Ads by Google Ads by Google

Falepuipui le ali’i Asia na maliu ai tamaititi 5 tausaga

O le ali’i mai Asia lea na ta’usala i le moliaga o le ave ta’avale faatamala ua mafua ai ona o o le maliu i se tamaititi e 5 tausaga le matua, ua faasala e le faamasinoga maualuga ina ia loka i le falepuipui i Tafuna mo le 12 masina, atoa ai ma lona totogiina o le salatupe e $2,500 o isi ia tuutuuga o lana nofovaavaaia e 5 tausaga.

 

Na faatoese le alii o Chung Se Lee i le faamasinoga maualuga, tauala atu i se ali’i faaliliu upu, e tusa ai o lana solitulafono sa faia, ma ia talosagaina ai se isi avanoa mo ia.

 

Na taua e Lee e faapea, e le i faigofie ia te ia ma lona to’alua le faalavelave na mafua ai ona maliu le tamaititi na aafia, o le tama lea a se ulugali’i latou te faauo, ma talu mai le aso na tula’i mai ai lea faalavelave, e o o mai lava i le taimi nei o lo o lagona pea lona mafatia ina ua misia e le ulugalii le la tama, e faapena fo’i ia te ia ma lona to’alua, ona e i ai fo’i lona atali’i e 18 masina le matua.

 

Na taua fo’i e Lee i lana faatoesega e faapea, o ia na ulufale mai i Amerika Samoa i le 2003 ma le faamoemoe e saili ai se lumana’i mo lona aiga, sa amata galue o se alii fai faiva i luga o va’a fagota, ma i’u ina avea ai o ia ma kapeneti.

 

O le aso  na tula’i mai ai le faalavelave, na alu atu ai e kiliva i’a i le fale’aiga a se tasi o uluali’i la te faauo i Nuuuli, e aunoa ma sona iloa o le tamaititi o lo o taalo i le vaega e paka ai taavale, ma faafuase’i ai loa ona tula’i mai le faalavelave.

 

Na taua e lana loia fautua ia Matailupevao Leupolu e faapea, o le faalavelave na tula’i mai, e le o se mea sa mafaufauina e Lee, ae o se faalavelave na tupu faafuase’i.

 

Na talosaga Leupolu i le faamasinoga mo se isi avanoa mo Lee, faapea ai ma se faasalaga faanofovaavaaia.

 

Saunoa le alii faamasino sili ia Michael Kruse e faapea, e ui i le faafinauga a le loia a Lee o le mea sa tupu, e le o se mea sa mafaufauina, ae i le vaavaai a le faamasinoga, sa tatau lava ona mataala Lee i le taimi sa ia faafoeina ai lana taavale.

 

E 3 tausaga na manatu le faamasinoga e faa falepuipui ai Lee i le toese, faapea ai ma lona totogiina o le salatupe e $2,500, peitai o le a faamalumalu le tuliina o lea faasalaga, ae o le a nofovaavaaia o ia mo le 5 tausaga i lalo o poloaiga a le faamasinoga.

 

O ni isi o ia poloaiga e aofia le se’i o lana laisene mo le 24 masina, o le a mafai fo’i ona tatala o ia i tua e faigaluega pe mae’a ona ia tuliina ulua’i masina e 6 o lana faasalaga faafalepuipui, o le a mafai ona tatala o ia i tua i le aso Gafua e oo atu i le aso Faraile, mai le itula e 6:00 i le taeao e oo atu i le 6:00 i le afiafi.

 

Saunoa Kruse e faapea, o le faaiuga a le faamasinoga i lenei mataupu, e tutusa lelei lava ma faaiuga sa tuuina atu muamua i ni isi o mataupu faapea sa iloiloina muamua e le faamasinoga, faasaga lea i ave ta’avale sa ta’usala i moliaga o le ave ta’avale fa’atamala ua mafua ai ona oo le maliu i se isi tagata.

 

O le mataupu ua fa’asala ai e le faamasinoga ia Lee na alia’e mai i le aso 1 Novema 2013, i luma tonu o le fale’aiga o le F&Y Fast Food i Nuuuli, faafesaga’i ma le Laufou Shopping Center, ina ua so’a e le ta’avale a Lee le tamaitiiti e 5 tausaga, a’o tau saili e le ua molia se vaega e paka ai lana taavale.

 

Na taua e Lee i leoleo e faapea, ina ua oo atu lana taavale i le auala e afe aga’i i totonu o le faleoloa o le F&Y Fast Food, sa faafuase’i ona mimilo lana taavale e aunoa ma lona iloaina o se tamaititi o lo o ta’aalo ai i lea vaega, ma tula’i mai ai loa le fa’alavelave.

 

O tagata sa i ai i le taimi na tula’i mai ai le fa’alavelave, na latou feei ma tau valaau i le ua molia e tu lana ta’avale, ae ina ua latou fetagofi atu i le tamaititi na lavea, sa latou maitauina ai le sau o le toto i ona taliga ma lona isu.