Ads by Google Ads by Google

Saini Kovana isi pili na pasia e le Fono Faitulafono

ausage@samoanews.com

O le vaiaso na te’a nei na tauaao ai e ta’itai o le Fono Faitulafono ni tusitusiga mai le Ofisa o le afioga i le ali’i kovana ia Lolo Matalasi Moliga, e fa’ailoa ai lona sainia o ni isi o pili na pasia e le Fono Faitulafono ina ia avea ma tulafono a le malo.

 

O pili e 2 na taua e le ali’i kovana i lana tusi i ta’ita’i o le fono ua ia sainia e aofia ai le pili e fa’asoasoa ai le tupe o le paketi a le malo mo le tausaga tupe fou 2017 lea ua amataina nei, atoa ai ma le isi pili e suia ai le tulafono tau Femalagaaiga, ina ia mafai ai ona suia le aofa’i o tagata e talia a latou talosaga mo le nofomau.

 

O tulafono e lua ua sainia nei e le kovana e avea ma tulafono, o ni isi ia o tulafono sa talosagaina e le faigamalo a Lolo ma Lemanu, lea fo’i ua mae’a ona pasia e le Fono Faitulafono.

 

Mo le pili e fa’asoasoa ai le paketi a le malo ua sainia nei e avea ma tulafono, na taua ai e Lolo i lana tusi i ta’ita’i o le Fono Faitulafono lona fa’afetai o le galuega sa latou fita i tuga i ai, i le fa’atulagaina lea o iloiloga ina ia pasia ai vaega uma o le paketi a le malo ua mae’a ona fa’atulaga.

 

Ae o le itu na pito sili ona fa’afetaia ai e Lolo ta’ita’i o le fono, o le mafai lea ona pasia ai ma se suiga na fa’anatinati lona tu’uina atu i luma o le Fono Faitulafono, ina ia toe faaopoopo ai i le aofa’i o le paketi fuafuaina a le malo sa tu’uina atu muamua le aofaiga e $2 miliona, o le tupe lea e avea ma tupe e fa’afetaui ai e le malo o Amerika Samoa vaega tupe fesoasoani e tusa ma le $20 miliona lea ua fa’amatu’u mai e le Ofisa e Pulea Malae Va’alele i le malo tele (FAA), e fesoasoani ai i le fa’aleleia o le malaeva’alele i Tafuna, atoa ai ma le aveeseina o tane suau’u o lo o i ai ae sei atu i le nofoaga fou lea ua fuafua e fa’amautu i ai.

 

“Ou te fa’afetai atu ia lua afioga i Ta’ita’i o le Fono Faitulafono, fa’apea ai afioga i Senatoa ma Faipule, i lo outou pasiaina o lenei tulafono taua mo le manuia lautele o le tagata o le atunu’u, O le ata vaaia o le galulue fa’atasi o Vaega eseese o le faigamalo, ua mafai ona fa’aalia i la outou fa’aiuga ua fa’atinoina nei”, o se vaega lea o le tusi a le ali’i kovana.

 

E pei ona silafia, e $378.4 miliona le aofa’i o le paketi a le malo na i ai ina ua fa’atoa tu’uina atu le pili o le paketi i le Fono o le iloiloina, ae o le suiga faaopoopo e $2 million ua atoa ai le tupe faasoasoa i lona aofaiga e $380.4 miliona.

 

O alagatupe e 4 lea ua valaoia e le malo e fa’atupe mai ai lana paketi mo le tausaga tupe fou lenei, e aofia ai le $92.1 miliona e maua mai tupe lotoifale, $104.7 e maua mai i tupe fesoasoan mai le feterale, $157.9 miliona i le Enterprise Fund, ma le $9.6 miliona mai vaega tupe a le feterale e fa’atupe ai galuega mo atina’e tetele (CIP).

 

O lo o fa’amoemoe le malo e si’itia tulaga o ana tupe maua fa’alotoifale i lafoga o oloa mai fafo, aemaise ai le fa’aaogaina o masini fou e su’e ai uta ma oloa mai fafo, lea ua fa’amoemoe le Ofisa o Tiute latou te fa’atinoina.

 

O le isi tulafono ua sainia nei e le ali’i kovana e avea ma tulafono aloaia a le malo, o le pili na pasia e le Fono Faitulafono e fa’aopoopo ai le aofa’i o tagata mai fafo e talia a latou talosaga mo le nofomau.

 

Na taua e le faigamalo a Lolo ma Lemanu i luma o le Fono Faitulafono ina ua fesiligia e afioga i Senatoa ma Faipule e uiga i le tulafono lenei e fa’apea, talu ai e na o le 50 le aofa’i o tagata mai fafo e talia a latou talosaga mo le nofomau i totonu o Amerika Samoa, i le atoa ai o le 20 tausaga talu ona nofo tumau i le teritori, ua maitauina ai se fa’afitauli i le tuai lea ona fa’agasolo talosaga mo tagata nofomau, ma lata ai i le to’a 700 le aofa’i o tagata mai fafo o lo o fa’atali pea nia fa’aiuga mo a latou talosaga.

 

Ina ia talafeagai ma le tulaga ua i ai le tautua a i latou nei, ua manatu ai le faigamalo ina ia sii i le 100 le aofa’i o tagata e talia a latou talosaga mo le nofomau, ina ia fa’a faigofie aio na fa’agasolo talosaga, ma kilia ai loa le lisi a i latou o lo o fa’atalitali mo le taimi e talia ai a latou talosaga.