Fesiligia mafua’aga e tapuni malae Fagatogo taimi o le aso


Se alii o loo fa’atafao lona atalii i le aso na tatala ai le malae taalo a le malo i Fagatogo. [ata AF]
ausage@samoanews.com

E to’atele le mamalu lautele o le atunu’u ua fa’aalia o latou lagona fa’asea ma le fia malamalama, i le mafua’aga e tapunia ai le malae taaalo a le malo i Fagatogo i taimi o le aso, ae fa’atoa tatala lava i le afiafi mo taimi o tafaoga.

 

Na taua e se tasi o Tamali’i o le atunu’u na valaau mai i le Samoa News i le vaiaso nei e fa’apea, ua silia i le fa’alima ona latou asia ma si ana fanau laiti le malae i Fagatogo i taimi o le taeao ma le fa’amoemoe e fa’aeva ai si ana fanau laiti i le malae, ae o le fa’afitauli o loo tapunia.

 

“O taimi lelei ia o le taeao e mana’omia le fa’aeva ai o nai fanau i ni malae ta’alo, aemaise lava o lea ua tatala le malae taalo a le malo i Fagatogo, peita’i o le itu e lagona ai le fa’anoanoa matou te oo atu o loo tapuni le malae ma le fa’amatalaga fa’atoa tatala lava i le afiafi”, o le saunoaga lea a se tasi o Tamali’i o le atunu’u.

 

E to’atolu isi matua na valaau mai i le Samoa News ma latou fa’aalia fa’anoanoa e fa’atatau i le mafua’aga e ala ai ona tapunia le malae i taimi o le aso.

 

“Ou te fia malamalama pe o ai tonu e ana le malae, poo le malae sa fau fa’apitoa mo le afioaga i Fagatogo poo le malae a le malo o loo fausia i totonu o Fagatogo”, o le fesili lea a se tasi o Tina.

 

Na taua e le Tina lea i le Samoa News e fa’apea, e leai se taimi e pito sili ona manaia mo le fa’aeva o lana fanau ua na o le taeao, ae o le fa’alavelave e oo mai i le malae o loo tapuni.

 

Na taua fo’i e tasi o ali’i Faifeau i le atunu’u e fa’apea, e le o malamalama o ia i le mafua’aga e ala ai ona tapunia le malae taalo i Fagatogo, ae o lea sa fausia ma le fa’amoemoe e taaalo ai tupulaga o le afioaga ma le atunu’u atoa.

 

E lei manuia taumafaiga a le Samoa News mo le sailia mai o se finagalo o le afiogai le ali’i Faipule o le afioaga i Fagatogo, le tofa a Maugaoali’i Leapai Tusipa Anoa’i e uiga i lenei mataupu i le aso ananafi, ae na taua e se sui sinia o le afioaga e fa’apea, o loo i ai le fa’amoemoe e tatala fa’asoloatoa le malae i se taimi o i luma, peita’i na pau le faatonuga sa tu’uina atu e Ta’ita’i o le afioaga, e tapunia le malae i taeao mo le taimi nei se’i vagana ai le afiafi e tatala ai mo ta’aloga ma tafaoga a le atunu’u.

 

I le aso na tatala aloaia ai le malae i Fagatogo, na saunoa ai le afioga i le ali’i kovana ia Lolo Matalasi Moliga e fa’apea, o le tausiaina o le malae atoa ai ma le vaavaaia lelei, o le a taoto atu lea i le Pulega a Ali’i ma Faipule o le afioaga i Fagatogo.

 

Na taua e se sui o le Ofisa o Paka ma Malaetaalo a le malo i le Samoa News e fa’apea, o loo taoto atu lava i le vaavaaiga a le afioaga i Fagatogo le puleaina atoa ai ma le tausiaina o le malae taalo i le taimi nei, ae le o iloa e le latou Ofisa le mafua’aga e ala ai ona tapuni le malae i le taeao.

Comment Here