Na taua e le ali’i Leoleo Su’esu’e ia Det. Savelio Vaofanua i lana molimau fa’atauto i luma o le Fa’amasinoga Maualuga i le aoauli ananafi, o le fa’atonuga na tu’uina atu e le Komesina o Leoleo ia te ia ma ni isi o Leoleo Su’esu’e, na mafua ai ona tape ma aveese ni isi o fa’amaumauga sa i luga o le ripoti a Leoleo lea na latou tu’u fa’atasia e fa’atatau i le fa’alavelave lea na tafana ai le Ofisa o Leoleo i Tafuna.

Na fesili le loia a le malo ia Gerald Murphy i le molimau pe aisea na faia ai e le Komesina lea fa’atonuga e tape pe aveese fa’amaumauga mai luga o le ripoti a Leoleo, ae na tali Det. Vaofanua, “ina ia puipuia ai le molimau e ana le fa’amatalaga”.

Talu ai le mataupu e fa’atatau i fa’amatalaga ua tape ma aveese mai i luga o le ripoti a Leoleo lea ua tu’uina atu i le itu tete’e, e fa’atatau i le mataupu o lo o molia ai ni ali’i se to’afa, ona o tu’uaiga i lo latou au fa’atasi lea i le tafanaina o le Ofisa o Leoleo i Leone i le po o le aso 1 Novema 2014, na mafua ai loa ona fa’atonu e le fa’amasinoga le malo e fa’amanino i luma o le fa’amasinoga le mafua’aga ua ala ai ona tape pe aveese isi vaega o fa’amatalaga mai le ripoti a Leoleo.

O fa’amatalaga ua aveese e aofia ai le tape ese o le igoa o le molimau o lo o saini i le fa’amatalaga sa tu’uina atu i Leoleo, e tusa ai o lona silafia i le fa’alavelave sa tula’i mai i le mataupu na tafana ai le Ofisa o Leoleo i Leone.

O le aso Faraile o le vaiaso na te’a nei na valaau ai e le malo le afioga i le Komesina o Leoleo ia Save Liuato Tuitele, mo le tu’uina atu o sana fa’amatalaga e tusa ai o lenei mataupu.

I se vaega o le molimau a le afioga i le ali’i Komesina ia Save, sa ia taua ai le leai o sona silafia i le mafua’aga na ala ai ona tape ese fa’amatalaga e pei ona fesiligia e le fa’amasinoga, ae ina ua fesiligia Det. Vaofanua ananafi, sa ia ta’utino ai i luma o le fa’amasinoga, o le ali’i Komesina na fa’atonuina o ia ma isi ali’i Leoleo Su’esu’e e tape ese fa’amaumauga mai luga o le ripoti a Leoleo.

E 4 pepa o lo o tusia ai fa’amatalaga a molimau, lea fo’i ua fa’amoemoe e avea ma mau fa’amaonia o le mataupu fa’asaga i ali’i se to’afa o lo o tu’uaia i lenei fa’alavelave, o lo o atagia mai ai le tape ese o igoa o i latou o lo o saini i ia fa’amatalaga.

O ia pepa mollimau e aofia ai le pepa #3 (exhibit #3), pepa molimau #7, pepa molimau #9, ma le pepa molimau #11.

I le pito i lalo o pepa molimau ta’itasi uma nei, o lo o atagia mai ai gaioiga i le tape eseina lea o igoa o i latou sa sainia fa’amatalaga tusitusia nei.

Na taua e Det. Vaofanua i lana molimau e fa’apea, o ia ma isi ali’i Leoleo Su’esu’e e to’a 7 sa latou galulue fa’atasi uma i le su’esu’eina o le mataupu lenei.

Na fesili Murphy ia Det. Vaofanua po o ai na fa’atonuina o ia ma isi Leoleo Su’esu’e e tape pe aveese fa’amatalaga mai luga o le ripoti a Leoleo, na tali le molimau, “O le ali’i Komesina”.

Na fesili le isi loia a le itu tete’e o Michael White ia Det. Vaofanua, po o ai le igoa o le Komesina, na tali le molimau, “Save Liuato [Tuitele]”.

Na toe fesili White ia Det. Vaofanua, pe fa’amatala e sa’o lona mafaufau, o le ali’i Komesina ia Save sa fa’atonuina o ia ma isi Leoleo Su’esu’e e tape pe aveese fa’amatalaga mai luga o le ripoti a Leoleo, pe le o le isi Komesina o Leoleo lea fa’atoa mavae atu o [William B. Haleck, ae na tali le molimau, “O lea e sa’o lo’u mafaufa, o le ali’i Komesina ia Save na faia le fa’atonuga e tape ma aveese fa’amatalaga mai luga o le ripoti a Leoleo”.

Na fesili le isi loia fautua a i latou o lo o molia ia Sharron Rancourt i le molimau, po o ai igoa o molimau na tusia fa’amatalaga ia ua toe tape ese, ae na tali le molimau e fa’apea, o fa’amatalaga uma o lo o i le pepa molimau #3, o fa’amatalaga uma ia na aumai i le molimau o Jeff Futiga, ae o ia (Det. Vaofanua) na tusia le fa’amatalaga ma saini ai lona igoa, ae o isi fa’amatalaga o lo o i le pepa molimau #7, #9 ma le #11, na te le iloa po o ai molimau na tusia ia fa’amatalaga.

O le aso Lua o le vaiaso fou, Tesema 6 i le itula e 9:00 ua fa’amoemoe e amata aloaia ai le fa’amasinoga autu o ali’i e to’afa o lo o tu’uaia i lenei mataupu.

O i latou ia e aofia ai Manu Lefatia, Sinapati Tuufa’anatu, Tuliese Taliu ma Mosegi Solia Jr, lea o lo o taofia uma i le toese i Tafuna i le taimi nei.