Ads by Google Ads by Google

Fautuaina Ofisa Femalagaaiga tu’u atu ripoti sa’o i le Fa’amasinoga

Na avea le sese o faamaumauga sa tuuina atu e le Ofisa o Femalagaaiga i luma o le Fa’amasinoga Maualuga, faasaga i tulaga o pepa nofomau o se alii mai Samoa, ma itu na fautuaina ai e le Fa’amasinoga le sui o lea ofisa, ina ia silasila toto’a i a latou ripoti  ina ia mautinoa e sa’o ma fetaui mo faaiuga a le faamasinoga.

 

“Ana matou faaaogaina le ripoti sa tuuina mai e la outou ofisa e faatatau i pepa nofomau o le alii ua molia, e ono amo e le alii lenei se faasalaga sili atu ona mamafa e mafua mai ona o le o sa’o la outou ripoti sa tuuina mai i le fa’amasinoga,” o le saunoaga lea a le afioga i le ali’i Fa’amasino Lagolago ia Mamea Sala Jr faasaga i le sui o le Ofisa o Femalagaaiga ia Paelo Puni, lea na fai ma sui o le Ofisa na te tuuina atu faamaumauga e faatatau i le alii o Sefo Lega ina ua lau lona faasalaga ananafi.

 

O Lega na faamoemoe e lau lona faasalaga i luma o le alii faamasino sili lagolago ia Lyle L. Richmond i le lua vaiaso talu ai, ina ua ta’usala o ia i le moliaga mamafa o le faaoolima i le tulaga lua, ona o le faalavelave lea na ia ta tui faatolu ai le tauau o le ali’i na aafia i se naifi faamoe i Malaeimi ia 13 Oketopa 2013.

 

O le ripoti sa sainia e se sui o le Ofisa o Femalagaaiga na tuuina atu i le faamasinoga a’o lumana’i ai le lauina o le faasalaga a Lega i le lua vaiaso talu ai, sa taua ai e faapea, o le I.D a le ua molia na maea lona aoga i le masina o Aokuso 2013. Lona uiga e tula’i mai le fa’alavelave na mafua ai ona molia Lega i le masina o Oketopa 2013, ua leva ona maea le aoga o lona I.D e faataga ai ona aumau i Amerika Samoa, ae o lana sponsor o Selema Meafou.

 

Ae na avea le finau o le loia a Lega i le faamasinoga e le o sa’o le ripoti a le Ofisa o Femalagaaiga e faatatau i pepa nofomau a le ua molia, ma itu na toe tolopo ai loa le lauina o le faasalaga a le ua molia e toe fofogaina i le vaiaso nei, ma poloaina ai loa le oo atu o le Pulesili o le Ofisa o Femalagaaiga faapea ai ma le sponsor a le ua molia, mo le faamaoniaina o faamaumauga faatatau i pepa nofomau a le ua molia.

 

Na tuuina atu e le alii loia ia Michael White le I.D a Lega i luma o le faamasinoga e faamaonia ai, o lona I.D faatoa mae’a le aoga i le aso 14 Aokuso 2014, o lana sponsor fo’i o  Sauolevaveao Lega, o lona tina fo’i lea.

 

E tusa ai o faamaumauga a le Ofisa o Femalagaaiga na alu atu ma Puni i luma o le faamasinoga, o lo o faamaonia ai faamaumauga e pei ona tuuina atu e le loia a Lega i luma o le faamasinoga, i le aso e maea ai le aoga o lana I.D atoa ai ma le igoa o lana sponsor.

 

Na fesili le afioga i le alii faamasino lagolago ia Mamea ia Puni pe aisea ua eseese ai ripoti a le latou Ofisa, ina ua fai mai le latou ripoti muamua o Meafou le sponsor, a’o lea ua ia molimau o Sauolevaveao le sponsor sa’o a Lega, na tali Puni, “atonu o se faaletonu e mafua mai i masini (technical error), ae o faamaumauga sa’o lea ua ia tuuina atu i luma o le faamasinoga.

 

Na molimau fo’i Sauolevaveao Lega i luma o le faamasinoga, e le gata o ia o le tina o Sefo ae o ia fo’i o le sponsor.

 

Na fesili Mamea ia Sauolevaveao pe na te iloaina le tagata e igoa ia Meafou, ae na tali le molimau na te le iloaina, ae ina ua fesiligia fo’i e Mamea ia Puni pe na te iloaina Meafou, na tali fo’i le molimau e leai.

 

Na faamanino atili e Puni i le faamasinoga e faapea, o le masina o Iulai 2013 na tuuina atu ai le talosaga mo le toe faafouina o pepa nofomau a Lega i luma o le Komiti Faafoe a le Ofia o Femalagaaiga, i lalo o lana sponsor.