O le alii faigaluega a le Ofisa o Femalagaaiga a le malo lea na ta’usala i lona tuuina atu o ni I.D pepelo i ni tamaitai mai Saina se to’alua, ua faasala e le faamasinoga maualuga e loka i le toese i Tafuna mo le 12 masina, o se tasi lea o tuutuuga o lana nofo vaavaaia e 7 tausaga sa tuuina atu e le faamasinoga i le aso ananafi.

O se tasi o tuutuuga o le nofovaavaaia a Polone Savea sa tuuina atu e le faamasinoga, e le gata na te totogi le salatupe e $3,000, ae sa tatau fo’i ona taofia mo’i o ia i le falepuipui mo le umi e 28 masina, peitai ua finagalo ali’i fa’amasino, ua lava na o le 12 masina e tuli e le ua molia, ae taofi isi masina o lo o totoe ai, fuafua lava lea i lona usitaia o poloaiga ua tuuina atu ia te ia.

Ua poloaina fo’i o ia e asiasi i le ofisa faanofovaavaaia i masina ta’itasi pe afai ae magalo mai i tua mai le toese, ma aua ne’i ona toe solia se isi tulafono a le malo.

Na taua e Savea lona salamo e tusa ai o le solitulafono sa ia faia, ma ia talosagaina ai alii faamasino ina ia faamagalo se sese ua ia faia. Sa ia faatoese fo’i i lona aiga, o lana faifeau lea fo’i sa i ai i totonu o le potu faamasino, o lona to’alua ma le la fanau atoa ai ma le Sa’o o le latou aiga, ina ia alolofa ma faamagalo le mea sese sa ia faia ua mafua ai ona ta’uleagaina le igoa o le aiga, nuu ma le ekalesia ia te ia.

Na tuuaia e Savea le ti’apolo ma le malosi o ana faaosoosoga, o le isi lea mafuaaga ua ala ai ona sese le faaiuga sa ia faia, ma i’u i le ta’usalaina ai o ia i lenei solitulafono.

Na finau lana loia fautua ia Matailupevao Leupolu Jr i le faamasinoga ina ia nofovaavaaia le ua molia, ma ia tuu atu i ai ni tuutuuga na te tausia a’o nofovaavaaia ai.

O ni isi o itu lelei na taua e le alii loia e tatau ona silasila toto’a i ai ali’i faamasino, e le gata o le ulua’i taimi lea faatoa solitulafono ai o ia, ae ua ia faailoa lona matua salamo e tusa ai o le mea sese sa ia faia,

Na finau le loia a le malo ia Camille Philippe i le faamasinoga ina ia faasala Savea i le falepuipui faapea ai ma le tuuina atu o se salatupe na te totogiina.

A’o le i tuuina mai le faasalaga a le faamasinoga faasaga i lenei mataupu, na faaali e le alii faamasino sili ia Michael Kruse e taimi e faailoa ai ni isi o vaega o lo o atugalu i ai le faamasinoga ona o le mataupu e pei ona molia ai Savea, lea fo’i o lo o aafia atu ai ma le tulafono mo tagata mai fafo e ulufale mai i le atunuu.

Saunoa Kruse e faapea, o Savea na ulua’i tuuaia e le malo i moliaga mamafa e fa o le faia o faamaumauga taufaasese, atoa ai ma moliaga mamafa e lua, o se tagata faigaluega lautele na te taliaina ni faiga faaalatua, ma o ia moliaga na afua mai i le mataupu lea na ia tuuina atu ai ni I.D pepelo i ni tama’ita’i mai Saina se to’alua, ina ia mafai ai pea ona aumau i laua ia i le teritori, ae ona maua ai se taui tupe mai le faaiuga o lana gaioiga sa faia.

Na taua e le alii faamasino sili e faapea, o le tele o mataupu e iloiloina e le faamasinoga, e masani lava ona finau itu e lua mo ni itu lelei mo le tagata ua molia, e faapena fo’i ona mamafa i ai le silasila a le fa’amasinoga, peita’i o le mataupu a Savea, e tulaga ese mai lava lea mataupu i le silasila a le faamasinoga, ona o gaioiga sa faia e le ua molia o lo o aafia ai tagatanuu lautele a Amerika Samoa, aemaise ai o tulafono tau Femalagaaiga ma tagata e ulufale mai i le teritori.

Na faamanino atili e Kruse, o lo o malamalama lelei le faamasinoga i faafitauli o lo o taua pea e loia i ni isi o taimi, i le tula’i mai pea lea o ni tulaga faaletonu i faaiuga mo pepa nofomau a ni isi o tagata mai fafo, ma e talitonu le faamasinoga, atonu o ni isi o mafuaaga o ia faafitauli e le gata e le o lelei ona faauigaina le tulafono, ae ona o faaiuga le lelei o lo o faia e tagata faigaluega a le Ofisa o Femalagaaiga.

Saunoa fo’i le alii faamasino sili e faapea, e ui e le o manino mai ni tulafono e ono puipuia ai tulaga i mataupu faapenei, ae o lo o manino i le Faavae auala e puipuia ai aia o tagata, o eleele faapea ai ma pisinisi.

O se tasi o tulaga sa taua e Kruse i lana saunoaga, o le vaega e pei ona faailoa mai i le Faavae, i le tatau lea ona i ai se tagata na te faaliliuina le tulafono ina ia faigofie ona malamalama i ai tagata i le gagana o lo o faaaogaina, ona o lo o i ai ni isi o vaega e toatele ni isi e le o malamalama ai.

Mo se faataitaiga e pei ona saunoa Kruse, o le mataupu faasaga i se tagata mai Asia na fofogaina i luma o le faamasinoga i le vaiaso na te’a nei, lea na maua ai i le ripoti o lea tagata mai Asia o lo o ia umia le ituaiga I.D e taua o le ‘SP’ Provision, ma ua fiu e saili i ana tusi tulafono ina ua maea le iloiloga sa faia e le o taua ai se faamalamalamaina o lea ituaiga vaega I.D.

Na faamanino e le loia sili lagolago ia Mitzie Miezie i le faamasinoga e faapea, o lo o i ai i faamaumauga a le Ofisa o le Loia Sili le faamalamalamaina o le vaega e pei ona taumafai le faamasinoga e saili.

Na toe tali fuaitau le alii faamasino sili e faapea, e foliga mai o le vaega e faia lava i lalo o le malosi o le Komiti Faafoe a le Ofisa o Femalagaaiga, ae tatau fo’i ona avanoa nei ituaiga faamaumauga mo le silafia e tagata lautele.

E 7 tausaga i le toese ma le salatupe e $3,000 na manatu le faamasinoga e faasala ai Savea, ina ua ta’usala o ia i moliaga e lua o lona faia o faamaumauga tau faasese, atoa a ma lona talia o ni faiga fa’aalatua a’o avea ai o ia ma tagata tautua lautele, peitai ua manatu le faamasinoga o le a nofovaavaaia o ia mo le 7 tausaga, ae ua lava masina e 28 e taofia sa’o ai o ia i le toese, atoa ai ma lona totogiina o le salatupe e $3,000.