Ads by Google Ads by Google

Toe tatala i tua ali’i pagota na musu e tula’i luma fa’amasinoga

ausage@samoanews.com

I le mae’a ai o le iloiloga sa faia i le aso Faraile na te’a nei i luma o lana afioga i le ali’i fa’amasino ia Fiti Sunia, e fa’atatau i le mataupu e uiga i le ali’i pagota lea na musu e oo atu i luma o le fa’amasinoga mo lana ulua’i iloiloga, e ui ua mae’a ona saini e le fa’amasinoga le poloaiga e pu’e fa’apagota ai o ia, na faia ai loa le fa’aiuga a le afioga i le ali’i fa’amasino ia Sunia ina ia toe tatala i tua le ua molia mai le falepuipu i Tafuna, ae o le a toe faila e le malo moliaga fa’asaga ia te ia.

 

O le fa’alua ona le tula’i o Michael Agasiva i luma o le fa’amasinoga fa’aitumalo i le aso Lulu ma le aso Tofi o le vaiaso na te’a nei, na poloaina ai loa e le fa’amasinoga sui o le Matagaluega o le Puipuiga o le Saogalemu Lautele, ina ia oo atu i luma o le fa’amasinoga e fa’amanino le mafua’aga ua le oo atu ai Agasiva i luma o le fa’amasinoga mo lana iloiloga.

 

O sui o le Matagaluega o le Puipuiga o le Saogalemu Lautele na auai e aofia ai le Sui Komesina ia Vaimaga Maiava, o le Pule o le Toese i Tafuna ia Cmdr. Foifua Foifua, ma le tama’ita’i Leoleo sa poloaina na te pu’e fa’apagota le ali’i o Agasiva.

 

Na talia e le afioga a Sunia fa’amatalaga a molimau e to’atolu e fa’atatau i le mafua’aga na le mafai ai ona oo atu Agasiva i luma o le fa’amasinoga, i le mae’a ai lea ona tu’u e le fa’amasinoga o le avanoa i molimau e saunoa ai e fa’amanino la latou vaega e tusa ai o lenei mataupu.

 

“O loo manino le Fa’avae Toe Teuteu a Amerika Samoa, e tatau ona fa’ailoa i le tagata ua masalomia uiga o moliaga ua tu’uaia ai o ia, ae foliga mai e le o le tulaga lea sa tula’i mai i le taimi muamua”, o le saunoaga lea a Sunia.

 

Na fa’amanino atili e Sunia i molimau e to’atolu e fa’apea, o le isi agaga o le iloiloga e pei ona poloaina ai i latou ina ia oo atu i le fa’amasinoga, se’i vaavaai le fa’amasinoga poo ai lea ua ia le usitaia le poloaiga a le fa’amasinoga e pu’e fa’apagota mai ai Agasiva.

 

“O loo i ai ta’iala a le fa’amasinoga e fa’atino ai ana galuega, ae fa’alagolago i le Matagaluega o le Puipuiga o le Saogalemu Lautele latou te fa’atino ma fa’amalosia lea ta’iala”.

 

“Ae afai e fa’atamala le Matagaluega o le Puipuiga o le Saogalemu Lautele e fa’atino la latou tiute tauave, o le a le mafai ona fa’ataunu’uina ta’iala a le fa’amasinoga”, o le saunoaga lea a Sunia, ma ia fa’aalia ai le talia e le fa’amasinoga o fa’amatalaga a molimau e to’atolu e tusa ai o lenei mataupu.

 

O le mae’a ai o le iloiloga i le aso Faraile na te’a nei, na tu’uina atu ai loa le poloaiga a le fa’amasinoga ina ia toe tatala i tua ia Agasiva, ae toe amata lelei le fa’agasoloina o le galuega e masani ai le malo ma le fa’amasinoga i mataupu fa’apenei, e pei ona o le fa’ataunu’uina o le poloaiga e pu’e fa’apagota mai ai le tagata ua molia, fuafua lea i le mae’a ona fa’ailoa i ai o moliaga fa’asaga ia te ia, ma maua ai loa le avanoa e tula’i ai o ia i luma o le fa’amasinoga.

 

Na fa’amaonia mai e le Pule o le Toese i Tafuna i le Samoa News e fa’apea, o Agasiva ua leva ona tatala i tua ina ua mae’a ona tuli lana fa’asalaga e tusa ai o le fa’alavelave lea na ta’usala ai o ia e le fa’amasinoga i le 2011, i lona fa’aaoga lea o se agaese e fa’ao’o ai manu’a i se isi ali’i.

 

Ae o le vaiaso na te’a nei na toe pu’e fa’apagota ai o ia e Leoleo ma taofia ai i le toese mo le 48 itula, ae sei fa’agasolo pepa mo le failaina o le mataupu fou fa’asaga ia te ia, e fa’atatau i se mataupu o loo a’afia ai se teineititi.

 

O le aso Faraile la na te’a nei na tatala ai i tua Agasiva, ma le fa’amoemoe e tatau ona toe faila e le malo le mataupu fa’asaga ia te ia i le vaiaso nei.