Na fa’aaoga e le afioga i le ali’i kovana ia Lolo Matalasi Moliga le avanoa na maua i le fonotaga ma lana kapeneta i le taeao ananafi, e fa’ataunu’uina ai se tula’i fa’aaloalo a le malo mo le aloaiaina lea o soifua o i latou na maliliu fa’afuase’i i le amataga o le tausaga fou, e pei o le afioga i le Kovana o le Falelima i Sisifo ia Lualemaga E. Faoa, fa’apea ai ma ali’i e to’atolu ia na maliliu i se fa’alavelave sa tula’i mai i le faleoloa o le Manu’a Store i Tafuna i le 3 vaiaso talu ai.

O le susuga i le Tiakono ia Malaki Timu na valaauina le aofia ina ia tutula’i mo le tula’i fa’aaloalo, ina ua tofia o ia e ta’ita’ia le sauniga lotu e tatala aloaia ai le ulua’i fonotaga a le Kovana ma lana Kapeneta i lenei nofoaiga ua amataina.

Na taua e le susuga i le Tiakono ia Timu i lana upu fa’amalosi e fa’apea, o lenei tula’i fa’aaloalo, e le gata e fa’apitoa mo le afioga a Lualemaga, ae o loo manatua ai fo’i aiga o fanau ma uso na malilliu i le fa’alavelave mata’utia lea na fa’ateia ai le atunu’u, fa’apea ai uo ma aiga i le 3 vaiaso talu ai, ina ua motu se uaea eletise malosi ma sipaka ai ni ali’i se to’a 6 ao fa’atinoina sa latou galuega, mulimuli ane maliliu le to’a 3 ae manunu’a le isi to’atolu, lea fo’i ua toe te’a i tua.

Saunoa le afioga i le ali’i kovana ia Lolo e fa’apea, o le motusia ai o le mafutaga ma le afioga ia Lualemaga, o se tulaga lea e lagona ai le fa’anoanoa o le malo atoa o Amerika Samoa ma ona ta’ita’i, ina ua valaau le Atua i se tasi sa tula’i mai e fai ma ta’ita’i mo lona aiga, itumalo fa’apea ai le Falelima i Sisifo.

“O le a le galo le afioga a Lualemaga i loto ma agaga, e ui o le taunuuga lea o lo tatou olaga, peita’i a tutupu tulaga fa’afuase’i fa’apenei i le olaga, ona tatou lagona lea o le atuatuvale ma le popole, peita’i ua fetalai le Atua ina ia lafo atu uma mafatiaga ia te ia”, o le saunoaga lea a le ali’i kovana.

O le salalau ai o lenei tala fa’anoanoa i le motusia fa’afuase’i o le mafutaga ma le afioga a Lualemaga, na fa’aalia ai e ni isi o ana uo faapea ai le to’atele o le atunu’u latou te silafia o ia, le misia o se tasi o Tama sa fai ma vaaiga i totou o le atunu’u, itumalo, nu’u ma le aiga.

O le aoauli o le aso Lua na te’a nei na tuumalo ai le afioga a Lualemaga i le maota gasegase a le atunu’u i Faga’alu, e mafua mai i sona fa’atafa gasegase na oso fa’afuase’i i lona aiga, ma fa’anatinati atu ai loa o ia i le falema’i ma i’u ina maliu ai, ao si’omia e uo ma aiga.

A o lei filifilia Lualemaga e toe avea ma Kovana o le Falelima i Sisifo mo le isi 4 tausaga, sa avea muamua o ia ma Fa’amasino Lagolago mo le Fa’amasinoga maualuga a Amerika Samoa, sosoo ai ma le taimi na avea ai o ia ma Senatoa mo le itumalo o Leasina.

Na taua e le afioga i le ali’i kovana le faigata ia te ia ona talia o lenei tala fa’anoanoa, pe mafaufau i tala ma amioga e masani ona latou talanoa, talasua ma fa’asoa i ai i le tele o taimi paganoa o le olaga.

“E ui o ia o se uo e mafanafana le ma mafutaga, ae i ai lava fo’i taimi ma mataupu e le tutusa ai o ma lagona ma Lualemaga, ma o le ituaiga tagata lena e i ai lenei Tamali’i”, o le saunoaga lea a Lolo e toe manatua ai le afioga i le Tama a Aitu ma Tagata.

Na taua e le afioga i le Maoputasi ia Mauga Tasi Asuega i le Samoa News i le taeao nei, le faigata lea ona fa’agalo i lona mafaufau le afioga a Lualemaga, aemaise lava le tele o taimi e talanoaina ai ni mataupu taua e fa’atatau i ali’i mautofi, ona o le tele o taimi e naunau ai lava Lualemaga ia fa’atino e ali’i mautofi a latou tiute tauave na filifilia i latou nu’u ma itumalo e fa’atino.

O le tofa ma le utaga loloto o loo ia Lualemaga e pei ona saunoa Mauga, o se tofa e loloto ma se utaga e mamao.

“O le a misia lenei Tama o le atunu’u, o se tagata e finau i soo se mea aoga, tusa lava pe fa’alogo atu Lualemaga e i ai tulaga fa’aletonu e tutupu mai ai ona o se mea ua ia naunau e fai, e naunau lava ina ia mautinoa e fa’atinoina mea lelei uma o loo ia naunau i ai. O se Tamali’i e leotele ona o le naunau ia lelei le atunu’u”, o le saunoaga lea a Mauga.

Na taua e le ali’i kovana i luma o le kapeneta e fa’apea, soo se taimi e tutupu ai fa’alavelave matuia e aafia ai le soifua o soo se tagata, e naunau ai lava le malo e fa’atino gaioiga uma ina ia mautinoa e fa’amanuiaina ai uma le atunu’u.

O le vaiaso nei na taua ai e le ali’i kovana lona tu’uina atu o se fautuaga i le Ofisa o Taui mo Fa’alavelave Fa’afuase’i a le malo, ina ia galulue ma aiga o ali’i e to’a 3 na maliliu i le fa’alavelave na tula’i mai i le Manua Store, atoa ai ma kamupani o loo aafia ai i lenei fa’alavelave, ina ia mautinoa e maua uma e aiga fa’amanuiaga tau tupe e agava’a ai i latou i lalo o le tulafono.

Ua ia talosagaina fo’i le komesina o Leoleo ma le Loia Sili ina ia silasila toto’a pea i le su’esu’eina o lenei mataupu.