Ads by Google Ads by Google

Taufete’e:Fa'amanino mafua’aga si’itia paketi LBJ i le $3 miliona

ausage@samoanews.com

O fa’amanuiaga i tulaga o totogi mo tagata faigaluega, atoa ai ma le fuafuaga e fa’atauina mai ni isi o masini e fa’aleleia atili ai le tautua a le falema’i mo le atunu’u, o ni isi ia o mafua’aga na taua e le Pulesili o le Falema’i a le LBJ ia Taufete’e John Faumuina i luma o le Komisi So’ofa’atasi o le Paketi a le Fono Faitulafono i le taeao ananafi, ua mafua ai ona si’itia le paketi a le LBJ mo le tausaga tupe fou i le silia i le $3 miliona.

 

E $46 miliona le aofa’i o le paketi a le LBJ mo le tausaga tupe lenei 2016 atoa ai ma le totogiina o tagata faigaluega e to’a 725, peita’i ua fa’amoemoe e si’itia i le $50.1 miliona i le tausaga tupe fou atoa ai ma le si’itia o tagata faigaluega i le aofaiga e 756.

 

I le tausaga tupe lenei, e $28.3 miliona o lo o alu i totogi o tagata faigaluega a le LBJ, peita’i o le a si’itia i le $29.7 miliona i le tausaga tupe fou. E oo i tulaga o mea faigaluega e fa’atino ai galuega a le falema’i (materials & supplies), e $13.5 miliona le tupe o lo o fa’aagaga mo le paketi o le tausaga tupe lenei, peita’i ua fuafua e si’itia i le $15.7 miliona i le tausaga tupe fou.

 

Na fa’amanino e le tofa a Taufete’e e fa’apea, o le si’itaga i totogi o tagata faigaluega, e mafua mai ona o ni isi o totogi fa’aopoopo (increment) a le malo lea ua amata ona fa’ae’e i luga o totogi o ni isi o tagata faigaluega a le falema’i, lea ua mafua ai ona si’itia le aofa’i o le tupe o le a alu i totogi o tagata faigaluega mo le tausaga tupe fou, ae mo mea faigaluega, o se tasi o mafua’aga autu ua ala ai ona si’itia maualuga le tupe ua fuafua le falema’i e fa’aaluina ai i le tausaga tupe fou, ona ua si’itia le tau o vailaau ma fualaau mo togafitiga o gasegase a kamupani mai fafo o lo o oka mai ai le sapalai o vailaau mo togafitiga.

 

E ui i le tau fa’asoasoa o tupe e fa’atino ai le tautua a le LBJ mo le atunu’u, peita’i na saunoa Taufete’e e fa’apea, e leai lava sa latou gaioiga e mafai ona fai pe afai e si’i i luga le tau o vailaau ma fualaau mo togafitiga, se’i vagana ai lo latou totogi o le tupe e fa’atau mai ai.

 

“I le tulaga tau fa’asoasoa o tupe maua a le falema’i, ua faia ai e le pulega ni isi o suiga laiti ina ia mautinoa e ausia manaoga o lo o fia fa’atinoina, e pei o le fa’aitiitia lea o tupe fa’aalu i tulaga o malaga a le aufaigaluega i fafo, ae fa’asao mai nai tupe ia e fa’atau ai vailaau ma fa’aleleia ai totogi o tagata faigaluega. Ou te iloa o lo o to’atele tagata faigaluega e le o fiafia i le fa’aiuga ua matou faia, peita’i ua leai lava se isi auala matou te alo i ai, se’i vagana ai le fa’aitiitia o malaga ae fa’aleleia isi tulaga mo le auaunaga a le Ofisa i le atunu’u”, o le saunoaga lea a Taufete’e.

 

O le lu’itau numera tasi o lo o fetaia’i ma le LBJ i masina ta’itasi, o le mautinoa lea o lo o i ai se tupe e totogi ai tagata faigaluega.

 

“O la’u galuega matua lea e faia i vaiaso totogi uma lava, ia mautinoa o lo o i ai se tupe e totogi ai tagata faigaluega, aua a leai ni totogi o tagata faigaluega, ua leai fo’i se isi e fia faia se galuega, pau le mea e tula’i mai, o le tele o le solo oti e tula’i mai, sa tele fo’i aitalafua le falema’i sa i ai i pisinisi i fafo sa latou sapalai ina mai vailaau ma fualaau, ao lea ua mafai ona fa’aitiitia ni isi o aitalafu tetele sa i ai, e ala i le fesoasoani mai a le tupe o le Pone a le malo”, o le isi lea saunoaga a Taufete’e.

 

E le tele ni fesili a Senatoa ma Faipule sa tu’uina atu i le paketi a le LBJ, se’i vagana ai le agaga fa’afetai i le tulaga ua si’itia i ai la latou tautua mo le atunu’u.

 

Saunoa le Peresetene o le Senate ia Gaoteote Palaie Tofau e fa’apea, e ui i le tau fa’asoasoa o tupe maua a le malo, ae o lo o molimauina pea le galulue malosi o le pulega a le falema’i atoa ai ma tagata faigaluega, i le fa’atinoina o le latou pito laau, o le tausiaina lelei lea o le soifua maloloina o le atunu’u lautele.