O le ali’i e 19 tausaga le matua lea na sola i tua mai le toese i Tafuna, ina ua taofia faapagota o ia e le malo i le tausaga na te’a nei, e mafua mai i le fa’alavelave lea na ia tau ta tipiina ai se tamaloa i se naifi tipi povi, ua ia ta’utino i le fa’amasinoga maualuga e fa’amaonia tu’uaiga uma faasaga ia te ia.

I le taliaina ai e le fa’amasinoga o le tali ioe a le ali’i o Joe Togitogi i moliaga e tolu e pei ona ta’usala ai o ia e le fa’amasinoga, ua fa’atulaga ai loa le lauina o lona faasalaga i le aso 21 Mati.

E lua mataupu tau solitulafono mamafa na tuuaia ai e le malo le ali’i o Togitogi. O le mataupu muamua na tula’i mai i Nuuuli i le aso 21-22 o Iulai 2013, lea na tuuaia ai o ia e le malo i moliaga e fa, e aofia ai le moliaga mamafa o le faomea i le tulaga muamua, ma isi moliaga mamafa e lua o le fa’aaoga faasolitulafono o se a’upega, atoa ai ma le moliaga mama e tasi o le fa’aoolima i le tulaga tolu.

Ae i lalo o se maliliega na sainia e Togitogi ma le malo, sa ia tali ioe ai i le moliaga e tasi o lona fa’aaoga fa’asolitulafono o se a’upega, faapea ai ma le moliaga mama o le faaoolima i le tulaga tolu, ae solofua e le fa’amasinoga isi moliaga o lo o totoe ai.

A’o taofia ai Togitogi i le toese, sa sola ese ai o ia i tua mai le toese i le aso 27 Novema 2013, ma tuuaia ai fo’i o ia e le malo i le moliaga mamafa e tasi o le sola i tua mai le toese, faapea ai ma le moliaga mama o le faatupu vevesi i nofoaga faitele.

Ae i lalo o le maliliega lea na saini e le ua molia ma ua talia fo’i e le faamasinoga, ua ia tali ioe ai i le moliaga o le faatupu vevesi i nofoaga faitele ae solofua e le faamasinoga le isi moliaga.

I le tali ioe ai o Togitogi i le mataupu lea na ia taumafai ai e faafefe se tamaloa i se agaese, sa ia tautino ai e faapea, i se taimi o le aso 21-22 o Iulai i Nuuuli, sa ia alu ai ma se naifi tipi povi lapo’a i le faleie sa nofo ai le tamaloa na aafia, ma taumafai e faafefe o ia.

O ana gaioiga tau faafefe e aofia ai lona folafola i le tamaloa na aafia, o le a ia tago e tatipi ese uma ona tamatama’i lima. Na ta’utino Togitogi e faapea, ina ua uma ona ia faia upu tau faamata’u nei, sa ia tago loa ua sasau le naifi tipi povi e pei lava o le a ia tipiina le tamaloa na aafia, ina ia faafefe ai o ia.

Na ia toe folafola fo’i i ai e faapea, afai na te fasiotia o ia, o le a tu’ua’i le fasiotiina o ia i luga o lona uso matua.

Na ta’utino Togitogi i luma o le faamasinoga e faapea, o lana gaioiga sa faia i lea aso ua le tusa lea ma ala o le tulafono, sa ia tautino fo’i e faapea, o ana gaioiga sa faia na mafua ai ona oo le fefe ma le mata’u i le tamaloa na aafia.

Sa ia ta’utino fo’i e faapea, a’o taofia ai o ia i le toese e faatali ai le taimi e faamaea ai lona faamasinoga i le mataupu e pei ona ia ioeina, sa sola ese ai i tua mai le toese ma aga’i atu i se faleoloa i Kokoland, ma ia faia ai ni uiga e ono save’u ai le nonofo filemu o tagata e pei o le palau vale ma leo tele solo, atoa ai ma lona taumafai e sola ese ina ua ia vaaia leoleo ua aga’i atu e pu’e mai o ia.

Na ta’utino Togitogi e faapea, o ana gaioiga sa faia i lea aso i luma o le faleoloa i Kokoland, sa le tusa ai ma le tulafono.

Ua malilie loia a itu e lua, o le a la finau i le faamasinoga mo se faasalaga mama mo Togitogi. O lo o taofia pea Togitogi i le toese e faatali ai le aso lea ua faatulaga e lau ai lona faasalaga.