Ads by Google Ads by Google

Filifilia isi Senatoa fou mo le maota maualuga

ausage@samoanews.com

Ua fa’alauiloa mai e ni isi o Itumalo le mae’a lea ona filifilia o latou sui senatoa fou, mo le nofoaiga fou a le maota maualuga a le Senate lea ua fuafua e amataina i le tausaga fou mo le isi 4 tausaga.

 

O ni isi o ia Itumalo e aofia ai Sua #1 ma le Itumalo o le Manu’atele i le Falelua i Ofu ma Olosega/Sili.

 

O le aso Faraile o le vaiaso na te’a nei na fono ai le Itumalo o Sua mo le sailia o ona sui e to’alua i le maota maualuga a le Senate, ma filifilia ai loa le afioga a Muagututia Moevasa Tauoa e fai ma sui o Sua #1, ae o Fa’amausili Mau Mau Jr lea ua fai ma sui o Sua #2. O le afioga a Tialavea Misi o lo o ia nofoia le nofoa o le Itumalo o Sua #1 i le taimi nei.

 

Na taua e sui o le Itumalo i le Samoa News le filemu ma le faigofie o le sailiga tofi a le Itumalo, mo le sailia o se latou senatoa fou. E ui sa i ai ni isi sa naunau i le tofi, peita’i ua mae’a lava ona fa’ataoto upu a le Itumalo, o le tofi e tu’u fa’asolo i afioaga eseese o le Itumalo.

 

“E ui i le taumafai atu o ni isi o sui e fia tautua ma auauna mo le Itumalo e ala i le tofi Senatoa, peita’i na tasi lava le fa’afitiga o aleaga, o le afioga ia Maugututia lea ua o o i ai le fa’asologa mo le nofoa, e va’ava’alua ma le afioga i le ali’i Senatoa ia Fa’amausili mai le afioaga i Masefau mo le tofi o le Itumalo o Sua #2,” o se tala lea a sui o le itumalo.

 

Na taua e le afioga ia Fa’amausili i le Samoa News, lona fiafia tele ina ua mafai ona filifilia le afioga a Muagututia e fai ma sui o le Itumalo o Sua #1, ma maua ai fo’i ma le avanoa la te galulue fa’atasi ai mo le tautuaina o le Itumalo.

 

Mo le Itumalo o Manu’atele i le Falelua i Ofu ma Olosega/Sili, ua filifilia ai le afioga i le Fa’atui ia Misaalefua John Hudson e avea ma o latou senatoa fou, e sui tulaga i le afioga i le ali’i Fa’atui ia Laolagi Fonoti Savali Vaeao o lo o ia tauaveina mai le nofoa mo le nofoaiga lenei e 34 a le Fono Faitulafono.

 

Na taua e se sui o le Itumalo le faigofie o le sailiga a le itumalo o Manu’a Numera 2 mo le latou senatoa fou, e ala i le puupuu o le taimi na saili ai le tofa ma le fa’autaga mo le tofi a le Itumalo.

 

“O se filifiliga sa faigofie lona fa’ataunu’uina, e ui lava fo’i i tulaga masani i sailiga tofi fa’apenei a le atunu’u, i le naunau mai o le isi itu ina ia fa’aauau pea la latou tautua, peita’i ua mae’a lava ona fa’ataoto upu a le Itumalo pe a oo i le tofi Senatoa, o le tofi e le tumau i se tasi ae fa’asolo, lona uiga fo’i lea, afai e mae’a le taimi na filifilia ai se tasi na te tauaveina le tofi, ona se’e atu fo’i lea o le nofoa e tauave e le isi sui ua avanoa ma agava’a”, o le saunoaga lea a se tasi o sui o le Itumalo sa ia fa’ailoa mai taualumaga o le fonotaga.

 

I le filifilia ai o le afioga a Misaalefua e fai ma senatoa fou o le itumalo, sa talosagaina ai e le Itumalo o ia ina ia fesoasoani i le fa’aleoina o manaoga a le Itumalo ua tele tausaga o tula’i mai, e pei o le fa’aleleia o tulaga o femalagaaiga i le sami ma le ea, atoa ai ma le vaavaai i auala e fesoasoani ai i le fa’aleleia o isi manaoga i le itumalo e aofia ai tulaga i aoaoga ma le falema’i.

 

E pei ona silafia, o le itumalo o le Manu’atele e to’atolu ona sui i le maota maualuga, e to’atasi mai le Falelua i Ofu ma Olosega/Sili, ae to’alua mai le Faletolu i Faleasao, Ta’u ma Fitiuta.

 

O Itumalo e lei filifilia ni o latou senatoa mo le nofoaiga a le maota maualuga mo le isi 4 tausaga e aofia ai le Itumalo Saole, Tualauta (2), Leasina, Tualatai, Fofo ma Alataua.

 

Mai nofoa e 18 a le maota maualuga, o le 11 o ia nofoa ua mae’a ona filifilia, ma le to’a 7 o lo o fa’atalitali pea i fa’aiuga a Itumalo.

 

Na taua e se sui o le Itumalo o Tualatai i le Samoa News ananafi, o le taeao o le aso To’ona’i nei i le maota o le afioga i le Alo o Salamasina ia Satele Galu Satele i Asotau, o le a fono ai le Itumalo mo le sailia o se latou senatoa fou. O le afioga a Tuiasina S. Esera o lo o nofoia le nofoa o le itumalo o Tualatai i le taimi nei.