5 ‘AU VOLIPOLO AMOULI FAAULU LIKI VOLI O LE FU’A

E la’ititi le afio’aga o Amouli, ae ua matua mafuli i latou e fa’aosofia le ta’aloga volipolo e avea ma fiafiaga o le fanau e fa’amalositino ma ta’a’alo ai. E lima lelei ‘au volipolo mai lea afio’aga ua i ai i le Ta’amilosaga Volipolo Sisigafu’a 2015 o lo’o fa’agasolo nei.

Ua fa’ailoa mai e le tama’ita’i faia’oga o le Au Volipolo a Tama’ita’i A Team, ia Rhonda Tuia e faapea, “O le fautuaga sa fa’ailoa mai e tama o le Ekalesia Fa’apotopotoga Kerisiano i Amerika Samoa i Amouli, ia fa’aulu ‘au volipolo uma e ta’a’alo ai talavou, tina ma tama talavou, ae maise lava i latou e fiafia i le ta’aloga, aua e tau le maua se avanoa lelei e ta’alo ai i liki fa’apenei.”

O le fautuaga lea sa fa’aulu uma ai e le autalavou a le Ekalesia ‘au ta’a’alo e 5, “E fa’aosofia ai le agaga ta’a’alo i tamaiti, koleni ai fa’amasani i tulafono o le ta’aloga, ma auala e fa’aleleia atili ai tomai ta’alo volipolo, fa’atasi ma le lava o le manava ia umi ona ta’alo ae le sesela.”

“E ese mai fo’i i nei mea uma, ae tapena ai ma le ‘au mo le fa’amoemoe e fa’aleleia ai le taumafaiga i le liki voli a le EFKAS lea e amatalia ia Aperila pe a mae’a le Sisigafu’a o lenei tausaga,” o se fa’amatalaga auiliili lea a le tama’ita’i ta’alo toe fa’atonu o le ‘au a “Tama’ita’i A” a Amouli.

I se tala mai le failautusi a le Asosi Volipolo a Amerika Samoa, Iose Afu Muasau, sa ia fa’ailoa ai, “E le ma’i le sau lea e tatao mai ai ‘au volipolo nei a le ‘Fetu i Sasa’e’ o lo iloga lava fo’i ona lelei tulaga o latou taumafaiga i le liki o fa’agasolo nei, e matua to lava lo’u pulou i lea afio’aga ma latou ta’ita’i, aua o se mea lelei fo’i ua latou taumafai mai i ai”

Saunoa foi Muasau, e faapea, “afai o le faiga uma lea o afio’aga, e leai ni talavou e so’ona nofonofo solo e le faia se mea i afiafi ta’itasi, ua lelei tele. E le o mailoa lava, o i ai nisi e talenia i lenei fa’agatama o lo’o melea nei avanoa lelei fa’apenei, ona o le le auai mai e tauva i liki nei.”

O lenei tausaga, ua matua mamao lava afioaga o malaga mai ai ‘au ta’a’alo fa’avaomalo mo le fa’amoemoe, ma ua tima’i atili atu ai e fa’aulu mai ‘au e fia auai aua e matagofie le fetauiga o ‘au malolosi o masi’i mai mo le taamilosaga ia Aperila 13-18, 2015.

O le lona lima o ‘au a Amouli, o le Au Volipolo a le “Loco Motion”  a Ali’i, lea e fa’atautaia mai e talavou lava fo’i o le Ekalesia, ae le o aofia atu i le mafutaga. O le ‘au lea e to’afa i latou e vagaia latou a’oga, o le kapeteni o le ‘au o Elifasa Utu, ae to’atolu faia’oga o Leon Fuata; Rintel I’atala ma Daren Lotonu’u. E le o fa’avaivai fo’i le taumafaiga a le ‘au lea i le ta’amilosaga o faia nei.

I le ‘au a Tamaita’i A, o lo’o avea Tuia ma faiaoga; o le kapeteni o Miranda Wally Utu, ma le ‘au a teine talavou e kapeteni ai le tama’ita’i o Jasmine Tuia Thompson.

O le ‘au a tama U19 lea e kapeteni ai Mike Tipoti ae faia’oga ai le ali’i o Sefulu Tauese. O le ‘au lea ua amata ta’a’alo mai ai le fanau a’oga i elementary ma le tasi ma le lua tausaga i le high school.