Ads by Google Ads by Google

Onosa’i I Mea Tiga

Vaega: 54

 

Aalo maia, o le a toe fa’aauau atu la tatou tala. Na muta mai ina ua toe tu’umuli le fa’amalamalamaga a le matai o Lefefe ma le tama o Lilo fa’apea ma le tamaloa o Vesi. O lea ua tau vaovao ai le feoa’i o lima o le lo’omatua o Susitina le tina o Loleta, i le matai o le aiga o Falaniko.

 

Ua le toe tautala le matai o le aiga o Falaniko o Avemaoe, aua o lea ua iloa nei ma ua mautinoa e le matai, ua matua’i ta mau lava i le mafaufau o le lo’omatua, le mana’o ia Lilo ina ia nonofo loa ma lana tama o Loleta. O lea fo’i e tau soso atu lava i ai le toeaina o Falaniko, ae ua le sao se tala a le toeaina, i le sau lea ua sau ai nei le lo’omatua.

 

“Falaniko ma Avemaoe, e le toe suia lava lou mafaufau, o lea fo’i ua nonofo mai si a’u fanau, ma o la’u tala lea o le a fai atu, afai ua oulua le mafaia se mea, afai fo’i e te lua le taliaina lo’u mana’oga, o le a o matou o ma la’u fanau i lo’u aiga, e fai ai le fa’aipoipoga a la’u tama, pau lea, e le toe i ai lava nisi upu, Falaniko, “O lea ua ou iloa atu nei, e leai ni ate o le tou aiga, ae a ou pologa ifo ma o lailai i mea e fai o le tou aiga, fai fa’alavelave so’o toetiti vaiaso uma, o ai e fa’atinoina ia mea uma, o lima a nei, le tou te muimuia ai a’u, o a’u o le fafine nofotane, ae va’ai oe Avemaoe, o le na e te silafia, e gaioi lava le fafine nofotane lenei, e fai mea uma o le tou aiga, e ta fia ola e, “Avemaoe, o lea ua ou iloa atu nei, na o mo mea o ate pili na e feoa’i ma tagata o le tou aiga, a le o le na fo’i, mo mea o ‘ate povi, e ta fe fe e, le lalolagi e, a mea o tumu uma.”

 

Fai mai le tala, e agi lava le afa fulifao a le lo’omatua o Susitina, ma save’u ane le fala o lo’o nofo ai, liliu i le isi itu, tatagi ma le fa’aumu a le lo’omatua, “E fai mai fo’i o le tou aiga e fai mea mafai, a lea, o a mea mafai, pau le mea e mafai e le tou aiga, o le faitatala, loto leaga, ma le tau fa’alata, pau lea, a’o mea fa’apenei, tou te le mafaia.

 

“Falaniko, oka oka e, o mea ia, a, o mea ia e te tali mai ai ma lou aiga i lo’u afuliligi ma lo’u afutoto i aso uma o lo’u malosi sa ou punou ai e fai mea uma o lou aiga.” Ua amata ona tagi le lo’omatua ma fogifogi lona isu, a’o lana fanau tama lea ua saofafa’i ifo nei i talane o lo latou tina, ua leai se isi e toe pisa.

 

O le tama ulumatua o Lolesio, e mo’i lava o ia e ulumatua, ae e vaivai lava lona loto, ma o lona loto ma lona mafaufau, o lona tina. Atonu, e fa’apena lava faiga o lenei olaga, o tama e auau i lo latou tina, a’o teine, e auau i lo latou tama.

 

“E se mea a leaga o mea fa’apenei, ia ua lelei Falaniko, afai lava e te le tautala mai ma fa’ailoa mai le mea o lo’o i ai lou manatu, ua lava lea, o taeao lava, ou te alu ai i lo’u aiga, matou te talanoa ma o’u tuagane, afai lava ua le mafaia e lou aiga ona fai le fa’aipoipoga a la’u tama, ua lava lea, e na o lo ta fia maliu se.”

 

Manatua fo’i, e leai se taimi po’o se avanoa na mafai ai ona fai ane se tala a si toeaina o Falaniko, o le taimi atoa lava, ua fao uma e le lo’omatua, ona o lona naunau ia fai loa le fa’aipoipoga, a’o lea ua lavea atu ai fua ma si toeaina o Falaniko ma le matai o lona aiga, ae maise o le aiga atoa o si toeaina.

 

Na fa’apea mafaufauga o le toeina o Avemaoe, “La lea, la lea, ua na o mea fa’ase’use’u a mea nei e maua i le lo’omatua lenei, ua ma’imau lo’u tausoga o Falaniko i lenei lo’omatua, ai ua va’ai i le lalelei o le tama o Lilomaiava, lea ua mana’o ai lava e nonofo loa ma Loleta, e lota fatu e, pei a malepe.”

 

E faia pea...