Ads by Google Ads by Google

Onosa’i I Mea Tiga

Vaega: 40

“Le Ali’i e, matou te fa’alagolago ma fa’amoemoe i Lau Afio i taimi o faigata ma puapuaga o le soifuaga nei, o le ala fo’i lea ua o matou o’o atu ai i ou luma ma o matou loto fa’amaualalo i lenei aso, e si’i atu le vi’iga ma le fa’afetai i Lau Afio, ona o le matalasi o au galuega ua o matou va’aia, a’o le vi’iga ma le fa’afetai matou te fa’afo’i atu i Lau Afio e le aunoa, Amene.”

Fa’afetai i le mamalu o le atunu’u ae maise o le au faitau i le tulituliloaina mai o la tatou tala fa’asolo, ia ae alo maia, o le a toe fa’aauau atu la tatou tala mo lenei aso, ae ia manuia lou alo atu i faiva ma tiute o lenei aso.

Fai mai, a’o aga’i atu le solo a Lefefe ma Vesi i totonu o le ofisa o lo’o faigaluega ai Lilo, o le taimi lea, o lo’o i ai totonu o le ta’avale le size two, ioe, ta’i manaia, o le umu talo, o palusami o ta’isi moa ma le tele o isi teuteuga aulelei na tapena ma saunia e le toeaina o Mose ma le lo’omatua o Malia, ae maise fo’i o si tamaloa o Vesi i lea aso, aua lava le valevale alofa i si a la tama o Lilo.

O le upu mulimuli lava a le toeaina o Mose i a Lefefe, “Lefefe, ua tu’u atu atoa lo’u fa’atuatuaga ia te oe, ma ua ou iloa fo’i, ua lava tapena lau tofa mo le upu o le a fai i le aiga, Vesi, ia e fa’alogo lelei, ‘aua e te fa’alavelave a’o fetala’i Lefefe ae ia manuia le lua malaga, ae o le a o ma tapua’i atu, alo i lua faiva, o o oulua mama na.”

Fai mai, a’o fai le tala a le toeaina o Mose, ae ua amata ona tagi le lo’omatua o Malia, ma punou i lalo. Ua ea a’e nei i luga le lo’omatua ma fa’apea ane ia Lefefe, “Lefefe, ia o le na ua talanoa atu le toeaina, o le a o ma nonofo ma tapua’i atu, ia manuia le lua malaga, e pei fo’i ona fai atu le toeaina, o o oulua mama na, ia ae o la’u tala ia te oulua, those are your lungs.”

Ua ‘ata le toeaina o Lefefe ma tilotilo ane i le lo’omatua, e le mafai ona ave’esea uiga malie o le lo’omatua, ma o uiga lava ia, e tau pa’i lima ai ma isi tina o le aiga. Ua manava le galuega a Lilo i lea afiafi, ae o le taimi lea, ua taunu’u le teine o Loleta i lo latou fale. Ua ma’ea ona fai lana fa’anoi i a Lilo, aua o Lilo lea ua va’aia latou ma ua ioe i ai Lilo e alu i le fale. O lea ua muamua ai loa Loleta e fa’ailoa i ona matua, o le a o’o atu le fa’amalamalamaga a lana uo.

Fai mai, ua leva ona fa’ailoa e Loleta i lona tama, ae e le o iloa e lona tina, ae fai mai le tala, o tafatafa fo’i o le tina o Loleta latou, e fai fai fo’i tagata o lo’o i le taua a le ISIS e le maua, ma ua fetaui lelei lava ma uiga o le lo’omatua o Malia.

E taunu’u ane la le teine o Loleta, o lo’o saofafa’i lava ona matua i totonu o le fale, ae o lo’o pisi solo tagata faigaluega e fai le tele o mea e mo’omia e tagata mo a latou fa’atauga. O le taimi fo’i lea, o lo’o va’ai e le isi tuagane o Loleta le fa’atoaga, fa’atasi ma ana lava tagata faigaluega. O le va’aiga fo’i o mea tuaolo ma meaola, ua i ai fo’i le isi tuagane o le teine o Loleta, o ia fo’i ua i ai fo’i ana tagata faigaluega e galulue fa’atasi e va’ai lelei manu a le aiga.

Na fa’ate’ia matua o Loleta ina ua va’ai mai ua tu atu le ta’avale a le tama’ita’i, na tilotilo nei le tasi i le isi ma tau mafaufau, po’o le a le mea ua o’o ane ai le la tama ae e le i o’o i le taimi e manava mai ai.

“Falaniko, ua ou le iloa lava se isi mea o le a fai i a Loleta, ua le alu e su’e se to’alua lelei e alofa ia te ia, ae ua le mafai le alu e ta’a i po uma, o ai la le tama o le a fia mana’o i ai. Se o lou afafine se ua fai ma sasa i lo’u loto ma lo’u mafaufau Falaniko, ua ou le iloa le isi fa’atonuga o le a fai i ai.”

Ua le tautala le toeaina o Falaniko ae ua na o le tilotilo ane i le lo’omatua o Susitina, ua ‘ata le toeaina, aua e pele lava i le toeaina lona afafine, aua e to’atasi lava ia. E to’a lima tuagane o Loleta, o le ala fo’i lea e auau ai le toeaina o Falaniko i si ona afafine, o le ta’avale fo’i o lo’o fealua’i ai Loleta, o le ta’avale na fa’atau e le toeaina mo si ona afafine.

E faia pea...