Vaega: 90

Taeao manuia i le alofa ma le agalelei o le Atua Soifua, e ala i lou alafa’i mai i lenei aso fou ua va’aia ai ataata o ta’uleleia. E ao ai ona o tatou fa’apea ifo, “Le Atua e, o Oe o lo matou olataga, o Oe, o lo matou fa’amoemoe i mea lelei, fa’afetai i Lau tausiga alofa mo i matou i aso uma o lo matou ola, Amene.”

Na muta mai la tatou tala i su’esu’ega ua faia nei e L.C. Nancy Jaxx, ma o lo’o i ai le mea o lo’o i totonu o le toto ma le tino o manuki nei ua mamate. Na ao nei e Nancy ia vaega ia o le manuki ona o lona manatu e tatau ona ave i USAMRIID e faia i ai su’esu’ega mautu.

A’o faia su’esu’ega nei e L.C. Nancy Jaxx, o le taimi lea ua talatalanoa nei Eugene Johnson, o C.J. Peters ma le ali’i foma’i manu o Dan Dalgard. Ua manana’o pe mafai ona o i le nofoaga o lo’o i ai manuki, ae sa le i mana’o i ai le ali’i foma’i manu. Ae na toe fesili Peters pe i ai nisi vaega o tino o manuki ua mamate e o ma latou i le nofoaga a le Ami USAMRIID e fai ai a latou su’esu’ega.

Ua o nei L.C. Nancy Jaxx ma Eugene fa’apea ma C.J. Peters i le fale o lo’o i ai manuki. A’o aga’i atu i lea nofoaga, na manatua ai nei e C.J. Peters le fa’ama’i e igoa o le Machupo, lea na alia’e i Bolivia, o se fa’ama’i mata’utia fo’i, ae afai ae alia’e i totonu o Amerika, o lona uiga, o le a o’o i se tulaga ogaoga tele.

Ua toe o’o ona mafaufauga i le fa’ama’i o le AIDS. Po’o le a le mea e tupu pe ana fa’apea, na iloa e tagata, a’o le i pepesi, aua o le fa’ama’i lea, na a’afia ai tagata e aunoa ma se iloa. Ae ina ua toe iloa mulimuli ane, ua tuai, ua sosolo le AIDS ua le mafai ona toe taofiofia ma ua a’afia ai nei le lalolagi atoa. Na toe mafaufau le ali’i foma’i o C.J. Peters e fa’apea, ma’imau e, pe ana fa’apea e tupu mai lea fa’ama’i, ua mautu mea uma ma i ai se falema’i fa’apitoa i Aferika e mafai ai ona fa’atino su’esu’ega e taofia ai le a’afia o tagata i lenei virusi mata’utia.

Peita’i, e leai se falema’i na i ai ma ua sosolo pea ma ua a’afia ai le lalolagi atoa. I lona lava manatu fai to’atasi, e o’o atu i le selau miliona tagata o le lalolagi o le a maua i le fa’ama’i o le AIDS, ona e leai se tasi na ia iloa le taimi tonu na alu ‘ese ai mai le vaomatua o Aferika.

O le tulaga ua o’o nei i ai, e pei ona i ai le virusi o le Ebola, e le o mautinoa lelei ma mautu le tonu pe ua maua manuki i le virusi o le Ebola Zaire, pe o se isi virusi e tali tutusa ma le Ebola Zaire. A’o alu pea le ta’avale e agai atu i le nofoaga o lo’o i ai manuki, ua fa’asolosolo lava mafaufauga o le tagata latou e pei la ona i ai le ali’i foma’i o Eugene Johnson lea o lo’o fa’atasi nei ma C.J. Peters ma L.C. Nancy Jaxx.

Ua fa’asolo nei mafaufauga o le ali’i foma’i o Eugene Johnson ma ua o’o i le Ana o Kimtu i le vaomatua i Aferika. Ua lagona le fefe ma le popole ona ua fa’apea a ia, afai o le a auai le Vaega ‘Au a le Ami, i le mataupu lenei, ae e i ai se tulaga fa’aletonu o le a tula’i mai, o lona uiga, o le a tu’ua’i uma i le Ami le leaga.

Na i’u lava ina liliu ane i a C.J. Peters lea o lo’o la nonofo i le nofoa i tua o le ta’avale ma fa’apea ane, “Peters, o e iloa le faigata o le galuega lenei, o e iloa le mata’utia o le tulaga e o’o i ai pe afai o le a i ai se fa’alavelave e tupu mai.”

E faia pea …

Fa’aliliu: Akenese Ilalio Zec