Ua fa’ailoa mai e le Associated Press o le ali’i a’oga o Robert Wayne Gladden Jr. ua fa’atulaga nei lona ulua’i iloiloga ia Setema 7, 2012 ina ua ia fanaina lava le isi tamaititi o lana vasega i le potu ‘ai i le ulua’i aso na a’e ai le a’oga, ma e le o mailoa lava pe tua ma ni a lea tamaititi e 17 tausaga. O le ua molia, e na’o le 15 tausaga le matua.

Ua tu’ua’ia nei Gladden ona e to’atele i latou na molimauina lona fanaina o lea taule’ale’a a’oga fo’i i le A’oga Maualuga a Perry Hall High i le itula e 10:45 i le taeao o le aso Gafua, le aso muamua lava o a’oga a le fanau.

Ua fa’ailoa mai e leai se isi na lavea e ‘ese mai le ali’i ua i le falema’i nei, ae le’i fa’ailoaina mai fo’i se mafuaga ua ala ai ona ia faia lea mea i lenei taule’ale’a a’oga, peita’i i le fa’amatalaga a le ali’i leoleo i Baltimore County sa faia i le fonotaga a le a’oga, matua ma leoleo sa ia fa’aalia ai, “O le fanaina o lea talavou, e foliga mai o se e faia lava e leai se mafuaga patio e fua ai.”

I le taimi lea na faia ai le fonotaga lenei, sa fa’aalia ai e Johnson, le ali’i leoleo su’esu’e, “O se va’aiga i le fa’alavelave na tupu, ua so’ona tafana lava e le ali’i o Gladden lana fana ma ua lavea ai lea talavou, ae le o se mea na fuafua e lavea ai le tamaitit a’oga lea.”

I le aso lava o le fa’alavelave lea, na fa’alauiloa ai fo’i i luga o le facebook e le to’atele o tamaiti a’oga, matua ma faia’oga, “ua avea le ali’i o Gladden e loka ona o lana solitulafono.” O sana tala sa tusia i lana lava facebook sa ia fa’apea ai ae le’i fa’ao’o le soluitulafono e fa’apea, “Aso muamua o le a’oga, aso mulimuli o lo’u olaga - fa’amatala e le lalolagi.”

O le molimau mai a le to’atele sa i ai i le taimi o le fa’alavelave lea, sa fana e Gladden lea talavou i lona papatua. Na avea o ia i le falema’i o R Adams Cowley Shock Trauma Center i Baltimore lava, ae na’o ia lava lea sa manu’a i le fana, ae o isi tamaiti uma, sa faia togafitiga ona ua tete’i i lea mea ua tupu fa’afuase’i fa’apea i le ulua’i aso o le a’oga.

O le to’atasi o le tamaititi a’oga ua manu’a i lea fa’aletonu, ua fa’afetaia e leoleo le vave ona sofa’i mai e faia’oga ma tagata faigaluega a le a’oga maualuga o le na tafanaina tagata. Fai mai na fa’asolo loa ana pulufana muamua, ae suki loa e se tasi o le aufaigaluega a le a’oga maualuga le fa’atupu fa’alavelave lea, ma le toe aga’i ai i le fanau a’oga le fa’asologa lona lua o ana pulufana, ae ua lavea ai le fa’aalo o le fale ai.

O le ali’i leoleo fo’i a le a’oga, o ia lea sana lokaina mai muamua lima o Gladden ma loka atoa loa le a’oga mo le isi lua itula, ae se’i taumafai le pulega o le a’oga e fa’ato’a filemu lagona o le fanau ona o le mea ua tupu.

O le a’oga lea e sili ona to’atele le fanau a’oga e a’o’oga i ai, i lea setete, ma ua fa’ailoa mai e tusa ma le 2,000 tamaiti a’oga na tete’i i lea fa’aletonu, aua o le aofai lea o le fanau a’oga sa i ai i lona ulua’i aso e a’e ai le a’oga, ae sunu’i mai ma lea fa’aletonu matuia.

saunia: Leua Aiono Frost