Na autu le saunoaga a le afioga i le ali’i Kovana ia Lolo Matalasi Moliga, e tatala aloaia ai le polokalame o Pesepesega o le Kerisimasi a le malo i lenei tausaga i le po o le aso Sa na tea nei, i lona momoliina atu lea o se feau fa’alelagi i aiga uma o le atunu’u, ina ia tapenapena o latou loto ma o latou aiga e fa’atalitali ai le afio mai o le Ali’i.

E pei ona masani ai le polokalame o Pesepesega o le Kerisimasi a le malo i tausaga ta’itasi, o le afioga i le ali’i kovana e saunoa i le tatala aloaiaina o le polokalame, ae o le saunoaga e tapunia aloaia ai le polokalame e saunoa i ai le afioga i le Lutena Kovana.

I le atoa ai o le 39 tausaga talu ona amata mai lenei polokalame taua, na taua ai e le ali’i Kovana lona fa’afetaia o Ofisa e lua a le malo sa latou galulue e tu’u fa’atasi lenei polokalame, ina ia mafai ai ona o mai fa’atasi le atuunu’u e fetufaa’i ma fa’asoa i le agaga o le Kerisimasi.

O le Matagaluega a Tupulaga Talavou, Tina ma Tama’ita’i faapea ai ma le Ofisa o Tu ma Aganu’u a Amerika Samoa na galulue i le tu’u fa’atasia o lenei polokalame

“E ui e lei oo mai le kerisimasi ma le tausaga fou, ae ua avea pesepesega ua mafai ona fa’atinoina e aufaipese eseese i le atunu’u ua momoli mai ai le agaga atoa o lenei aso taua o le tausaga, e le gata o le aso e fa’amanatu ai le fanau mai o le Ali’i Fa’aola, ae o le aso fo’i e tapena ai aiga uma e fa’atali le toe afio mai o le Mesia”, o se vaega lea o le saunoaga a le ali’i kovana.

“O le aso lenei e fa’ataua ai aiga uma o le atunu’u, o le aso e tatau ai ona mafuta fa’atasi matua ma fanau ma talatalanoa i le alofa o le Atua, o le aso fo’i e mafai ai ona fetufaa’i meaalofa e fa’afetaia ai e le isi galuega lelei sa fa’atinoina e le tasi”.

“E tatau fo’i ona tatou fa’atauaina le alofa ma le filemu i le aso lenei, aua o le filemu e tupu mai ai le fa’amoemoe, o le fa’amoemoe, o le mautinoa lea o le manuia ua valaoia e le Atua mo aiga uma ma le atunu’u fa’apea ai le lalolagi atoa”.

“O la’u tatalo Amerika Samoa, ia tatou fa’ataua le filemu ma le alofa, aua o upu taua ia e mafai ai ona fusia i tatou uma i le fealofani, aua afai e filemu se aiga, ona fusia ai lea o tagata uma, nu’u, ekalesia ma le atunu’u i le alofa”.

“E le fesiligia le filemu o le malo, nu’u ma ekalesia pe afai ae filemu aiga, o le taua fo’i lena e manatu ai ta’ita’i o le malo ina ia fautuaina o tatou aiga uma e saili muamua le filemu ma le alofa i totonu o aiga, ona mafai ai loa lea ona fa’asafua mai lena uiga lelei i le atunu’u atoa”.

I le fa’aiuga o le saunoaga a le ali’i kovana, sa ia fa’aaogaina ai le avanoa na ia maua e fai ai o ia ma sui o la aiga ma le afioga i le Lutena Kovana ia Lemanu Peleti Mauga, e momoli atu ai fa’amanuiaga o le kerisimasi ma le tausaga fou i le atunu’u atoa, aemaise ai tama fanau o loo aumau i atunu’u i fafo ona o tautua i vaega ‘au a le malo tele, aemaise ai i latou o loo aumau i fafo ona o aoaoga ma galuega.

Na matua fa’amalieina le atunu’u na maimoa i le ulua’i po o lenei polokalame i le matagofie o pesepesega sa mafai ona ofoina mai e aufaipese eseese, lea na momoli mai ai le agaga moni o le kerisimasi o lenei tausaga.

O le po anapo e to’a 13 aufaipese sa mafai ona fa’afiafia ai, ma le po mulimuli nanei lea fo’i ua fa’amoemoe e to’a 13 aufaipese e fa’afiafia ai, ma tapunia aloaia ai loa le polokalame o lenei tausaga.