Sauni ni isi Aufai Fa’atoaga e talosaga i le kovana mo se fesoasoani

ausage@samoanews.com

Ua fa’aalia e i isi o le aufai fa’atoaga o lo o latou totoina togalaau’aina e aofia ai ma ni isi o le aufai fa’atoaga Asia, le leai o se asiasiga a le Ofisa o Fa’atoaga na asia ai a latou fa’atoaga, ma mafua ai loa le fa’aiuga lea ua faia e taofia ai le toe taliaina o a latou togalaau’aina e fa’atau atu i le polokalame o Taumafa a le Ofisa o Aoga (School Lunch Program), fa’apea ai ma le toe fa’atauina i soo se faleoloa i totonu o le atunu’u fa’apea ai tafatafa o le alatele.

 

Ona o lea tulaga, ua taua ai e ni isi o le aufai fa’atoaga lo latou sauni e savalia le Ofisa o le afioga i le ali’i Kovana ia Lolo Matalasi Moliga mo se fesoasoani e fa’atatau i lenei mataupu.

 

Na fa’aalia e se tasi o faifa’atoaga Asia o lo o galue i Vaitogi le leai o se asiasiga a le Ofisa o Fa’atoaga na oo atu i lana fa’atoaga, a o lea ua a’afia lana fa’atoaga i le fa’aiuga ua faia.

 

E ui i le faigata i tulaga o fesootaiga i le gagana, peita’i na taua e le ali’i faifa’atoaga Asia e fa’apea, e leai se taimi na ia soliina ai le tulafono e ala i le soona fa’aaoga fa’asolitulafono o vailaau e tausi ai lana fa’atoaga, i taimi uma e aga’i atu ai asiasiga i lana fa’atoaga.

 

Na taua e lea ali’i ma lona fa’anoanoa tele i le fa’aiuga o le vaiaso na te’a nei i le Samoa News e fa’apea, o le masina o Setema na gata ai le asiasiga a sui o le malo na aga’i atu i lana fa’atoaga, lea fo’i na molimauina ai e sui o le malo le lelei o le tausiga o lana fa’atoaga, atoatoa mea uma o lo o mana’omia mo le tausia lelei ina o le fa’atoaga.

 

Ae ina ua fesiligia e le Samoa News le ali’i faifa’atoaga poo ai le Ofisa a le malo na asia lana fa’atoaga i le masina o Setema na te’a nei, na tali le ali’i faifa’atoaga, o sui o le Ofisa o le Soifua Maloloina na malaga atu, ae leai ni sui o le Ofisa o Fa’atoaga na malaga atu.

 

Na taua atili e lea ali’i faifa’atoaga le i ai uma o mea sa fa’atonuina mo le saogalemu o lana fa’atoaga, e pei o Faletaele, atoa ai ma ituaiga vailaau e tatau ona fa’aaoga e tausi ai lana fa’atoaga.

 

Sa ia taua atili fo’i e fa’apea, talu ona la’u ana sapalai i le polokalame a le “School Lunch Program” mai le silia i le 5 tausaga ua tuana’i, e lei i ai lava se fa’aletonu na tula’i mai ai i ana sapalai, e leai fo’i se taimi na fa’asala ai o ia i lona le usitaia o ta’iala ma tulafono mo le fa’atulagaina o fa’atoaga.

 

E to’afa isi fai fa’atoaga Samoa sa latou fa’ailoa i le Samoa News tulaga uma fo’i ia, atoa ai ma lo latou sauni e savalia le Ofisa o le kovana mo se fesoasoani.

 

“E leai lava se asiasiga a le Ofisa o Fa’atoaga na oo mai i la’u fa’atoaga i le masina atoa lenei o Oketopa, e o o fo’i i ni isi o le aufai fa’atoaga o lo o matou galulue ma faifai mea fa’atasi, e leai ma ni asiasiga na oo mai i lenei itu o le atunu’u o lo o matou galulue ai i Pava’ia’i, Tafuna ma le fa’asolo mai ai i le itu atoa lenei o le Tualauta, ae afai o lea ua tuuina mai le fa’aiuga a le Faatonusili le Tumau o le Ofisa o Fa’atoaga ina ua mae’a ona latou asia se fa’atoag se tasi, e tatau la ona fa’amanino mai a latou mau e fa’ailoa mai ai le moni o le latou fa’aiuga”, o le fa’asea lea a le susuga ia Alatasi Viiga, o se ali’i fai fa’atoaga mai Pava’ia’i.

 

Ae na taua e le susuga a Iakopo Tomasi o Iliili e faapea, o le fa’aiuga ua faia e le Ofisa o Fa’atoaga, e le gata e matuitui ma oona, ae ua ta’uleagaina ai fo’i le aufai fa’atoaga uma lava i le atunu’u.

 

“Aisea na le fa’asala ai na o le aufai fa’atoaga ua fa’amaonia lo latou le usitaia o le tulafono, pe fa’ailoa mai fo’i o latou suafa ina ia silafia ai e le atunu’u i latou, ma aua ai nei toe afea a latou fa’atoaga i ni fa’atauga, ae o le fa’alaua’itele o fa’asalalauga fa’apenei e aunoa ma ni fa’amaoniga, o se tulaga lea ua atagia mai ai le le fa’amaoni o le Ofisa o Fa’atoaga a latou fa’aiuga”, o le saunoaga lea a Tomasi.

 

Na taua atili e Tomasi lona sauni e savalia le Ofisa o Fa’atoaga mo le sailia o fa’amaoniga o a latou fa’aiuga ua faia, ma lana tatalo, talosia e le o ni faiga fa’apolokiki lea ua a’afia atu ai ma le to’atele o le aufai faatoaga.

 

E lei manuia taumafaiga a le Samoa News i le tau sailia lea o le afioga i le Fa’atonusili le Tumau o le Ofisa o Fa’atoaga ia Peter Gurr mo sona finagalo e uiga i lenei mataupu, ina ua taumafai e fa’afeso’ota’i lona Ofisa fa’apea ai lana telefoni feavea’i i le vaiaso na te’a nei.

 

Ae ina ua fesiligia e le Samoa News se tasi o sui sinia o le Ofisa o Fa’atoaga o fa’atoaga i le vaiaso na te’a nei, na fa’amaonia mai ai e lea sui e fa’apea, o asiasiga i fa’atoaga sa faia lea e le Ofisa o le Soifua Maloloina.

 

E ui e lei finagalo lea sui e fa’ailoa mai lona suafa, peita’i sa ia taua e fa’apea, o fa’amaumauga uma lava i tulaga o asiasiga i fa’atoaga e galulue fa’atasi ai le latou ofisa ma le ofisa o le soifua maloloina a le malo.

 

Ae ina ua fesiligia lea sui pe sa fa’atinoina ni a latou asiasiga i le masina o Oketopa na te’a nei, sa ia taua ai e fa’apea, “fesili la oe ia Pita (Peter Gurr) e fa’atatau i le mataupu lena, ona ou te le malamalama i ai”.

 

Na taua e se molimau fa’atuatuaina mai le Ofisa o le Soifua Maloloina i le Samoa News, o le latou ofisa sa fa’atinoina le asiasiga i fa’atoaga i le masina lenei o Oketopa, ma e tasi lava le fa’atoaga sa latou asia, ma latou molimauina ai tulaga fa’aletonu ma le le manuia, ma tu’uina atu ai loa sa latou ripoti i le susuga a Gurr e iuga i tulaga sa latou molimauina i le fa’atoaga e tasi na latou asia.

Comment Here