Ads by Google Ads by Google

Onosa’i I Mea Tiga

Vaega: 63

 

Alo maia, o le a toe fa’auau atu la tatou tala mo lenei aso. Na muta mai la tatou tala, ina ua fai nei le fetufa’aiga a Mose, Malia ma le la fanau, a’o lea la ua i ai ma le lo’omatua o Lonisi. Fai mai le tala, o le taimi atoa a’o i ai Lonisi i le fale o Mose ma Malia, e le o iloa e le lo’omatua se mea e tasi. O lea lava e fai le la fale talatala ma Malia, ae o lo’o fa’asolosolo pea le talanoaga a Mose, Lefefe ma Vesi.

 

O Lilo i lea taimi atoa talu ona fo’i ane, fai mai, ua fai ma avega mamafa i le tama, ua pei lava ua le toe maua e Lilo se fiafia i lea taimi. Ae ua tu’u fesilisili nei i lona mafaufau, po’o le a le uiga o nei mea ua tutupu mai ia te ia. Sa mamao lava ma lona mafaufau ia ni tulaga fa’apea e ono tutupu mai, a’o lea ua foliga mai, ua i ai le mea ua mamafa ai lona loto ma lona mafaufau.

 

O le mea ua tupu, ua fa’asolo nei mafaufauga o Lilo, pe o le a lava le mea ua ‘ina’ina ai le tina o Loleta ina ia fai loa le fa’aipoipoga, ae po’o le a fo’i lona mafua’aga. E le i maua se malologa a le tama i le po atoa, ua na o le pupula to’a a’e nei i ‘aso o le faleo’o lea o lo’o nofo ai.

 

Fai mai, na fa’asolo fa’asolo lava mafaufauga o Lilo, te’i lava ua tai lona mafaufau e fa’apea, ai po’o i ai se isi tama, ua iloa e le lo’omatua o Susitina, o lo’o feoa’i ma lana tama, a le o le na fo’i, ai ua naunau le lo’omatua e fai loa le fa’aipoipoga, ona ua va’ai le lo’omatua e le o ia o se tagata fa’ata’atia.

 

Na i ai nei le manatu o Lilo, se ia aulia le aso e soso’o ai pe a fetaui ma Loleta i le fale faigaluega ona ia talanoa lelei lava lea i ai, ina ia ona mautinoa ai, ma ona iloa le mea e ao ona fai. O lea fo’i, ua amata ona vevesi ona matua, ona o le tulaga ua o’o i ai le fa’amalamalamaga lea na alu nei, ae ua mana’o le tina o Loleta e fai loa le fa’aipoipoga. Na fa’asolo fa’asolo lava mafaufauga o Lilo, na i’u lava ina lagona ai le vaivai, ma ua moe gapepe ai loa.

 

O le taimi lea, o lo’o fai pea le talatalanoaga a Malia ma le lo’omatua o Lonisi, ae maise fo’i o Moe, Lefefe ma Vesi. Ae ua fai le malologa a le tama’ita’i o Filipina. Ua momoe uma ai lava  ma le teine o Luisa ma lana fanau i le fale o ona matua i lea po. Fai mai, a fai fai  tala a lo’omatutua, fa’alogo mai Mose, ua alu atu le tali e. Ua iloa lelei fo’i e le toeaina, le mea o lo’o talanoa a Malia ma Lonisi, ai fo’i o tala o si toeaina o Lefefe lea ua fai nei.

 

Ua talatalanoa nei Mose ma Lefefe, e sili pe a fai ia se feiloa’i a Malia, Mose, Susitina ma Falaniko, e tusa ai ma le mataupu ua i ai nei, ina ia maua ai se tonu lelei aua Lilo. O le mea ua tupu, e alofa lava le toeaina o Lefefe i le tama o Lilo, o le mea fo’i lea ua ia naunau ane ai i a Mose, e sili pe a fai se feiloa’i a latou ma matua o Loleta, e iloa ai po’o fea le lelei, a’o fea le leaga.

 

Ua fai le tonu lea ma ua amata fo’i ona fuafua le aso e fai ai le feiloa’i, ae manatua, e le o iloa mai e le lo’omatua o Malia le tonu lea ua fai nei, o lea lava e alu lalo o le isu a lo’omatutua, la te le o iloa se mea o tupu.

 

Fai mai le tala, e ui lava ina ua moe le tama o Lilo, ae o lo’o manatua pea e Lilo mea uma. Na ona vivini lava o moa ta’aloa, te’i a’e loa i luga ma le tama, ua toe nofonofo, ae tau loa ma ona mafaufauga, “Oi ta fe fe le Ali’i e, pei lava ua ma’i tagata Loleta, fua i le mana’o o lona tina ia ma nonofo loa.”

 

E fai apea...