Ads by Google Ads by Google

To’atele Faipule na fesiligia polokalame ‘Off-Island Referral a le LBJ

E to’atele afioga i Faipule na latou fesiligia le Pulega o le Falema’i o le LBJ i le vaiaso na te’a nei, i le tulaga o lo o i ai le polokalame lea e auina atu ai gasegase i fafo mo togafitiga (Off-Island medical referral program), pe aisea ua le toe tatalaina ai ina ia mautinoa o lo o tali atu le falema’i i manaoga o le atunuu.

 

O le iloiloga e fesiligia ai tulaga o lo o tutupu i le falema’i, sa faatautaia lea e le Komiti o le Soifua Maloloina a le maota o sui, i lalo o le taitaiga a le afioga i le ali’i faipule ia Maugaoali’i Leapai Tusipa Anoa’i o le ta’ita’i komiti, ma sa molimau ai le Pulesili o le LBJ ia Joseph Davis Fleming ma le Ta’ita’ifono o le Komiti Fa’afoe ia Mase Akapo.

 

Saunoa le tamaitai faipule ia Vui Florence Vaili Saulo e faapea, o le to’atele o le atunuu e le gafatia le totogi o pasese e malaga atu ai i fafo mo talavai, ae o le taua lena o le polokalame lenei, e fesoasoani ai le falema’i i le tagata ma’i o lo o fia malaga i fafo mo togafitiga.

 

Na fesili Vui ia Mase po o ai e faia le faaiuga mo gasegase e auina i fafo mo togafitiga.

 

Na faamanino e Mase i luma o le Komiti e faapea, ua fai si umi e le i toe tatalaina le polokalame lenei, ma ua faaaoga e le falema’i se vaega tupe mai le 2% mai le lafoga o totogi sa pasia e faatupe ai le totogiina o pasese mo ni isi o gasegase e auina atu ai i fafo mo togafitiga.

 

Saunoa fo’i Mase e faapea, e i ai pasese fa’apitoa mai le kamupani vaalele a le Hawaiian Airlines, o lo o ofoina atu e auina ai gasegase i fafo mo togafitiga faapea ai ma tagata faigaluega a le falema’i o lo o malaga fa’atasi ma le gasegase.

 

Na fesili le afioga i le alii faipule ia Vaamua Henry Sesepasara i sui o le falema’i, pe to’afia ni gasegase o lo o i ai i le lisi o tagata o lo o faatalitali mo le atuina atu i fafo mo togafitiga, ae na saunoa Mase, talu ai ua leva e le o toe tatalaina le polokalame, lona uiga fo’i la e le o i ai se lisi, ae na toe finau atu Va’amua e faapea, o lea sa molimau le Pulesili o le LBJ ua mavae atu, o lo o i ai le lisi faatalitali mo gasegase e fia auina atu i fafo mo togafitiga, ae sa tumau pea le tali a Mase, e le tatau ona i ai se lisi mo ni gasegase e auina atu i fafo pe afai e le o tatalaina le polokalame.

 

Na talosaga Vaamua i le pulega o le falema’i, ina ia aumai le vaega tupe sa maua mai e le falema’i mai le lafoga o totogi e 2% ua uma ona pasia e le Fono, e toe tatala ai le polokalame ma toe faaauau le auina atu o gasegase i fafo mo togafitiga, a’o fa’atalitali ai le Fono Faitulafono i ni isi fuafuaga a le falema’i mo se isi vaega tupe e faatupe ai le polokalame.

 

Saunoa Vaamua e faapea, e le o se mea tatau le fai mai o le falema’i o lo o tapuni le polokalame, ae a ma’i mai se ta’ita’i o le malo e pei o le kovana ua mavae ona vave lea o le tulioso o le falema’i e ave le kovana i fafo, ma atili ai lava ona le fiafia tagata i le mafai ona tutupu o nei ituaiga faaiuga ae o lea e faailoa atu ia te i latou o lo o tapunia le polokalame.

 

Na fautuaina e Vaamua le pulega a le falema’i, e le tatau ona toe tula’i mai lenei faafitauli ma le le fiafia soo o le atunuu.

 

Ae na saunoa Mase e faapea, afai o le a toe tatala le polokalame, ona toe faatulaga fo’i lea o se isi lisi fou a le falema’i mo i latou e fia auina atu i fafo, aua e i ai le talitonuga o ni isi sa i ai o latou igoa i le lisi tuai e pei ona fesiligia, ua le o toe vaaia o latou foliga i le taimi nei.

 

I le faaiuga o le iloiloga, sa taua ai le sauni o le pulega a le falema’i e tuuina atu i le Fono se pili mo sana paketi faaauau, mo le faamoemoe e fesoasoani ai i le toe tatalaina o le polokalame e auina atu ai gasegase i