E to’alua ni aiga ua aveese mai lo latou nofoia pea o fale a le malo i Fogagogo, ina ua tuuina atu i ai se tusi mai le Faatonusili o le Matagaluega o Tautua ma Pulega a le malo ia Malemo Tausaga, ina ia latou tuua fale o le malo, ina ua manatu le fa’atonu e toe fa’amalosia atili tulafono ma ta’iala i le fa’aaogaina e tagata faigaluega o fale a le malo.

O aiga e to’alua sa tuuina atu i ai e Malemo tusi e tula’i ese ai mai fale o le malo i totonu o le 30 aso, e aofia ai le susuga a Pat Galea’i lea o lo o avea ma faatonu i polokalame a le Matagaluega o Fefaatauaiga, ma le tofa Letalu Maui lea sa avea muamua ma senatoa.

Talu mai le taimi na tauaao ai e Letalu ma Galea’i tusi mai ia Malemo i le tausaga na te’a nei ina ia tula’i ese ma fale a le malo, sa usitaia e Letalu le faatonuga ma tula’i ese ai ma lona aiga, se’i vagana ai Galea’i sa ia toe talosagaina se isi 30 aso e tapena ese ai, ma o lea 30 aso e mae’a i le aso Faraile nei, Ianuari 31.

Na taua e Malemo i le Samoa News e faapea, ua ova ma le 10 tausaga o nofo Galea’i i fale a le malo, talu mai taimi o le afioga i le alii kovana ia Tauese P. Sunia.

I se vaega o tusi sa tuuina atu e Malemo ia Galea’i, na mafai ona maua e le Samoa News, sa faailoa ai e Malemo e faapea, o lona aumau ai i fale a le malo e le o se tulaga talafeagai, ona o fale nei e mo tagata o lo o galulue faakonekarate mo le malo mo le ta’i lua tausaga.

“O oe o le tagata faigaluega tumau a le malo, lona uiga e le agava’a ona e nofo i fale nofo nei a le malo,”o se vaega lea o le tusi a Malemo ia Galea’i.

Ae na taua e Galea’i i le Samoa News e faapea, i le taimi o le nofoaiga a Tauese a’o ia galue i se pisinisi tua, sa fesiligia ai o ia pe mafai ona galue mo le malo, ae talu ai le tulaga maualalo o lona totogi sa maua, sa ia talosagaina ai loa se fale o le malo e nofo ai, ina ia fesoasoani ai i le tulaga maualalo o lona totogi sa i ai, ma e umi se taimi sa ia nofo ai i fale ia o le malo.

E tusa ai o se faamatalaga sa tuuina mai e Sylvia Mauga mai le Matagauega o Tautua ma Pulega a le malo, sa ia taua ai i le Samoa News e faapea, e $750 le totogi o le fale sa nofo ai Galea’i, ona totogi lea e Galea’i o lana pili eletise ma le vai i le aofaiga e $50 e oo atu i le $100 i le masina, ae totogi e le Matagaluega o Fefaatauaiga le vaega e totoe ai i le tau o le fale, amata mai i le $600 e o o atu i le $650.

I le tusi a Malemo ia Letalu sa ia taua ai e faapea, o Letalu na amata nofo i fale o le malo ina ua avea o ia o se tasi o Senatoa mo le motu o Manu’a, ma o le masina o Ianuari 2013 na mae’a ai le taimi na avea ai Letalu ma senatoa o le itumalo, ae o lo o faaauau pea ona ia nofo i le fale o le malo, e ui o lea ua i ai le isi senatoa lea ua sui tulaga ia te ia i le nofoa.

Na faailoa e Malemo ia Letalu i lana tusi e faapea, o fale nofo a le malo e faapitoa mo tagata e galulue faa konekarate mo le malo mo le ta’i 2 tausaga.

Na taua e le sui o le Matagaluega o Tautua ma Pulega Lautele i le Samoa News e faapea, sa totogi le pili eletise ma le suavai a Letalu ae le i totogiina sana rent.

I tausaga ua mavae  e pei ona taua e le sui o le Ofisa e faapea, sa i ai fo’i se Faipule mai Manu’a sa nofo i fale nei a le malo, e ui e leai se vaega o le tulafono e faataga ai ni sui mai Manu’a e nofoia nofoa o le Fono Faitulafono mo latou itumalo, ona nonofo i fale nofo a le malo pe afai e leai ni a latou aiga i Tutuila, se’i vagana ua faia ni tuutuuga faapitoa.

fa’aliliu Ausage Fausia