O le suiga e pei ona i ai le tulafono e toe faaaoga ai polo ma pate kirikiti sa amata mai ai taaloga kirikiti i aso ua mavae, o se suiga lea na faavae mai i se fautuaga a le Failautusi o le Ofisa o Mataupu Tau Samoa, le afioga i le Alo o Salamasina ia Satele Galu Satele, e pei ona faamaonia mai e le fetalaiga a le Satofaiga ia Le’ae Fue Mauga ina ua fesiligia e le Samoa News e uiga i lenei mataupu.

O le ituaiga polo kirikiti lea ua tele ina fa’aaoga i le taimi nei, e fiti mamao pe a tau i le pate, e le o iloa fo’i po o ai le ‘au na latou amataina maia lea ituaiga polo i le tausaga e 2005 e pei ona faamanino e Mauga, o le Ta’ita’i Komiti o le taamilosaga.

Ae i se fonotaga sa faia a le Komiti Faafoe o le taamilosaga kirikiti ma sui o au kirikiti ta’itasi i le atunuu, sa faasea ai le to’atele, e le tatau ona taofi polo fou ia ua faaaoga i le taimi nei, ona sa manatu isi ua uma ona tapena polo a latou ‘au mo le taamilosaga o lenei tausaga.

I tulaga o pate kirikiti, ua faaiugafonoina e le Komiti, pau pate e talia i le taamilosaga, o le pate e 5 inisi le lautele o le ulu, ona o pate ia ua vaaia i le taimi nei, e fiu le tagata fa’ate’a e tau su’e mai sona avanoa i ‘olo e mafua mai i le lautele o le pate.

Saunoa Le’ae e faapea, e tiga lava ona tele faasea faasaga i le faaiuga ua faia, ae ua manatu le Komiti o le a lagolagoina le fautuaga a le afioga Satele, mo le manuia o taaloga kirikiti i le atunuu mo le lumana’i.

“O pate ia na o mai ma isi ‘au e oo atu i le 7 inisi le lautetele ae o ‘olo e fai ai le taaloga kirikiti e na o le 6 inisi le lautele, e faafefea la ona fai nei ituaiga mea faapea, e lautele atu le pate nai lo le ‘olo,” o le isi lea saunoaga a Le’ae.

O le kirikiti e le'i faia ni tulafono o pate ma polo, e moni lava o taaloga na o mai ma Misionare i le vaitaimi ua tau amata le lotu kerisiano i le vaitaimi o le 1830 na faasolosolo mai ai i luma, ae sa taaalo ai lava tamaloloa na aumaia le lotu iinei.

Sa tele lava i le o ifo o tagata Samoa nofo nofo solo mai i lea taimi ae fai pea le kirikiti a papalagi, o iina la na a'e ai se manatu o tagata Samoa, e o nei e faataitai le taaloga lea i lena talutalu fou, ma o loa ma su'e se laau e gaosi mai le polo, maua le pulu vao ma faaaoga apa e tuu i ai le sua o le pulu.

Taai ma maua ai loa le polo pulu, le mea lena e faaigoa ai o le 'polo pulu' ia ua o ifo tafisi ai loa pate e fuafua lava i pate lea e faaaoga mai e le papalagi.

Ia ua amata nei ona fiafia i ai Samoa i lea taaloga, maua ai ma le igoa e faaigoa ai, o le kiritiki, o le upu e sau mai i le taaloga lea, 'cricket', ua tuu i ai ma o latou tulafono.

Lea la ua sau ai nei, lea la faatoa sui i le tausaga lenei, ina ua vaai atu i pate ma polo, ua matua'i ova lava le le mafaufau.

O le fetalaiga a Le'ae Mauga, "A le fiafia i ai se 'au e tatala lava le faitotoa e malolo ai, ia le faaiuga o le Taitai komti, ae o lea e vaai atu na o le le fiafia ae fai lava le finagalo o le komiti."

"Ia atonu a le faia i le sa'o le faaiuga a le komiti, e toe foi mai e fai le kirikiti i pate e fea (fair) uma i 'au taaalo, i lo'o pate e pei o se faleapa pea e tu mai i le malae kirikiti." 

Se va'aiga i tulaga o ta'aloga ina ua mae'a lenei vaiaso:

Paka i Fagaalu - Falelima i Sasa'e

1/25/2014       Faga'itua (87) vs Gataivai (39)

                       Faga'alu (60) vs Masefau #2 (101)

1/27/2014       Masefau #1 (119) vs Afono (118)

1/28/2014       Alofau (77) vs Matu'u/Faganeanea (76)

1/29/2014       Fagaitua (50) vs Fagaalu (51)

1/30/2014       Gataivai (74) vs Masefau #2 (100)

1/31/2014       Masefau #1 vs Alofau (66)

Malae i Vailoa  - Falelima i Sisifo

1/25/2014       Poloa ( 80) vs Iliili (79)

                       Vaitogi#1 (55) vs Faleniu #1 (74)

1/27/2014       Faleniu #2 (64 vs Pavaiai (65)

1/28/2014       Tafuna (75) vs Vailoa (55)

1/29/2014       Iliili #2 (73) vs Vaitogi #2 (64)

1/30/2014       Taputimu (73) vs Malaeloa (100)

1/31/2014       Poloa (30) vs Faleniu #1(31)