Ads by Google Ads by Google

Pasia Va’amua avea ma Fa’atonusili Ofisa Alamanuia Gataifale


Le taimi na ao ai le palota a afioga i Faipule mo le toe pasiaina o Va’amua H. Sesepasara. [ata AF]

Dr. Oreta Crichton, le Fa’atonusili tofia o le Ofisa o Oloa a le malo. [ata AF]
ausage@samoanews.com

Ua aloaia nei le avea o le tofa a Va’amua Henry Sesepasara ma Fa’atonusili fou o le Matagaluega o Alamanuia o le Gataifale ma le Vaomatua a le malo, ina ua fulisia afioga i Faipule e lagolago tofiga a le kovana fa’asaga ia te ia i le palota e 19-0 i le taeao ananafi.

 

O le aso Lua na pasia ai e le maota maualuga le suafa o Va’amua i le palota fulisia e 16-0.

 

E pei ona silafia, na teena e le maota o sui le suafa o Va’amua i le vaiaso na te’a nei i le pelota e 7-10, ina ua mae’a ona fesiligia ona agava’a e le Komiti o Alamanuia o le Gataifale ma le Vaomatua i le vaiaso na te’a nei.

 

I le taimi o folafolaga a le maota o sui i le taeao ananafi, na tula’i ai le afioga i le ali’i faipule mai le afioaga i Pago Pago ia Veevalu Meauta L. Mageo e fa’atula’i le mau, ina ia toe tu’uina mai le suafa o Va’amua i totonu o le maota e toe palota i ai le maota, lea fo’i na fa’aluaina e le maota ma fa’aalia ai loa i le latou palota fulisia.

 

Na fa’afetaia e le afioga i le Fofoga Fetalai o le maota o sui ia Savali Talavou Ale afioga i Faipule, e tusa ai o le tofa manino ua mafai ona latou fa’aalia e ala i le palota fulisia.

 

“E pei ona ou talanoa atu i se taimi ua fano, o le palota o le faitalia lena a le afioga i le sui mamalu, peita’i o le faaiuga lea ua outou faailoa, ua atagia mai ai le matua o le tofa atoa ai ma le fa’autaga loloto o loo i ai i le maota lenei”, o le saunoaga lea a Savali.

 

Na pasia fo’i e le maota o sui i le taeao ananafi le suafa o le tama’ita’i foma’i ia Dr. Oreta Crichton e avea ma Fa’atonusili o le Ofisa o Oloa a le malo, le nofoa sa ia tauaveina mai i le 3 tausaga ua mavae, i le palota e 17-2, i le mae’a ai lea o se iloiloga sa fa’atautaia e le Komiti o Faagaioiga o le malo, lea na ta’ita’ia e le afioga i le ali’i faipule ia Faimealelei Anthony Fu’e Allen.

 

I le maota maualuga, o lo o fa’aaua pea fo’i le pasia e afioga i Senatoa o tofiga a le kovana o loo mafai ona oo atu i luma o le maota, e ala i le latou palota fulisia e pei ona fa’aalia mai le ulua’i aso o a latou iloiloga seia oo mai i le taeao ananafi, e pei ona pasia ai le susuga ia Keniseli Lafaele e avea ma Faatonusili o le Matagaluega o Fefaatauaiga ma Alamanuia, fa’apea ai ma le afioga a Samana Ve’ave’a e avea ma Faatonusili o le Matagaluega o le Puipuiga o le Saogalemu Fa’alotoifale a le malo, i le palota e 16-0 mo sui uma ia e lua.

 

ILOILOGA A DR. ORETA CRICHTON

 

O mataupu e lua na to’atele afioga i Faipule sa latou fesiligia i le taimi o le iloiloga a le tama’ita’i foma’i ia Dr. Oreta Crichton, o auala o lo o fa’afoe ai tauofoga o konekarate mo galuega tetele a le malo, atoa ai ma auala o loo fa’atautaia ai tauofoga mo le aufai fa’atoaga e sapalaiina taumafa i le polokalame a le Ofisa o Aoga.

 

Ina ua fesili fia malamalama le afioga a Puleleiite Tufele Li’amatua Jr i le auala o loo fa’agasolo ai tauofoga mo galuega tetele a le malo, na fa’amalamalama ai e le tama’ita’i Fa’atonusili tofia e fa’apea, o aiaiga uma lava o tauofoga mo galuega tetele a le malo, e mulimulita’i uma lava i ta’iala o loo fa’atulaga mai i lalo o tulafono a le malo, atoa ai ta’iala mai le ofisa o le feterale o loo latou fa’atupeina galuega.

 

E pei ona manino i le molimau a le tama’ita’i Fa’atonusili tofia, e silia i le 600% o le paketi a lona Ofisa e fa’atupe mai i tupe feterale, ae silia i le 30% o le paketi e fa’atupe mai i tupe lotoifale.

 

Na fa’afetaia e le afioga i le ali’i Faipule mai Manu’a #1 ia Vesi Talalelei Fautanu Jr le polokalame o loo tatala atu ai galuega tetele e fa’atino e konekarate lotoifale a le atunu’u, pau le tulaga o loo ia fesiligia, e na o se vaega laiti lava o konekarate lotoifale o loo fa’atinoina galuega a le malo, ae sa tatau ona fa’asafua tulaga o galuega i isi fo’i konekarate ina ia fa’amanuiaina ai fo’i i latou.

 

Na fautuaina e le afioga i le ali’i faipule ia Vailoata E. Amituana’i le tatau lea ona toe silasila i konekarate o loo faatinoina galuega i tafatafa o le auala e pei o konekarate moavao, ina ia mautinoa e i ai ni fa’ailoilo e faailoa atu ai i le atunu’u o loo faia a latou galuega, ona o le fa’aletonu o loo molimauina, e fa’afuase’i ona iloa e le atunuu galuega o loo faia i le taimi e oo atu ai le ta’avale i le vaega tonu o loo fa’atino ai le galuega, e aunoa ma ni fa’ailoilo.

 

“O popolega, ina ne’i tula’i mai ni fa’alavelave e a’afia ai i latou nei e mafua mai i le vaapiapi o a tatou auala tele, ona a’afia ai fo’i lea o le malo i tulaga fa’apea”, o le saunoaga lea a Vailoata.

 

I tulaga o tauofoga mo le aufai fa’atoaga, na teena e le tama’ita’i Faatonusili tofia ripoti e fa’apea, o lona Ofisa o loo fa’asoasoaina pauna ma ituaiga o fua o fa’aeleelega mo le aufai fa’atoaga i le School Lunch.

 

Na taua e Dr. Crichton e fa’apea, o gaioiga uma lava mo tauofoga mo le aufai fa’atoaga o loo fa’atinoina e le Ofisa o Fa’atoaga, pau le vaega a lona Ofisa e fa’atino ina ia tusa ai ma aiaiga mai le feterale o loo aumai ai tupe o le polokalame, o le fa’atautaia lea o le tauofoga.