Ua sainia nei se maliliega i le va o le malo o Amerika Samoa ma le vaega o Totogi ma Itula o le Matagaluega o Leipa a le malo tele (U.S Department of Labor’s Wage and Hour Division- WHD), mo le fetufaaina o fa’amaumauga ma fa’amatalaga talafeagai ma le tulafono.

O le autu o lenei maliliega e pei ona taua i faamaumauga ua mafai ona maua e le Samoa News, o le iloa lea e itu e lua o le taua ma le aoga o le mulimulita’i i tulafono, e pei ona tula’i mai ai atugaluga i totonu o Amerika Samoa.

O le autu ua mafai ai ona sainia e itu e lua o lenei maliliega, ina ia mafai ai ona galulue faatasi i le fefaasoaa’iina o aoaoga ma faamaumauga taua, ina ia mafai ai e tagata faigaluega ma i latou o lo o faa faigaluega i latou ona malamalama auiliili i tulaga o le tulafono e ao ona faatinoina ai galuega.

E le gata i lea, e mafai ai fo’i ona aoaoina le malo o Amerika Samoa i auala e tusa ai ma tulafono a le feterale e faatatau i tagata faigaluega, ina ia fesoasoani ai i le faavaeina o se Matagaluega o Leipa mo Amerika Samoa, e gafa ma le faatula’iina o auala e faamalosia ai tulaga o totogi amata, tulaga o ova taimi, tulaga i le faa faigaluegaina o fanau e laiti i lalo o le tulafono, faapea ai ma le teu maluina o faamaumauga e faatatau i vaega o le tulafono mo galuega, mo nofoaga o lo o galulue ai tagata i fafo atu o matagaluega a le malo.

O tiute tauave o le WHD e pei ona taua i totonu o le maliliega lenei ua sainia, o le faamalosia lea o tulafono tau i tagata faigaluega, e aofia ai tulafono ina ia talafeagai tulaga o galuega e ofoina atu (Fair Labor Standards Act), tulafono i aiga ma livi ma’i (Family and Medical Leave Act), tulafono e puipuia ai tagata fegasoloa’i atoa ai ma tagata e galulue faa vaitaimi i faatoaga (Migrant and Seasonal Agricultural Worker Protection Act), faapea ai tulafono e mafai ai ona tuuina atu visa mo galuega le tumau.

O lo o manino i lenei maliliega, e leai se vaega e ono taofia mai ai le WHD mai le faatinoina o ona tiute e pei ona manino i lalo o le tulafono, mo le faamalosia o tulafono e pei ona puipuia ai tagata faigaluega.

Ae mo Amerika Samoa ma ana tiute tauave o le a gafa ma le malo ma le faamalosia o ana tulafono lotoifale i tulaga o totogi, ova taimi, faapea ai le teu maluina o ana faamaumauga i tulaga o galuega faatino, ina ia tusa ai ma tulafono a le feterale.

O le a tofia e itu e lua ni o la sui e gafa ma le faia o fesootaiga mo talanoaga o le a faia e faatatau i lenei maliliega, o le a mafai foi ona faia fonotaga faaletausaga e iloilo ai ni isi o auala o lo o tula’i mai ai ni atugaluga e faatatau i lenei maliliega.

E ui o lea ua sainia le maliliega i le va o itu e lua, ae le o mafai ai ona taofia se itu mai le faatinoina o ona tiute i le faamalosia o ana tulafono.

O se tasi o faiga faavae a le WHD, o le galulue soosoo tauau lea ma isi vaega o le malo mo le faatinoina o le tulafono, ma o matafaioi faatino e aofia ai le tatau lea ona galulue faatasi ia vaega o le malo ma le WHD, mo le faia o auala uma e faamalosia ai tulafono.

E talitonu le WHD, o le fetufaa’iina o faamaumauga ma faamatalaga i le va o ni itu se lua, o le a penefiti mai ai i latou mai lo latou auai i ni maliliega faapenei, e manaomia fo’i le WHD ona latou faasoa atu faamatalaga i isi fo’i vaega faamalosi tulafono, e aunoa ma le faalauiloaina atu i le atunuu lautele.

Afai e i ai ni mataupu e ono tula’i mai e pei o se faamasinoga e ono manaomia ai se tagata faigaluega a le WHD mo le tuuina atu o se molimau, po o le faaaogaina fo’i o ni faamatalaga o lo o teu faalilolilo, e manaomia e le WHD ia le malo o Amerika Samoa ina ia latou faailoa atu lea tulaga i le WHD.

Ua malilie foi le WHD latou te tuuina mai se fesoasoani pe afai e talosagaina e le malo o Amerika Samoa, e tusa ai ma le mataupu e faatatau i totogi maualalo lea o lo o gafa nei ma le Matagaluega o Leipa a le malo tele.

O lenei maliliega o lo o sainia ai le afioga i le kovana sili ia Lolo Matalasi Moliga, ma le susuga Ruben Rosalez, o le Faatonu mo mataupu a le U.S DOL.