e tasi, ae ua iloga fo’i le sau a Alataua Lua, Siliaga Elementary ma Faleasao Elementary mai Manu’atele. O le a’oga i Aunuu AP Lutai e na’o le lua faiaoga ua ausia lea tulaga ma le a’oga i Masefau e to’atasi lava ua faitaulia ai i latou i lenei tauvaga lelei.

O le taumafaiga, ia solomua i faia’oga ona fa’ataua le auai i le a’oga, ia fa’ata’ita’i atu fo’i le fanau a’oga, ona o lou tinou i le a’oa’oina o fanau a le atunu’u. I le taimi nei i le matagaluega, e le o i ai ni faia’oga ua fa’afaigaluega i le tulaga lea, a leai se faia’oga i se aso, ona tula’i mai lea o sui faiaoga nei e tau’ave le vasega. O lona uiga, e leai se vasega lava e tasi e mafai ona soso’o a latou mataupu sa talanoaina ma aoao ai pe afai o le a le faigaluega se faia’oga a le fanau.

“E lelei la pe a ta’itasi pe ta’ilua aso o le faigaluega se faia’oga, ae ua i ai potu aoga ua le faigaluega faia’oga i le lua vaiaso atoa. O le a se mea e tupu i nei vasega ua misia? O le fesili fa’alemafaufau lea e ao ina tatou talia,” o se tasi lea o tautalaga sa pa’u i le a’ai o finaglo o faia’oga fou fa’ato’a mae’a ona a’otauina fa’apitoa e le Teacher Quality ma le OCI i le vaiaso ua te’a, ma sa iloga ona mafaufau loloto i ai le vasega o faia’oga, ina ia taua ia i latou a’oga a le fanau o lo’o i lona potu a’oga.

E ese mai lea lisi, e to’asefulu faia’oga ua lisia o Faia’oga o le Masina: Miracle Sene mai le Manuelle Elementary; Toetau Leaupepe mai le Alataua 2; Liz Taylor-Taliloa mai Tafuna Elementary; Lionel Vaitautolu mai le Faleasao Elementary; Julieta Togia mai le AP Lutai Elementary; Kilisitina Maui’a mai le Lupelele Elementary; Tele’a Fa’aloua mai le Leone High; Arianne Fae Torres mai le Nuuuli VocTech; Emele Mika mai le Siliaga Elementary ma Taumaloto Moliga mai le Matafao Elementary. Ia fa’amalo lava le fai o le faiva.