O le ali’i Saila o le va’a a le malo o Samoa, le Lady Naomi lea sa tuuaia i lona umia faasolitulafono o se vaega o le laau faasaina o le mariuana, ua ia ta’utino i luma o le Fa’amasinoga Maualuga i le vaiaso nei, e fa’amaonia tu’uaiga faasaga ia te ia, sa sau ma ni taga pepa mariuana mai Samoa.

I le tali ioe ai o le ali’i o Liki Kirisimasi i le moliaga mamafa lea ua toe teuteu e le malo o Amerika Samoa, sa ia ta’utino ai i luma o le fa’amasinoga maualuga e faapea, i se taimi o le aso 21 Novema 2013, sa ia umia faasolitulafono ai vaega o le laau faasaina o le mariuana.

Na tautino Kirisimasi e faapea, sa ia iloaina lelei lava o mariuana o lo o i totonu o le afifi lea na malaga mai ma ia mai Samoa, ma le faamoemoe e tuuina atu i se tagata o lo o faatali atu i Amerika Samoa nei, ma o lea afifi e tolu taga pepa iila o lo o i ai vaega o le mariuana o lo o i totonu.

O le mataupu lenei na alia’e mai ina ua masalomia e leoleo le aumaia faanana e se tagata mariuana mai Samoa i le vaa o le Lady Naomi, ma aga’i atu ai loa leoleo mo le faatinoina o le latou siaki i lea aso.

A’o faatino tiute a leoleo sa latou vaaia ai se pikiapu lanu mumu na alu atu ma piki se alii Saila na malaga atu i le va’a, ona la ti’eti’e lea i totonu o le taulaga mo sina taimi, ona toe tuu lea e le pikiapu o le alii Saila ae faaauau pea le pikiapu aga’i i le kamuani i Atu’u.

Na taofia e leoleo le ave taavale o le pikiapu ma iloa ai, o ia lea o Fatu Vagana, o se tagata faigaluega i le kamupani, ma i totonu o le taavale a Vagana, sa maua i ai e leoleo se afifi sa masalomia o lo o i ai vaega o le laau faasaina o le mariuana, ma o le afifi la lea o lea ua ta’utino Kirisimasi i luma o le faamasinoga, o le afifi mariuana sa sau ma ia mai Samoa.

Na taua e Kirisimasi i leoleo e faapea, ina ua tuu atu e se tagata ia te ia le afifi i Samoa, sa avatu faatasi ai ma le faatonuga, o lo o i ai le tagata o lo o faatali atu i Amerika Samoa nei mo le afifi lea.

Ina ua taunuu le Lady Naomi i le aso e pei ona taua, sa vili ai e Vagana ia Kirisimasi ma fesili i ai mo le afifi, o le mafuaaga lea na piki ai e Vagana le ua molia, ma ina ua maea ona ave e Kirisimasi le afifi ia Vagana, sa tuu i ai e Vagana le tupe e faatau ai sana pusa si’usi’u pipi e alu ma ia i Samoa, e pei ona faaalia e Vagana i Leoleo.

Na taua e Kirisimasi i leoleo e faapsa, sa masalosalo lava lona loto, pei lava o ni fualaau faasaina o lo o i totonu o le afifi na sau ma ia, ae ina ua taofia o ia e leoleo, o iina sa ia iloa ai e sa’o lava ona masalosaloga.

O lo o taofia pea Kirisimasi i le toese i Tafuna e faatali ai le masina fou lea ua faatulaga e lau ai lona faasalaga.

E le o se taimi muamua lenei ua ta’usala ai ni Saila mai Samoa i lo latou faatinoina o solitulafono i le teritori, aemaise ai lava le umia faasolitulafono o mariuana.