E lua pepe fou na soifua mai i le aso tonu o le Kerisimasi na te’a nei, e pei ona fa’amaonia mai e se sui o le potu failele a le falema’i o le LBJ i Faga’alu i le Samoa News.

O pepe e to’alua na soifua mai i le aso 25 o Tesema 2016 e aofia ai le tama’ita’i o Nelva Puni Piliati, lea na soifua mai i le itula e 12:07 i le po tonu o le kerisimasi, ma le pepe tama na soifua mai i le itula e 3.51 i le taeao o le aso kerisimasi i lona tina o Saolupe Soe.

O le tama’ita’i o Nelva e 7 pauna ma le tasi le aunese lona mamafa i le taimi na soifua mai ai o ia, ae o le pepe tama e 7 pauna ma le 14 aunese lona mamafa i le taimi na soifua mai ai.

Na fa’amaonia mai e se sui o le Potu Failele i le Samoa News le malolosi uma o Tina o pepe e to’alua o le kerisimasi, ma o loo i ai pea i laua i le falema’i i le taimi nei e fa’atalitali ai le taimi la te tuua ai le maota gasegase ae fo’i atu i tua i o la aiga.

E to’alua isi Tina ma’itaga sa i ai i le potu fa’atalitali talu mai le aso atoa o le Kerisimasi, peita’i e ta tonu le 12 i le po e mae’a ai le aso o le kerisimasi e lei latalata lava i le taimi e tu’u eseese ai i laua ma le pepe fou.

E lei maua se avanoa o le Samoa News e asia ai le Tina ia Asolupe Soe ma si ana tama, ona o loo i ai pea i laua i totonu o le potu fa’apitoa mo pepe, se’i vagana ai le tama’ita’i o Nelva ma lona Tina ia Rhonda ma maua le avanoa e feiloa’i ai ma le Samoa News.

Na taua e le Tina talavou ia Rhonda lona fiafia tele ina ua soifua mai lana pepe ulumatua i le aso tonu o le kerisimasi o lenei tausaga, ae na taua e le Tina o Rhonda o loo tausi ma’i ai i le falema’i le to’atele o le mamalu o le atunu’u aemaise ai Tausima’i na aga’i atu ma fa’amanuia atu ia Rhonda ina ua avea i laua ma si ana tama o le ulua’i pepe lea ua soifua mai i le kerisimasi o lenei tausaga.