Ads by Google Ads by Google

Avea tamaoaiga ma lu’itau pito taua mo le malo i le isi 4 tausaga


Ni isi o sui o le Kapeneta a le kovana i le fonotaga mulimuli sa faia i le vaiaso na te’a nei. [ata AF]
ausage@samoanews.com

Ao aga’i atu ai le afioga i le kovana mo le fa’alauiloaina o lana kapeneta fou i le vaiaso o loo lumana’i nei, o se tasi o lu’itau sa ia fa’ailoa i lana kapeneta i le fonotaga mulimuli o lenei nofoaiga i le vaiaso na te’a nei, o le tulaga lea i le tamaoaiga o le malo i le lumana’i.

 

“A i ai se isi vaega e pito sili ona taua ia maua ma le afioga i le lutena kovana i le 4 tausaga ua mavae atu, fa’apea ai le isi 4 tausaga lea ua aga’i mai i le faigamalo, o le sailia lea o auala e fa’aleleia ma fa’amalosia atili ai le tamaoaiga o le malo, ua tatou molimauina lu’itau sa tatou fetaia’i i lenei 4 tausaga ua mavae, ma o le mea moni, e tele atu lu’itau o le a tatou fetaia’i i le isi 4 tausaga o loo lumana’i nei, e mafua  mai i fesuiaiga o le a faia i le nofoaiga fou lea ua tula’i mai e ta’ita’ia le malo tele o Amerika”, o le saunoaga lea a le ali’i Kovana ia Lolo Matalasi Moliga i le fonotaga mulimuli a le Kapeneta i le vaiaso na te’a nei.

 

Na taua e Lolo e fa’apea, o fesuiaiga o le a faia i le faigamalo fou a le malo tele o Amerika lea o le a tula’i mai, o le a oo mai ona a’afiaga i laufanua o Amerika Samoa, ma o se tulaga lea e tatau i le faigamalo aemaise lava i latou o le a tofia e avea ma totino o le kapeneta fou ona nofouta ma tapenapena i ai.

 

“E le faigofie tagata ia ua sauni e taitaia le nofoaiga fou a le malo tele, o fa’aiuga fo’i latou te faia e ono a’afia ai ma tatou, ae o le itu taua, ia oo mai lu’itau i le itu tau i le tamaoaiga o le malo ae ua tatou nofo sauni e fa’afetaia’i ia fa’afitauli ma lu’itau”.

 

“E tatau ona tatou vaavaai toto’a i auala e fa’aaoga tatau ai tupe a le malo, e le gata o le taumafai e taofiofi le fa’ataunu’uina o malaga mo fonotaga i fafo e le o mana’omia, ae vaavaai fo’i i isi tupe o loo fa’aalu i manaoga e le tatau ona fa’atinoina i le taimi nei, ina ia mautinoa e malosi le tamaoaiga o le malo i le amataga o ana galuega fa’atino i le tausaga fou”.

 

“Mo le sailia o isi auala e fa’amalosia atili ai le tamaoaiga, e tatau fo’i i isi vaega o le malo o loo galulue mo le sailiina mai o tupe e fa’atino ai manaoga ina ia mautinoa e tatala uma faitoto’a e mafai ona maua mai ai seleni e fesoasoani ai i le fa’amausaliina o le tamaoaiga o le atunu’u”.

 

Na taua e le ali’i kovana e fa’apea, e le o se tausaga faigofie lenei mo le faigamalo, ona o le tele o lu’itau ma manaoga sa tau fai fetuleni mai i soo se itu.

 

I lona toe manatuaina ai o le tausaga e 2013 ina ua fa’atoa mae’a ona fa’atauto i laua mo le ta’ita’iina o le malo, sa ia taua ai le fa’ateia o ia ina ua ulufale atu le afioga i le matua ia Togiola T. A Tulafono i lona Ofisa ina ua mae’a sauniga o le fu’a i lea tausaga, ma ofo atu lana fa’amalo e tusa ai o le ta’ita’iga o le malo.

 

“O le saunoaga a Togiola ia te a’u, sa i ai lona manatu e le aulia e le faigamalo le piriota totogi o le malo ia Fepuari o le tausaga 2013, ona o tulaga fa’aletonu sa i ai le malo i lena vaitau, peita’i o le itu e fa’afetaia ai lea tulaga, ona o le galuega sa matai ona tatou faia lea na manuia ai ma sologa lelei le itu tau tupe a le malo seia oo mai i le taimi nei”.

 

I lona tatala ai o le avanoa i sui o lana kapeneta mo le tu’uina atu o fautuaga i auala eseese e mafai ona fesoasoani ai i le fa’amalosia atoa ai ma le fa’amautuina o le tamaoaiga o le malo mo le isi 4 tausaga, na taua ai e Lolo le taua o le vaavaai i auala e fa’amautuina ai le lumana’i o kamupani i’a i le atunu’u.

 

Na taua e le ali’i kovana e fa’apea, o le lumana’i o kamupani i’a e lua o loo fa’alagolago i ai Amerika Samoa ma lona tamaoaiga, e fa’amoemoe lea i i’a o loo maua mai e va’a fagota eseese o loo latou fagotaina i’a ma la’u mai i Amerika Samoa, ae afai e fa’aauau pea ona a’afia tulafono tau faiga faiva ona o tulafono o loo pasia e vaega o le malo tele, ma taofia ai le avanoa e fagogota ai va’a fagota i ogasami o loo latalata mai i Amerika Samoa, o le mea moni lava o le a aga’i atu le lumana’i o kamupani i’a i se tulaga le mautonu, ma a’afia atu ai loa fo’i ma le tamaoaiga o le malo.

 

“Ua outou iloa la outou pito laau e tatau ona fa’atinoina, ua i ai le tomai ma le agava’a ia te outou uma ua filifilia e avea ma totino o le kapeneta mo lenei 4 tausaga ua mavae e fa’atino ai fa’aiuga ta’itasi uma, e fesoasoani ai i le fa’aleleia o le tamaoaiga o le malo, pau la ma vaega ma le lutena kovana e fa’atino, o le faufautua atu i la outou pito laau tauave”.

 

I le fa’aiuga o lana saunoaga, sa ia fa’ailoa ai i luma o le kapeneta tuai e fa’apea, o i latou uma o le a la filifilia e avea ma sui fou o le kapeneta mo le isi 4 tausaga, e le gata o ni tagata ua atoatoa i ai le taleni ma le tomai, ae o le a la filifilia ai fo’i i latou e talafeagai ma le galuega.

 

O le aso Lua o le vaiaso fou, Ianuari 3, 2017 lea ua fa’amoemoe le ali’i kovana e fa’alauiloa ai sui fou o lana kapeneta mo le isi 4 tausaga o loo lumana’i nei.