Ua valoia e sui o le Komiti Faafoe a le Vaega Tosovaa i se iloiloga sa faia i luma o le komiti o le Paketi a le Senate i le taeao ananafi, galuega fou ma tupe mama o le a mafai ona o latou maua i le tausaga tupe fou 2013.

Na taua e le Taitaifono o le Komiti Faafoe a le Vaega Tosovaa ia Carlos Sanchez sa latou fuafuaga e faaopoopo tagata faigaluega, ae na valoia e le latou Teutupe ia Peter James le faaopoopo o tupe mama o le a latou tuuina atu i le malo.

O le iloiloga a le komiti na mafua ona valaauina, ona ua taua e le kovana i lana tusi i taitai o le fono e faatatau i le paketi a le malo mo le tausaga tupe fou 2013 e faapea, o nisi o faaopoopoga i alagatupe fou o le a maua e le malo, o tupe ia mai le tautua a le Vaega Tosovaa.

 O le afioga i le alii Senatoa ia Velega Savali Jr na muamua fesili i molimau, ina ia ta’u atu poo fea latou te maua mai ai tupe fou ia ua valoia o le a maua mai e le malo mai la latou tautua.

Na taua e Sanchez i lana folasaga e faapea, e toa 65 le aofai o a latou tagata faigaluega o loo i ai i le taimi nei, peitai o loo faamoemoe e faaopoopo se isi 25 pe 30 foi i le faaiuga o le tausaga lenei, ona o le tele o galuega fou ia ua latou mauaina.

I se taimi e lei mamao atu e pei ona taua e Sanchez, sa faaopoopo ai isi tagata faigaluega, ma o loo galulue i latou i vaega eseese i totonu o le Vaega Tosovaa, lea e aofia ai le to’a 5 lea e galulue i le tatipiina lea o tino o vaa ua le toe aoga ma talafeagai ona tuu i luga o le sami, e pei ona maitauina i le vaega tonu lea e faafesaga’i ma le nofoaga tuai sa i ai le faleaisa a le StarKist Samoa ua tatala i lalo.

Na taua e James i lana molimau e faapea, e leai se tupe fesoasoani mai le malo o loo faatinoina ai la latou tautua, lona uiga o tupe uma latou te tuuina atu i le malo, e mafai ona latou faaigoaina o tupe mama, e pei o lafoga o loo totogi atu mo tagata faigaluega.

Na fesili Velega ia James pe fia se tupe sa latou totogiina atu i le malo mo lafoga a tagata faigaluega i le tausaga lenei, ae na tali molimau, e $15,000 sa latou totogiina atu i le malo i le kuata mo lafoga a tagata faigaluega, ma ua i ai le faamoemoe o le a siitia i le 50% lea vaega tupe i le tausaga tupe fou, ona o lea foi ua fuafua le faaopoopoina o tagata faigaluega.

E ese mai i tulaga o lafoga mai tagata faigaluega, o isi alagatupe o loo mafai ona maua e le malo e aofia ai vaa fagota o loo ulufale mai i le teritori ma auina atu i le Vaega Tosovaa mo le toe faafouina.

O le taimi nei, ua oo atu i le masina o Tesema talosaga mo vaa e aumai latou te toe lipeaina, o loo galulue foi le aufaigaluega i le tai 12 itula i le aso, 7 aso o le vaiaso pe a oo ina tele galuega ma mana’omia.

E toa 12 tagata faigaluega ua aloaia e le Vaega a le US Coast Guard mo le faia o galuega tetele, ae o loo manaomia pea nisi tagata lelei faapea mo le tele o a latou galuega o loo mulimuli mai.

Na taua e Sanchez i lana molimau e faapea, i taimi ua mavae, sa gata le malosi o galuega latou te faia i va’a laiti, peitai o le taimi nei ina ua maea ona faatauina le tele o mea faigaluega, faapea ai ma le maea lea ona toe faaleleia o le Vaega o loo toso ai vaa, ua mafai nei ona o latou lipeaina vaa lapopo’a i se tau lelei ma talafeagai.

O se tasi o itu lelei e pei ona taua e Sanchez i lana molimau, mo vaa fagota e ulufale mai i le teritori, e tele tupe o le a maua mai ai e le malo ma pisinisi e fesoasoani ai i lana tamaoaiga, ma o nisi o ia tupe e mafai ona maua pe afai e ulufale mai le vaa ma faatau atu ana i’a i kamupani i’a, maua le avanoa e utu ai le suauu, fai faatau a le au vaa mo le isi malaga, toe maua foi ma le avanoa e faia ai galuega lipea i le Vaega Tosovaa pe a manaomia.

Fesootai mai i le tusitala ia ausage@samoanews.com