Siamupini AS ta’amilosaga Fusuaga sa faia Samoa


Le Faiaoga lagolago o le aufusu a Amerika Samoa, afioga Leilua Tafa Aoao, lea fo’i sa avea ma Laufali i le ta’amilosaga sa faia i Samoa, ma ona alo e to’alua sa aofia ai i le aufusu a le atunu’u lea ua sola mai ma le siamupini i le ta’amilosaga o fusuaga sa faia i Samoa i le vaiaso na te’a nei, le susuga ia Kainui Tafa lea na ia maua le pine apamemea i le aupaga o le 42kg ma le susuga ia Mamona Tafa, lea fo’i sa ia maua le pine apamemea i le aupaga o le 60kg. [ata AF]

Le Faiaoga o le aufusu a Amerika Samoa sa malaga atu i le ta’amilosaga o fusuaga sa faia i Samoa i le vaiaso na te’a nei, afioga Sala Sanele Etuale ma lona alo ia Ioelu Etuale, lea na ia maua le pine siliva i le aupaga o le 31kg mo Amerika Samoa. [ata AF]
ausage@samoanews.com

Na siamupini le aufusu a Amerika Samoa lea sa malaga atu e tausinio i le ta’amilosaga o fusuaga sa fa’agasolo i Samoa i le vaiaso na te’a nei, ina ua latou mauaina pine e 9 mai aupaga uma e 9 sa tausinio i le ta’amilosaga, lea e aofia ai pine auro e 3, pine siliva e 2, ma pine apamemea e 4.

 

Mai le silia ai i le to’a 200 ali’i fusu sa mafai ona auai i lenei ta’amilosaga mai Upolu, Savai’i ma Tutuila nei, o le ali’i o Falaniko Tauta o Amerika Samoa na ia mauaina le fa’ailoga o le Tama Fusu sa maualuga lana taumafaiga (MVP) i le aupaga o le 65kgs sa tausinio ai, lea fo’i na ia mauaina ai ma le pine auro i lea aupaga.

 

O pine auro a Amerika Samoa na maua mai lea i le ali’i o Tauta mai le aupaga o le 65kgs, Kaisa Ioane mai le aupaga o le 69 kg, ma le ali’i o Seloti Etuale mai le aupaga o le 91kg. O pine siliva na maua e Ioelu Etuale i le aupaga o le 31kg ma Tai Tafa i le aupaga o le 56kg, ae o pine apamemea na maua lea e Mamona Tafa  i le aupaga o le 60 kg ma Kainui Tafa i le aupaga o le 42kg.

 

E pei ona taua e le Faiaoga a le au a Amerika Samoa ia Sala Sanele Etuale, o le ta’amilosaga o le Samoa Game Boxing Tournament lea sa fa’agasolo a Samoai, o se tausinioga faapitoa lea na fili mai ai tama fusu mai Kalapu Fusu eseese uma i totonu o Savai’i ma Upolu, lea fo’i na valaaulia atu ai ma le aufusu a Amerika Samoa.

 

“E silia i le to’a 200 ali’i fusu mai Savai’i, Tutuila ma Upolu na auai i lenei ta’amilosaga tele, ma sa molimauina ai fo’i le tulaga maualuga ua i ai le fa’atinoina o le ta’aloga fusu i totonu o Samoa, pe a fa’atusatusa atu i le maualuga ma le maoa’e o le tomai o ali’i fusu sa auai i lenei ta’amilosaga”, o le saunoaga lea a Sala.

 

E 9 aupaga sa fa’agasolo ai le fa’atulagaina o le ta’amilosaga i Samoa, ma le fa’amoemoe o i latou o le a manumalo i a latou fusuaga ta’itasi e saili mai ai ali’i fusu e tausinio mo le sailiina o pine auro, siliva ma le apamemea.

