Ads by Google Ads by Google

Fa’amanino Talauega mafua’aga na ia suia ai fa’aiuga Komiti Fa’afoe


Le Loia Sili filifilia a le malo ia Talauega Eleasalo Ale. [ata AF]

Le faipule fou o le itumalo o Saole ia Kitara Vaeao.. [ata AF]
ausage@samoanews.com

Na taua e le Loia Sili filifilia a le malo ia Talauega Eleasalo Ale i luma o le Komiti o Mataupu Tau Fa’amasinoga ma Femalagaaiga a le maota o sui i le aoauli o le aso Lua na te’a nei e fa’apea, o le fa’aiuga a le Fa’amasinoga na mafua ona ia suia le fa’aiuga a le Komiti Fa’afoe a le Ofisa o Femalagaaiga sa faia, e teena ai le fa’afouina o pepa nofomau a se tama’ita’i mai Filipaina i le tausaga na te’a nei.

 

Na umi se taimi o fetalia’i Talauega ma le afioga i le ali’i faipule ia Lavea Fatulegae’e P. Mauga i le taimi o le iloiloga, ina ua fesiligia e Lavea le Loia Sili filifilia pe lelei lo la va ma le Pule o le Ofisa o Femalagaaiga a le atunu’u ia Peseta Dennis Fuimaono.

 

Na siisii le si’ufofoga o Lavea i le taimi na la fetalia’i ai ma Talauega e uiga i lenei mataupu, ona sa ia taua e fa’apea, e foliga mai i le gaioiga a le Loia Sili lagolago sa faia e pei o le molimau i luma o le fa’amasinoga e uiga i lenei mataupu, ua atagia mai ai lona le lagolagoina o le malo o loo avea ai o ia ma Loia Sili, ae ua ia taumafai e lagolago le fafine Filipaina na a’afia.

 

Na finau Lavea e fa’apea, afai ua fai le fa’aiuga a le Komiti Fa’afoe e teena ai le fa’afouina o pepa nofomau a le fafine mai Filipaina na a’afia, sa tatau ia te ia o le Loia Sili i lena vaitaimi ona ia aloaia le fa’aiuga a le Komiti Fa’afoe, ae na tali fuaitau Talauega e fa’apea, “o le taimi lava e aumai ai se fa’aiuga a le fa’amasinoga, e tatau i soo se tagata lava e aofia ai le malo ona aloaia ma fa’ataua”.

 

“O lo’u tiute o le puipui o le malo ma fa’amalosi le tulafono, o le taimi lava na tuu mai ai le fa’aiuga a le fa’amasinoga e fa’aleaoga ai le faaiuga sa faia e le Komiti Fa’afoe, o le taimi fo’i lena sa ou manatu ai loa e aloaia le fa’aiuga a le fa’amasinoga”.

 

O le mataupu e fa’atatau i pepa nofomau a le fafine mai Filipaina e pei ona fesiligia e Lavea, na avea ma mataupu e talanoa ai le to’atele ina ua apili e le fafine le faaiuga a le Komiti Fa’afoe e teena ai le taliaina o le talosaga e toe fa’afou lona pepa nofomau, ma tofu atu ai loa lenei mataupu i luma o le fa’amasinoga maualuga.

 

Saunoa Talauega e fa’apea, mai le silia i le to’a 4,000 tagata eseese mai fafo na talia ma lesitala i le polokalame a le Kovana o le “Amnesty Program”, e na o le fafine Filipaina lava lea na teena le talosaga e fa’afou ona pepa nofomau, o le mafua’aga fo’i lena na mafua ai ona tele fesili na tula’i mai i lenei mataupu, pe aisea na teena ai le talosaga a lenei fafine.

 

Na fesili Lavea ia Talauega pe aisea na ia suia ai le fa’aiuga a le Komiti Fa’afoe, ma ia fa’atonuina ai le fa’afou o pepa nofomau a le fafine, ae na tali le Loia Sili filifilia, “O le fa’aiuga sa ou faia, sa ou faia ina ia puipuia ai le malo, o le kovana, faapea ai ma tagatanu’u uma o Amerika Samoa”.

 

Na fa’auilavea le Fofoga Fetalai ia Savali Talavou Ale ma ia fesiligia ia Talauega, pe i ai se malosi o le Loia Sili na te suia ai se fa’aiuga a le Komiti Fa’afoe e teena ai le fa’afouina o pepa, na tali le loia sili filifilia, “na mafua ona ou suia le fa’aiuga a le Komiti Fa’afoe, ona o lea ua talia e le fa’amasinoga le talosaga a le fafine Filipaina, ma poloaina ai loa le malo ina ia fa’afou pepa a le fafine na a’afia.

 

Ae i le talitonuga o Talauega i le ulua’i taimi na fesiligia ai e Lavea lenei mataupu, sa ia taua ai le tele o isi mataupu taua e fa’atatau i le malo e tatau ona fa’aalu ai le taimi o le iloiloga, nai lo le talanoa i lenei mataupu e le aoga.