Ads by Google Ads by Google

Tala otooto o Fa’amasinoga

ausage@samoanews.com

SEMURANA LEAUMOANA

 

Ua taofia nei i le toese i Tafuna le ali’i o Semurana Leaumoana e fa’atali ai lana iloiloga lea ua fa’atulaga e faia i le aso 23 Tesema, e iloilo ai le ripoti lea ua faila e le Ofisa Fa’anofovaavaaia, pe fa’amaonia ua ia le usitaia tuutuuga o lana nofovaavaaia.

 

E pei ona taua e le malo i le iloiloga a Leaumoana sa faia i luma o le afioga i le ali’i fa’amasino sili ia Michael Kruse i le taeao ananafi, o le masina o Iuni na sainia ai e le afioga i le ali’i fa’amasino sili lagolago ia Lyle L. Richmond se poloaiga e pu’e fa’apagota mai ai le ua molia, ina ua atagia i fa’amaumauga a le Ofisa Nofovaavaaia lona le usitaia o ni isi o poloaiga o lana nofovaavaaia, e aofia ai lona totogiina o le salatupe, totogi le tupe mo taui, atoa ai ma le le alu atu e vaai le Ofisa Fa’anofovaavaaia.

 

O le iloiloga lea ua fa’atulaga e faia i le aso 23 o le masina lenei o Tesema, o le a fa’ailoa ai e le Ofisa Faanofovaavaaia mau faamaonia e lagolago ai tu’uaiga fa’asaga ia Leaumoana.

 

O Leaumoana na ta’usala e le fa’amasinoga maualuga i le moliaga o le talepe fale i le tulaga lua, e mafua mai i le fa’alavelave lea na la osofaia ai ma le ali’i o Amosa Ilalio le Falesu’isu’i o le Ulalei fa’apea ai ma le Ofisa o le Western Union i Puapua, i Leone i le 2013.

 

O ni isi o tuutuuga o lana nofovaavaaia e 7 tausaga, o lona tuliina lea o le umi e 28 masina i le toese i Tafuna, peita’i ina ua mae’a ona ia tuliina masina e 12 i totonu o le falepuiopuoi, sa manatu loa le fa’amasinoga e tatala o ia i tua e saili sana galuega e totogi ai lana salatupe, ae fa’amalumalu lona tuliina o masina e 16 o lo o totoe o lana fa’asalaga.

 

O isi tuutuuga o lana nofovaavaaia e aofia ai lona totogiina o le salatupe e $1,000 i le fa’amasinoga, fa’apea ai ma le tupe e $3,390 e toe totogi mo le taui o mea sa fa’aleagaina.

 

Talu ai o Leaumoana o se tagatanu’u o le malo Tuto’atasi o Samoa, sa fa’atonuina fo’i o ia e le fa’amasinoga e fa’afou lona ID ua silia i le 4 tausaga talu ona mae’a le aoga, ina ne’i avea lea ma itu e ono toe fa’afo’i ai o ia i lona atunu’u na sau ai.

 

KALAPU AFELE

 

O le ali’i lea na fa’atonu e le fa’amasinoga e aua ne’i ona toe aveina se ta’avale i totonu o le 2 tausaga lea ua se’i ai lona laisene, ua ia le usitaia lea faatonuga mai le fa’amasinoga, ina ua maua e Leoleo o ia o lo o ia fa’afoeina se ta’avale i le vaiaso na te’a nei i Lauli’i.

 

O le vaiaso na te’a nei na faila ai e le malo le moliaga mamafa o le ave ta’avale a o se’i le laisene fa’asaga ia Kalapu Afele, maua toe tolopo nei lana mataupu e toe fofogaina lea i le vaiaso lona lua o Tesema, i lalo o tuutuuga e fa’asa ai ona ia toe fa’afoeina se isi ta’avale i totonu o le atunu’u.

 

O le masina o Oketopa 2015 na ta’usala ai e le fa’amasinoga ia Afele i le moliaga mama o le ave ta’avale ‘ona, o le fa’alua ai lea ona ta’usala o ia i lea solitulafono, ma fa’anofovaavaaia ai loa o ia mo le 24 masina i lalo o poloaiga a le fa’amasinoga e ao ona ia usita’i i ai.

 

O ni isi o ia poloaiga e aofia ai le fa’asa lea ona ia toe aveina se ta’avale i totonu o le 2 tausaga lea ua se’i ai lana laisene ave ta’avale.

 

O le vaiaso na te’a nei na taofia ai e Leoleo le pikiapu lanu mumu na fa’afoe e Afele i Lauli’i, ina ua molimauina le ova o maila sa alu ai lana ta’avale mai maila fa’atulagaina o lea vaega o le alatele a le malo.