Ads by Google Ads by Google

Talosaga Lolo mo se manuia o va’a fagota i le atunuu

Ua talosagaina e le afioga i le alii kovana sili ia Lolo Matalasi Moliga le vaega o le ‘U.S Army Corps of Engineers’, mo se auala e toe faalautele ai vaega e taula ai va’a i luga o le uafu tele, ina ia mafai ai ona maua le avanoa e taula atu ai ma va’a fagota mai tagata fai vaa fagota i le atunuu, lea o lo o fesoasoani malosi i le faaleleia o le tamaoaiga o le teritori.

 

Na taua e Lolo i lana tusi i le sui o le U.S Army Corps Engineers ia  Thomas D. Asbery i le aso 28 Ianuari 2014 e faapea, o le oo mai ai o lenei tausaga fou i galuega faalemalo, ua tula’i mai ai fo’i ma ni isi o lu’itau mo ni isi o vaega e tatau ona faalelei mo le atina’e o le tamaoaiga o le atunuu.

 

O le faaleleia o ia vaega o le atina’e o le tamaoaiga o le atunuu, e aofia ai tulaga o uafu o lo o avea ma taulaiga o va’a e ulufale mai i le teritori.

 

O le mataupu e pei ona taua e Lolo ia Asbery o lo o manaomia ai lana fesoasoani, o le mataupu e faatatau i auala e faaleleia ai tulaga o le auaunaga a le au fai vaa fagota i le atunuu, ona o lea ua maea ona faia faasalalauga mo le faatau eseina atu o va’a fagota e 18.

 

“O se tasi o mafuaaga ua faia ai e le au fai vaa fagota lea faaiuga, ona e le o lava se avanoa i luga o le uafu e mafai ai ona taula vaa fagota nei, ma o iina lea na afua atu ai se tasi o a’u talosaga sa tuuina atu muamua ia te oe, mo le fausiaina lea o se isi vaega e faalautele atu i ai le uafu ina ia mafai ai ona tali lenei manaoga,” o le saunoaga lea a Lolo ia Asbery.

 

Na taua fo’i e Lolo e faapea, i se talanoaga sa latou faia ma sui o kamupani i’a i le laumua i Uosigitone, e le gata sa faailoa atu ai e le kamupani o le StarKist Samoa le manaoga mo se isi fanua e toe faalautele i ai lana auaunaga, ae o lo o i ai fo’i le manaoga mo le toe faalauteleina o lana uafu o lo o i ai, ina ia lava ma totoe le avanoa mo va’a fagota se tele, e mafai ai ona faaleleia tulaga i le auaunaga a le kamupani.

 

Ona o nei tulaga uma e pei ona taua e le alii kovana ia Lolo, ua ia talosagaina ai loa le susuga Asbery mo se auala e faanatinati ai fuafuaga uma e pei ona taua, ae fausia vave loa se galuega mo le toe faalauteleina o le uafu mo le StarKist.

 

“Ou te matua talitonu o lo o e silafia lelei lava le taua o le auaunaga a le StarKist mo le teritori, atoa ai ma lona sao i le atina’eina ma le faaleleia o le tamaoaiga o le teritori,” o le saunoaga lea a Lolo.

 

Na taua fo’i e Lolo e faapea, o le aga’i mai o vaa fagota mai Saina ma taumafai e auai i ogasami o lo o fagotaina e vaa fagota a le Pasefika, o se tulaga lea e ono faafefeina ai auala e atina’eina ai va’a fagota o lo o atina’eina i totonu lava o Amerika Samoa.

 

“O le siitia o le auaunaga mo kamupani i’a i le teritori o se auala lelei lea e taofia ai tulaga tau faafefe mai fafo,” o se vaega lea o le tusi a Lolo ia Asbery.