Toe fo’i mai le Gaualofa i fanua
Ua toe fo’i mai nei i fanua le ‘auva’a o le Gaualofa ma le fa’amoemoe e toe amatalia le latou faigamalaga pe a mae’a masina e tolu.
O le aso Gafua na te’a nei sa fa’afeiloa’ia ai i latou e sui o a latou aiga ma uo ile uafu i Apia, fa’apea ai ma se ‘aiga (dinner) sa faia lea ile fale’aiga o le Portofino Restaurant.
O le Susuga ile Fa’afegaiga o le Ekalesia Fa’apotopotoga Kerisiano i Samoa i Matautu ia Rev Moli sa ia momoli le fa’amalo ma le fa’afetai ile ‘auva’a mo le malaga manuia ua mafai ai ona o latou taunu’u mai i fanua ile fiafia ma le manuia e aunoa ma ni fa’alavelave e tutupu mai. O lenei ‘aumalaga sa tu’ua Samoa ile masina o Iuni, a’o lea fa’atoa toe foi mai i Samoa nei ile masina nei, Setema.
“E leai se pusa aisa sa i luga o le va’a,” o se fa’amatalaga lea a le ali’i Kapeteni o le Gaualofa ia Nick Henry. “E pau lava vaega sa o matou fa’aaogaina o pia malulu, ma nai vaiinu.”
O le masina o Iuni ile tausaga nei sa tu’uina mai ai le va’a o le Gaualofa ia Samoa e se tasi o sui o le Okeanos Foundation i Siamani, ia Dieter Paulman.
O lenei va’a e tusa lona tau aofa’i ma le NZ$600,000 (T$1miliona), ma ua umiaina nei e tagata Samoa. O le va’a o le Gaualofa olo’o i lalo o le va’ava’aiga a le Aiga Folau o Samoa.
“Ina ua matou fa’atauina le Gaualofa, sa o matou taumafai loa e fa’aaogā le avanoa e galulue ma taumafai ai e toe fa’aolaola le taleni alo va’a, ae le gata i lea, o le a’oa’oina lea o tagata i auala e fa’atinoina ai faigāmalaga i luga o le vasa,” o se saunoaga lea a le Peresetene o le Aiga Folau o Samoa ia Tuatagaloa Joe Annandale.
“E momoli atu ai le fa’afetai ia Dieter ma Hannah Paulmann mo le meaalofa ua fa’apea ona tu’uina mai, e ala lea ile va’a o le Gaualofa,” o Tuatagaloa lea.