 

“Sa lei faigofie le fa’agasoloina o le ta’amilosaga, e le mafai ona fa’atusatusaina tulaga ua i ai a tatou tama fusu i le tulaga maualuga ma le lelei ua i ai tama fusu a Upolu ma Savai’i, e le gata o le popoto i le fa’atinoina o le ta’aloga ae ua lava fo’i le malosi e fa’atino ai le ta’aloga, peita’i o ta’aloga fa’apenei, fa’atoa iloa lava le auro moni i le afi, o le tulaga fo’i lena sa i ai lenei fa’amoemoe, e ui i le lelei o tama fusu a Samoa, ae na matua lelei lava fo’i la tatou ‘au sa auina atu e tali i le valaaulia”, o le saunoaga lea a Sala.

 

Na taua e le ali’i faiaoga e fa’apea, ina ua maua mai le valaaulia mai Samoa, sa faigata la latou tapenaga ona o tulaga i tupe mo pasese, atoa ai ma malaga atu lea o fanau e auai i lenei fa’amoemoe, ae o lea o lo o fa’agasolo aoga i le taimi nei i Amerika Samoa, o ni isi fo’i ua feagai ma suega.

 

“O nai avanoa lava sa mafai ona maua i afiafi ma fa’aiuga o vaiaso, o taimi na sa fa’agasolo ai koleniga a le tatou ‘au, i le vaiaso mulimuli a’o le’i malaga ese atu le ‘au, sa molimauina ai e faiaoga  ma le pulega le lava saunia o i latou mo le fa’amoemoe”, o le saunoaga lea a Sala.

 

“O totonu lava o le maea sa matou molimauina ai ma isi faiaoga le tulaga ua i ai a tatou tama fusu i le taimi nei, e le gata i le lelei o le fa’alogo, usita’i i le auala e fa’atino ai le ta’aloga, ae sa lava fo’i le malosi e fa’aauau ai le ta’aloga i soo se taimi e oso ai i totonu o le maea”.

 

“O se tasi o tulaga mataina sa i ai la tatou au na auina atu i Samoa, o le tofu pine uma lea o ali’i fusu sa tausinio i aupaga uma e 9 sa fa’agasolo ai le ta’amilosaga, na maua ai loa e Amerika Samoa le manumalo, atoa ai ma le fa’ailoga faapitoa o le ta’amilosaga, le MVP, lea na maua e le ali’i o Falaniko Tauta o Amerika Samoa”, o le saunoaga lea Sala.

 

Na taua e le Sui Peresetene o le Asosi Fusu a Amerika Samoa ia Okesene Malala lona agaga fiafia ina ua mafai ona i’u ma le manuia taumafaiga a alo ma fanau a le atunu’u, ma ua latou sauni atu nei e tapena le isi ‘au fusu mo le isi ta’amilosaga e faia i Samoa i le amataga o le tausaga fou.

 

O se tasi o itu lelei sa maitauina i le ‘au fusu a Amerika Samoa sa malaga, o ali’i faiaoga e to’alua sa koleniina le au fusu, sa i ai fo’i ma nai o la alo i le ‘au a le atunu’u, e pei o le afioga a Sala lea e to’alua ona alo sa auai i le ‘au, o le alii o Ioelu Etuale ma Seloti Etuale, faapea ai ma le afioga a Leilua Aoao Tafa e to’alua fo’i ona alo sa malaga i le ‘au, o le ali’i o Mamona Tafa ma Kainiu Tafa.

 

“O le isi itu taua o malaga fa’apenei, o le malaga fa’atasi o le ‘au ae ua mautinoa e le faiaoga le lava tapena o ali’i fusu mo le fa’amoemoe”, o le saunoaga lea a le afioga a Leilua.

 

O le masina o Fepuari o le tausaga fou lea ua fa’amoemoe e fa’ataunu’u ai fo’i le isi taamilosaga o le Samoa Game Boxing Tournament a Samoa, ma ua faamoemoe e tatala atu le valaaulia i isi atunu’u o le Pasefika e aofia ai Niu Sila ma Ausetalia, ina ia auai atu i ai, e fesoasoani ai i le si’itia maualuga o le tulaga o le ta’aloga fusu i le atunu’u.

Comment Here