Ads by Google Ads by Google

Toe falepuipui tagata faigaluega Fono i lona fa’aaoga fualaau fa’asaina


[ata: archive]
ausage@samoanews.com

O se ali’i e faigaluega i le Fono Faitulafono lea na ta’usala e le fa’amasinoga maualuga i le moliaga mamafa o le ave ta’avale ‘ona, lea na mafua ai ona maliu se tagata i le 2014, ua poloaina e le fa’amasinoga le toe taofia o ia i le toese mo le 8 masina, ina ua fa’amaonia lona fa’aaogaina o vaega o le pauta fa’asaina o le aisa.

 

O le masina o Oketopa 2014 na fa’asala ai e le fa’amasinoga maualuga le susuga a Perenise Taala e taofia i le falepuipui mo le 5 tausaga, ina ua fa’amaonia le moliaga mamafa o le ave ta’avale ‘ona ua mafua ai ona oo le maliu i se isi tagata, ae talu ai o itu lelei sa maitauina e le fa’amasinoga i le ali’i ua molia, na fa’amalumalu ai loa lona tuliina o le fa’asalaga fa’a falepuipui e 5 tausaga, ae ua manatu le fa’amasinoga o le a fa’anofovaavaaia o ia mo lea umi i lalo o tuutuuga e ao ona ia usita’i i ai.

 

O ni isi o tuutuuga o le nofovaavaaia e aofia ai lona totogiina o le salatupe e $2,000, auai i ni aoaoga fa’a faufautua e fesoasoani ai i a’afiaga o le ‘ava malosi ma fualaau fa’asaina, atoa ai ma lona tuliina o masina e 20 i le toese i Tafuna.

 

E na o le 12 masina na tuli e Taala ae tatala loa o ia i tua, ma le tuutuuga o le a fa’amalumalu le isi 8 masina o loo totoe o lana fa’asalaga, fuafua lava i lona usitaia o poloaiga o lana nofovaavaaia.

 

O isi tuutuuga o lana nofovaavaaia e aofia ai le fa’asa lea ona ia toe tagofia le ‘ava malosi poo fualaau fa’asaina, o le a mafai ona su’eina lona tino ina ia fa’amaonia ai na te le o tagofia fualaau fa’asaina poo le ‘ava malosi, ma ia fa’atasi i le masina ona alu e vaai le Ofisa Fa’anofovaavaaia.

 

I le aso 9 Fepuari o le tausaga nei ina ua alu Taala e vaai le Ofisa Fa’anofovaavaaia, na faia ai loa e sui o lea Ofisa se suega i lona tino ina ia fa’amaonia ai na te le o tagofia fualaau fa’asaina poo le ‘ava malosi, ae i le fa’aiuga o lea suega sa faia, na fa’amaonia ai le maua i lona tino o le vaailaau o loo i totonu o le pauta oona o le aisa, ma poloaina ai loa le toe taofia o ia i le toese i Tafuna.

 

I lana iloiloga i le aso 15 Fepuari, na fa’amaonia ai Taala i le fa’amasinoga lona fa’aaogaina o le pauta oona o le aisa, ma ua atagia mai ai lona le usitaia o tuutuuga o lana nofovaavaaia.

 

A o lei tu’uina atu le fa’aiuga a le fa’amasinoga maualuga i le taeao ananafi fa’asaga ia Taala, na fa’atoese le ua molia i luma o ali’i fa’amasino e tusa ai o lona le usita’i i tuutuuga o lana nofovaavaaia, ma ia talosagaina ai se isi avanoa mo ia se’i toe fo’i atu ai i tua i lona aiga, fa’atasi ai ma lana ta’utinoga na te le toe solia se isi lava tuutuuga o lana nofovaavaaia i le lumana’i.

 

Na fa’ailoa atili e Taala i le fa’amasinoga e fa’apea, o vaiaso e 3 lea na taofia ai o ia i le toese i Tafuna e fa’atali ai se faaiuga o lana mataupu, ua ia a’oa’oina mai ai se lesona taua mo lona olaga, ma ua ia lagona ai lona salamo moni e tusa ai o lana solitulafono sa faia.

 

Na tuu fa’atasi le loia a le malo ia Bob Pickett ma le loia fautua a Taala ia Douglas Fiaui e finau i le fa’amasinoga, ina ia talia le fautuaga o loo i totonu o le ripoti a le Ofisa Fa’anofovaavaaia fa’asaga ia Taala, o le fa’aauau pea lea o lana nofovaavaaia, ae aua ne’i faia se poloaiga e toe taofia ai o ia i le toese.

 

Na taua e Fiaui i luma o le fa’amasinoga e fa’apea, ua mae’a ona ia talanoa i le ua molia e tusa ai i lona fa’atamala e usitaia tuutuuga o lana nofovaavaaia, ae na taua e le loia a le malo e fa’apea, e foliga mai o loo i ai se fa’afitauli tau i le ‘ava malosi ma fualaau fa’asaina ia Taala e tatau ona fesoasoani i ai le fa’amasinoga.

 

Na taua e le afioga i le ali’i fa’amasino ia Elvis P. Patea i lana saunoaga ia Taala e fa’apea, e le o galo i le fa’amasinoga le matuia o le solitulafono lea na ta’usala ai o ia i le 2014 i le ave ta’avale ‘ona ua mafua ai ona maliu se tagata.

 

“E ui i le matuia o le solitulafono na ta’usala oe i le 2014, ae na manatu le fa’amasinoga e tu’u atu le avanoa ia te oe, e ala i le fa’amalumalu lea o le tuliina o le fa’asalaga fa’a falepuipui e 5 tausaga, ae ua lava le 20 masina e taofia ai oe i le toese, o se tasi lea o tuutuuga o lau nofovaavaaia e 5 tausaga”, o le saunoaga lea a Patea.

 

Ae o le tagofia e le ua molia o vaega o le pauta fa’asaina o le aisa, ua atagia mai ai lona le usitaia o tuutuuga o lana nofovaavaaia, ma poloa’ina ai loa Taala na te tuliina masina e 8 o loo totoe mai lana fa’asalaga fa’a falepuipui sa tu’uina atu e le fa’amasinoga.

 

E ui o lea ua taofia Taala i le toese mo le 8 masina, o le a tatala pea lava o ia i tua e faigaluega i lana galuega i le Fono Faitulafono na amata galue mai ai i le 2008, mai le aso Gafua e oo atu i le aso Faraile, mai le itula e 7:00 i le taeao seia oo atu i le itula e 4:00 i le afiafi.

 

O le afioga i le ali’i fa’amasino ia Mamea Sala Jr ma Muasau T. Tafili na lagolago i le afioga a Patea i le iloiloina o le fa’aiuga o le mataupu a Taala.