Ads by Google Ads by Google

Onosa’i I Mea Tiga

Vaega: 26

 

“Le Atua e, o Oe o le Mataisau o mea uma lava, ia E alofa, foa’i mai le loto maualalo ma le loto fa’amagalo ia i matou i lenei aso ma aso uma o lo matou ola, aua o Lou le finagalo mo i matou ia o matou faia, o le vi’iga ma le fa’afetai ma le fa’amanu matou te fa’afo’i atu i Lau Afio. A ma’ea a matou galuega ma fuafuaga o le aso ona o matou fa’apea ifo lea, o i matou lava o ni tagata e le aoga, a’o le vi’iga e fo’i atu lava i Lau Afio e fa’avavau, fa’avavau lava, amene.”

 

Na muta mai la tatou tala, ina ua ma’ea le fetufa’aiga a Lilo ma lana uo mamae o Pule. O lea la ua maua le tonu, e sili pe a o Lilo ma se matai o lona aiga e fa’amalamalama i matua o Loleta. Ae se i tatou va’ai pea, po’o fea o le a o’o i ai le savali a le tama o Lilo.

 

Ina ua manava Lilo ma ua alu i le fale, e fetaui lava le taunu’u ane o Lilo ma le taunu’u ane fo’i o si ona tuafafine o Filipina. Ua o la feiloa’i ma si ona tuafafine ma ua savavali loa e aga’i atu i le fale, e savavali lava ma talatalanoa ae pei o se avega mamafa ua amo nei e Lilo, ona ua na le iloa po’o le a  le tala o le a fai i ona matua. Ae fai mai, sa lagona lava e le tama le filemu o lona loto, aua ua ia mautinoa, ua tele le suga o lona tina, ua le toe i ai ni ona uiga fa’amaualuga ma le fia tagata sa i ai, ae ua i ai suiga lelei ua ona molimauina.

 

Na iloa mamao mai lava e si o la tina le savavali atu a  lana fanau i lea taimi. Fai mai, na tu a’e i luga le lo’omatua o Malia ma lona loto fiafia ma fa’afeiloa’i mai i le solo a lana fanau lea ua alu atu nei. “Lilo, Pina, ua lua taunu’u mai, talofa e, i si a’u fanau, malo le onosa’i i galuega, malo fo’i le tauivi i mea lelei, ia o mai loa o lea ua vela le fa’alifu talo a Vesi ma le kuka manogi a Luisa.”

 

O le masani a Lilo ma Filipina, so’o se taimi lava e tu’ua ai e la’ua le fale, e sogi atu lava i o la matua, a o’o fo’i la i le taimi e toe fo’i mai ai, e fa’apena fo’i. Ua sogi atu nei Lilo ma Filipina i si o la tina, ae ua fesili ane le teine, po’o fea o i ai lo la tama. Ae sau le tali a le lo’omatua, o lo’o talanoa ma Vesi ma fai le la galuega i le ma’umaga.

 

“Tina, fai mai fo’i Vesi ua uma ona vele atoa le ma’umaga, a’o le na fo’i ua toe vele, o lona uiga e vele lava i aso uma.” Ua ‘ata le lo’omatua o Malia ma fa’apea ane i lana fanau. “ia soia ia, ai fo’i o ta se faleaitu a Vesi i si toeaina, ua uma fo’i ona oulua iloa, e ‘ese le alofa o le lua tama i a Vesi, ia ua aoga fo’i si tamaloa i le faiga o mea o le aiga.”

 

Ua le tautala Lilo, ae ua manatua ifo i lona loto, e sa’o lelei lava lona tina, ua iloga fo’i galuega lelei ua fa’atino e Vesi i totonu o si o latou aiga, ma e le mafai e se tasi ona toe ave’esea lea tautua lelei ma le atoatoa. Ua tu ni Lilo ma valuvalu lona ulu, ua tau mafaufau pe o le a fa’ailoa i lona tina le ma o lo’o i ai lona loto, pe fa’atali se i sau lona tama, ona o latou talatalanoa ai lea.

 

Ua fa’atei’a mafaufauga o Lilo ina ua fa’apea ane lona tuafafine, “Ia ta o ia e va’ai po’o le a se kuka a Luisa na fai, ua sau fo’i le mole latou.” Ua ‘ata le la tina ma sa’apa ane ua u’u le lima o lana tama teine ma ua savavali loa i le fale. Na ona susu’e a’e lava o le ulo e Filipina, ae alu a’e i luga ma le manogi manaia o le kuka a Luisa. Ua tu le teine ma fa’apea ane i lona tina, “Malia, talofa e, i si o’u uso o Luisa, e leai se mea e fa’aletonu, ua iloa lelei lava e Luisa le mea’ai ou te momo’o i ai, ia se i maua la’u siaki ona ave la o se tupe e totogi ai pili o tama.”

 

Ua ‘ata le lo’omatua o Malia, ma fa’apea ane, “Filipina, o mea lelei mea na, ia oulua alolofa i a Luisa ma Vesi ma si a la fanau, o a lava mea o lo’o feagai ma tatou i lenei vaitaimi, ae ‘aua lava ne i galo ia te oulua, ia oulua alolofa ia Luisa ma Vesi ma si a la fanau, aua e sili lava le manuia o le e foa’i, na i lo le na te taliaina, e tutupu fo’i mea e avea, i le alofa o le Atua.”

 

E faia pea...