Ads by Google Ads by Google

FAGOGO: O KATI LE LEOLEO NANA

[Sosoo ane loa lau faitau i le tatou tala faasolo mo lenei vaiaso, lea na gata mai i le vaiaso na tea nei i le taimi lea ua toe fo’i atu ai Kati i le fale talimalo o lo o faamautu ai e aunoa ma lona faailoaina i lana paaga o le mea ua tupu i le tamaloa o Tomasi.]

 

 

 

O le vaiaso mulimuli o Kati i totonu o Enelagi mo lana malologa na masalomia ai loa o ia i le faalavelave na maliu ai le tamaloa fai pisinisi lauiloa o Tomasi, ina ua vaaia e le au faatupu faalavelave lana taavale lea sa paka i le vaega e paka ai taavale a le faletalimalo, o lo o paka i luma o le fale kofe lea e i luga tonu o le magatolu o lo o faafesaga’i ma le fale gaosi seevae tele i totonu o le isi aai o Enelagi. Na avea le masalomia o Kati i lana taavale ma itu na si’omia ai loa e le au faatupu faalavelave le nofoaga lea mo le mata’ituina o le tagata e ana le ta’avale, a’o le taimi lea ua leva na i ai Kati i totonu o le fale kofe e faatali ai le taunuu atu o lana paga tama’ita’i la te inu ti ai.

 

Pe tusa o ni nai minute talu ona feofeoa’i solo tama a le au faatupu faalavelave i le nofoaga lea ae latou vaaia loa se tasi o ta’avale e masani ai la latou vaai, le taavale a le tamaitai lea ua avea nei ma paaga a Kati ua sosolo atu ma paka i tafatafa tonu lava o le taavale a Kati, ona vaaia lea o le tamaitai ua oso i fafo ae o lo o talanoa lava i le telefoni, ona savali sa’o loa lea i totonu o le fale kofe. Na pei o le emo o le mata gaioiga a le au faatupu faalavelave i le tau sailiina o se auala e oo ai se tasi i totonu ina ua latou vaaia o le isi lea tamaitai o le latou vaega lea ua ulufale i totonu o le fale kofe lea ae le masani ai lava.

 

O le taeao lava lea na salalau solo ai tala i luga o televise, o leitio ma nusipepa i totonu o le aai o Enelagi, i le tagatavaleina o le tamaloa fai pisinisi o Tomasi, se tasi o tagata faipisinisi sa masalomia malosi i lona faia o amioga faatupu faalavelave i totonu o le malo o Enelagi, ma o lo o tau sailia po o ai le tagata na ia faia lenei gaioiga. Ua ofo atu solo e ta’ita’i o le vaega faalilolilo a Enelagi se taui tupe tele i se tagata na te ofoina atu ni faamatalaga e faatatau i se tagata na ia fasiotia le tamaloa o Tomasi, ona e masalomia o se tagata lava sa nofo i totonu o le fale talimalo na ia faia lenei gaioiga matautia. Ua talie Kati ma lana paaga ma inu a la ipu kofe ma talatalanoa i le malologa a Kati o lo o alu atu i Enelagi, aemaise ai o lea ua toe tasi le vaiaso ona toe fo’i lea o le tama i Italia, ae o se ripoti na alu atu i luga o le televise o lo o ola i totonu o le fale kofe na matua faateia ai le tamaitai ina ua ia faalogo atu, ua maliu le tamaloa o Tomasi ma o lo o tau sailia le tagata na ia faia lea gaioiga matautia.

 

Na te’i le tamaitai ina ua faailoa atu e Kati ia te ia le auala na ia fasiotia ai le tamaloa o Tomasi, o le mafuaaga faalilolilo fo’i lea na ala ai ona alu atu i Enelagi e malolo ai, o le taumafai e faaumatia le tagata lenei o Tomasi, ona o ia lea o lo o mafua ai faiga faatupu faalavelave i totonu fo’i o Italia.